Dutalu 2 - La Sainte Bible en Langue Yipunu

Mbura jiyifumba yifumba va mulaku mulaku

¹ Fumu amatsingula Moise na Aaron rie:

² BaIsrael bovaganga milaku, mutu mutu va mugula uyilimbu yiandi ayivu na yilimbu yindagu jibataji bandi; bovaganga milaku va nsungisini na Ndagu Yibenguna yiari na yiari.

³ O yiari ayi wisi epalili: milaku miJuda na yilimbu yiandi na bagora bandi. Avana sefu jibaana bababaala baJuda, Nachon muana dibaala uAmminadab ovayilanga milaku,

⁴ na dibuli diandi dibagora dimaba na dutalu dumagumidusambuali na tosini jina na kama yisiamunu tsibabaala.

⁵ Yifumba yiIssakar bovaganga milaku va mugula andi, sefu jibaana bababaala baIssakar, Netaneel muana dibaala uSouar,

⁶ na dibuli diandi dibagora dimaba na dutalu dumagumaranu na tosini jina na kama jina tsibabaala;

⁷ mbana yifumba yiZabulon, sefu jibaana bababaala baZabulon, Eliab muana dibaala uHelon,

⁸ na dibuli diandi dibagora dimaba na dutalu dumagumaranu na yisambuali yitosini na kama jina tsibabaala.

⁹ Dutalu duotsu dubisi milaku miJuda adudu: kama na magumidunana na tosini yisiamunu na kama jina tsibabaala abamaba bagora. Jogu bamarelanga usogama.

¹⁰ O tandu mivu milaku miRuben na yilimbu yiandi na bagora bandi. Avana sefu jibaana bababaala baRuben, Elissour muana dibaala uChedeour ovayilanga milaku,

¹¹ dibuli diandi dibagora dimaba na dutalu dumagumana na tosini yisiamunu na kama yiranu tsibabaala.

¹² Yifumba yiSimeon bovaganga milaku va mugula andi, sefu jibaana bababaala baSimeon, Cheloumiel muana dibaala uSourichaddai,

¹³ dibuli diandi dibagora dimaba na dutalu dumagumaranu na yifu yitosini na kama yirieru tsibabaala;

¹⁴ mbana yifumba yiGad, sefu jibaana bababaala baGad, Eliassaf muana dibaala uDeouel,

¹⁵ dibuli diandi dibagora dimaba na dutalu dumagumaranu na tosini yiranu na kama yisiamunu na magumaranu mababaala.

¹⁶ Dutalu duotsu dubisi milaku miRuben adudu: kama na magumaranu na tosini mosi na kama jina na magumaranu mababaala. Jogu bamadukanga abamarela usogama.

¹⁷ Mbana Ndagu Yibenguna jiubegungu na dibuli dibisi Levi na jiurangugungu va gari milaku misusu: bosogamanga nana bevayilingi milaku, mutu mutu otandama va yilimbu yiandi.

¹⁸ O yiari ayi wisi ewendisini mivu milaku nuEfraim na yilimbu yiandi na bagora bandi. Avana sefu jibaana bababaala baEfraim, Elichama muana dibaala uAmmihoud ovaganga milaku,

¹⁹ dibuli diandi dibagora dimaba na dutalu dumagumana matosini na kama yiranu tsibabaala.

²⁰ Yifumba yiManasse bovaganga milaku va mugula andi, sefu jibaana bababaala baManasse, Gamliel muana dibaala uPedassour,

²¹ dibuli diandi dibagora dimaba na dutalu dumagumarieru na tosini beji na kama beji tsibabaala;

²² mbana yifumba yiBenjamin, sefu jibaana bababaala baBenjamin, Abidan muana dibaala uGuidoni,

²³ dibuli diandi dibagora dimaba na dutalu dumagumarieru na tosini yiranu na kama jina tsibabaala.

²⁴ Dutalu duotsu dubisi milaku miEfraim adudu: kama na yinana yitosini na kama tsibabaala. Jogu bosogama va nsima abamubeji.

²⁵ O tandu mivu milaku miDan na yilimbu yiandi na bagora bandi. Avana sefu jibaana bababaala baDan, Ahiezer muana dibaala uAmmichaddai ovayilanga milaku,

²⁶ dibuli diandi dibagora dimaba na dutalu dumagumasiamunu na tosini beji na yisambuali yikama tsibabaala.

²⁷ Yifumba yiAsser bovaganga milaku va mugula andi. Sefu jibaana bababaala baAsser, Paguiel muana dibaala uOkran,

²⁸ dibuli diandi dibagora dimaba na dutalu dumagumana na tosini mosi na kama yiranu tsibabaala;

²⁹ mbana yifumba yiNeftali, sefu jibaana bababaala baNeftali, Ahira muana dibaala uEnan,

³⁰ dibuli diandi dibagora dimaba na dutalu dumagumaranu na tosini yirieru na kama jina tsibabaala.

³¹ Dutalu duotsu dubisi milaku miDan adudu: kama na magumaranu na yisambuali yitosini na kama yisiamunu tsibabaala. Jogu bositanga usogama; dikabu dikabu na yilimbu yiogu.

³² Anana baIsrael bamasansumunu muna mandagu mabataji bogu. Dutalu dubagora botsu abamasansumu mu milaku miogu miotsu na mu mabuli mogu dumaba kama yisiamunu na tosini yirieru na kama yiranu na magumaranu mababaala.

³³ Tumba bisi Levi basamasansumu va mosi na baIsrael basusu nana Fumu amarumina Moise.

³⁴ BaIsrael bamavaga motsu ama Fumu amaruma Moise. Bamavaganga milaku miogu va mugula ubilimbu biogu na bamasogamanga mutu mutu mu yifumba yiandi na mu mukuta utaji andi.