Dutalu 20 - La Sainte Bible en Langue Yipunu

Mamba maMeriba

¹ Dibuli diotsu dibaIsrael dimatola o kumu jiTsin mu tsungi jitega; batu bamasikama o Cades. Avana Miriam amafuila na amatsigulu.

² Dibuli disamadila mamba vana; bamanyoyila Moise na Aaron.

³ Batu bamaronda utsundisa Moise. Bamawivula rie: Dibandu yi tusamafuila ava baana bataji betu bamafuila va gusu Fumu?

⁴ Dibandu yi dumanengilila dibuli diFumu o kumu ejiji yiri tuyifuila gunu, jetu na biruitsi bietu?

⁵ Dibandu yi dumayetupalisila o Egypte utubega o mbura ejiji jibi? Mbura ejiji jigaa jiwelimina uvara na vagaa ne mifiga nesi mfuga tsirayisan nesi migeranada nesi mamba monu.

⁶ Moise na Aaron bamakakana na dibuli uwenda o dikotulu diNdagu Yibenguna. Bamagudama va tsi; bundumba buFumu bumalabana nogu.

⁷ Fumu amaruma Moise rie:

⁸ Bonga nguangu agu, jenu na muana nguji agu Aaron, dukanengila dibuli. Dukavosa na dimanyi va misu mogu na diudupalisila mamba; dukabapalisila mamba madimanyi, dukanuisa dibuli diotsu na biruitsi biogu wandi.

⁹ Moise amabonga nguangu andi ajimaba va gusu Fumu nana Fumu amamurumina.

¹⁰ Moise na Aaron bamanengila dibuli vana dimanyi. Moise amabatsingula rie: Jenu mimbini guluatianu! Je mu dinianyi diedidi jetu tudupalisila mamba?

¹¹ Mbana Moise amanangula gogu, amadimba dimanyi kumbu beji na nguangu andi. Mamba mamasundila upala mapuela mapuela. Dibuli dimanu na biruitsi wandi.

¹² Mbana Fumu amatsingula Moise na Aaron rie: Dugaapayila yitu nolasa buNsambi buami ombu baIsrael kabogu dugomuebatolisa o bulongu abu nyibaveyi.

¹³ Amana mamaba mamba maMeriba, divindugulu rie: utsunda mu mbari avana baIsrael bamatsundila na Fumu agumabalasa buNsambi buandi.

Kaga jiEdom ubusa ebusi uviosa baIsrael

¹⁴ Vana Cades, ava Moise amatindila bilumbi ombu kaga jiEdom uyemutsingula rie: BaIsrael, baana banguji bagu, jogu rie: Guijabi maguga motsu ama jetu tumawarila.

¹⁵ Bataji betu bamawenda o Egypte na tumatsana guna yitsingu yineni tumba bisi Egypte bamatulasa maguga, jetu na bataji betu.

¹⁶ Tumagamuyila Fumu na amagulu migamu mietu. Amasindiga yiansa ayimatupalisa o Egypte. Laba tuji o Cades, musiengi aguvu o kodu mosi o bulongu buagu.

¹⁷ Tusingisi uvioyila o bulongu buagu; tugovioyila o gari tsimanungi menu mamunongu na munongu na tugonu mamba mabiduna, tusungama mu nsila jikaga, tugopembuga yiari na yiari te na tuvioga bulongu buagu.

¹⁸ Kaga jiEdom amabagabusila rie: Duyavioyila o bulongu buami mbe nyutoga nenu.

¹⁹ BaIsrael bamamulenda rie: Kokolu tsiagu, tuvioyila mu muvunda; pa tunu mamba magu, nesi jetu nesi migamba mietu tugufuta; yika uvioga tuivioyi.

²⁰ Amabawaka rie: Duyavioga! BaEdom bamapala uyenababengusana na bagora bapuela bapuela abamaba na mangolu maneni.

²¹ Anana baEdom bamabusila uvega baIsrael musuga uvioyila o bulongu buogu kabogu baIsrael bamavioyila o yiari yisusu.

Dufu duAaron

²² Dibuli diotsu dibaIsrael dimagusuga o Cades na dimatola o mukongu uHor.

²³ Fumu amavosa na Moise na Aaron o yiari yimukongu uHor o mandilu mabulongu buEdom rie:

²⁴ Aaron ofu namapapa; agokota o bulongu abu nyiveyi ombu baIsrael mu mbari dumalensa diruma diami va mamba maMeriba.

²⁵ Ndeʼ Moise, bonga Aaron na muana andi udibaala Elazar, bamatisi o julu mukongu uHor.

²⁶ Vula Aaron biduaru biandi bibuvagulitsi bupagu nobiduisa muana andi Elazar, avana Aaron ofuila.

²⁷ Moise amavaga adi Fumu amaruma. Jogu barieru bamamata o julu mukongu uHor va misu madibuli diotsu.

²⁸ Moise amavula Aaron biduaru biandi bibuvagulitsi bupagu na amabiduisa muana andi Elazar. Avana Aaron amafuila o julu mukongu uHor. Moise na Elazar bamavindama mukongu.

²⁹ Dibuli diotsu dimalaba yiri Aaron amafu na baIsrael botsu bamalilanga Aaron te na magumarieru mabilumbu.