Dutalu 19 - La Sainte Bible en Langue Yipunu

Mabufu mangombi jibenga

¹ Fumu amatsingula Moise na Aaron rie:

² Guluanu mugaga agu Fumu jaʼ beni amasona rie: Rumanu baIsrael, badubeyili ngombi jibenga ajigaa na ditodi na ajigaa na yifu na ajisakabega yilala.

³ Dukajiwakisa ombu Elazar muvagulitsi upagu, jandi ojibega o tsomu dimbu na jiubokulu va misu mandi.

⁴ Elazar muvagulitsi upagu obonga malungu na mulembu na omatsatsa yisambuali yikumbu va gusu kana Ndagu Yibenguna.

⁵ Bonyensa ngombi va misu mandi: bonyensa mukata na musonyi na malungu na mambi bijionyi wandi.

⁶ Muvagulitsi upagu obonga bitsafinyi bisedera na bitsafinyi biyisopa na munguli na obibuaga o gari muji agusielasana ngombi.

⁷ Muvagulitsi upagu osusa biduaru biandi na jaʼ beni wandi obuila; mbana ogabuga o mulaku, oba muinsi te na tsisiga.

⁸ Jandi agunyensa ngombi osusa biduaru biandi na jaʼ beni wandi obuila; oba muinsi te na tsisiga.

⁹ Agugaa na muinsi ogukiga mabufu na oyemasunsa o tsomu dimbu va mbura jiwelimina; mosuegulu dibuli dibaIsrael, mosulu mu mamba uvaga mamba maduliomusu. Mavu mamba mautsindula dibumi.

¹⁰ Jandi agugukiga mabufu mangombi osusa biduaru biandi, oba muinsi te na tsisiga, uba mugaga umutubu ubaIsrael na ubenyi abetsani nogu wandi.

Migaga miduliomusu

¹¹ Jandi agubemba mfumbi yika la mfumbi oba muinsi te na yisambuali yibilumbu.

¹² Oketsatsa mamba meni mu yilumbu ayimurieru na ayimusambuali, oba ulioma; tumba pa agokeliomisa mu yilumbu ayimurieru na ayimusambuali, agoba ulioma.

¹³ Jandi agubemba mfumbi jidibaala yika la dibaala pa agokeliomisa ebivisi Ndagu Yibenguna, jandi guna ogusulu va gari baIsrael. Mamba maduliomusu masamamutsatsu la dibandu avu muinsi, muinsi eni uvu nandi.

¹⁴ Guluanu migaga misusu: Pa mutu ofu o gari ndagu jitsanda, mutu uotsu agukota o gari ndagu eni na uotsu agurasunu o gari ndagu eni oba muinsi te na yisambuali yibilumbu.

¹⁵ Mbiji jiotsu ajivu jalala ajigaa na yidibutsu abivu o gari jionyi bivu muinsi.

¹⁶ Mutu uotsu aguvu o musiru agubemba mutu agumaboku vo agumafu dutangi vo bivisi bimutu vo ngila oba muinsi te na yisambuali yibilumbu.

¹⁷ Bobongila aguvu na muinsi mabufu na ngombi jiutsindula dibumi ajimanyensu na bomasobana na mamba mayileka.

¹⁸ Mutu ulioma obonga bitsafinyi biyisopa obiputiga mu mamba; mbana otsatsa ndagu jitsanda aji mutu amafuila na bisalulu biotsu na batu abavu vana nesi jandi agumabemba bivisi vo mfumbi jimutu agumabokii vo mfumbi ajimafu dutangi vo ngila.

¹⁹ Jandi aguvu ulioma otsatsa aguvu muinsi yilumbu ayimurieru na ayimusambuali. Mu yilumbu ayimusambuali osusa biduaru biandi na jaʼ beni wandi obuila; mbana ava tsisiga eni oba ulioma.

²⁰ Dibaala adiuba muinsi na agokeliomisa ogusulu va gari dibuli mu mbari amasumuna Mbura Nsambi jiFumu; mambu maduliomusu masamamutsatsu, avu muinsi.

²¹ Aguna uba mugaga ubaIsrael te na mutubu. Jandi agutsatsa mamba maduliomusu osusa biduaru biandi na agubemba mamba maduliomusu oba muinsi te na tsisiga.

²² Yima yiotsu ayi aguvu na muinsi obemba yiuba muinsi na mutu uotsu agumubemba oba muinsi te na tsisiga.