Dutalu 18 - La Sainte Bible en Langue Yipunu

¹ Fumu aniatsingula Aaron rie: Jenu na baana bagu bababaala na bisi ndagu jitaji agu duwarila mukilu umabi amamavagu o Mbura Nsambi; jenu na baana bagu bababaala duwarila mukilu umabi amamavagu mu yisalu yienu yibuvagulitsi bupagu.

² Bambasana yifumba yiLevi ayivu yifumba yitaji agu: jogu bofubana nagu na bogusalila wandi ava jenu na baana bagu bababaala dubila o Ndagu Yibenguna.

³ Jogu bokelisanga ama ndeju gubarumanga na motsu maNdagu Yibenguna; bayabambana na bisalulu biyingitsi biMbura Nsambi nesi na yinyensulu yipagu mu mbari jenu botsu dukefu.

⁴ Jogu bofubana o tsi duruma duagu na bokelisa motsu mabisalu biNdagu Yibenguna. Mutu ususu ayabambana nenu.

⁵ Jenu dukelisanga mambu maMbura Nsambi na mayinyensulu yipagu yiri baIsrael bagomuenyogulu kabu.

⁶ Labanu, nyimabongila baana bataji benu, bisi Levi va gari baIsrael: bavu abami, bamaduvegu nderi pagu udusalila o Ndagu Yibenguna.

⁷ Ndeʼ Aaron jenu na baana bagu bababaala dukelisanga yisalu yienu yibuvagulitsi bupagu na motsu mayinyensulu yipagu na maMbura Yingitsi na motsu amavu o nsima dumbu dudugabu: ayina la yisalu ayi dusalanga. Nyiduveyi yisalu yibuvagulitsi bupagu ayivu tindi yisalu yienu. Muenyi aguyibambana aboku.

Abi bavagulitsi bapagu bodila

⁸ Fumu amatsingula Aaron rie: Nyiguveyi yisalu yipagu tsiotsu atsi baIsrael bekusulilingi na tsiotsu atsi bensambuli; nyutsivega ombu gagu nombu baana bagu bababaala te na bategula bagu; uvu mugaga umutubu mu mbari dumabiatsu.

⁹ Bima bitindi yingitsi abigosielusunu mu muji abiuba abiagu abibi: pagu tsiogu tsiotsu tsimbela atsi bopagulila, bima bieni abivu tindi yingitsi biuba bienu, jenu na baana bagu bababaala.

¹⁰ Dubiji va Mbura Ajivu Tindi Yingitsi, yika babaala bobiji mu mbari bivu tindi yingitsi.

¹¹ Tsiyisa abiuba abiagu: pagu tsiotsu atsi baIsrael bosambula noviunsa yiari na yiari nyiguveyi tsionyi na baana bagu bababaala na babagetu, uvu mugaga umutubu. Uotsu aguvu ulioma o ndagu agu orungula utsiji.

¹² Nyiguveyi biumanga abi bovagulila Fumu: biotsu biboti bimatsi na biotsu biboti bimienga na bitsangu tsible.

¹³ Biotsu biumanga abi bodila mu manungi mogu abi bobega ombu Fumu biuba biagu. Mutu uotsu aguba ulioma o ndagu agu orungula ubiji.

¹⁴ Biotsu abiuvegu na mugeli na baIsrael biuba biagu.

¹⁵ Tsomi tsiotsu atsi bovagulila Fumu nesi tsibatu nesi tsibibulu tsiuba tsiagu. Dimosi buandi, gukobula tsomi tsibatu na gukobula tsomi tsibibulu bimuinsi.

¹⁶ Gukatsikobula ubanda na tsungi mosi nana guilabili divu diwelimina, dufunu duvu mbongu yiranu dedi mosi na mbongu tsiMbura Nsambi, utsira utsionyi uvu yigumi yigarama.

¹⁷ Tumba guyakobula tsomi tsibangombi nesi tsibindombu nesi tsibinsabi; bivu yingitsi. Gutsatsa malungu mogu va yinyensulu yipagu na gunyensa matsi mogu. Atsina tsiuba pagu atsiusielusunu na muji, atsiugulunu mbunga jiboti ombu Fumu.

¹⁸ Nyama tsiogu tsiuba tsiagu, diwendi rie: tulu ajimaviunsu yiari na yiari na yiasi yikori ayimabaala.

¹⁹ Nyiveyi tsionyi ombu gagu nombu baana bagu bababaala na babagetu, uvu mugaga umutubu na pagu tsiotsu atsi baIsrael bosambulanga ombu Fumu. Jivu pangini jiFumu ajigokubulu te na mutubu nesi jijenu na baana bagu te na bategula bagu.

²⁰ Fumu amatsingula Aaron rie: Gugobialila disiala o bulongu buogu na gugodila dikabu ombu gogu; menu nyivu dikabu diagu na disiala diagu va gari baIsrael.

Abi bisi Levi bodila

²¹ Yimosi mu yigumi yiotsu yibaIsrael nyiyiveyi ombu bisi Levi mu diambu diyisalu ayi besalingi, diwendi rie: yisalu yiNdagu Yibenguna.

²² BaIsrael bagomuebambananga na Ndagu Yibenguna yiri bakevaga disumu na bekefu.

²³ Bisi Levi bosalanga yisalu yiNdagu Yibenguna, jogu bowarila mikilu mimabi mogu. Uba mugaga umutubu te na kula tsienu tsiotsu; jogu bagodila ne disiala dimosi ombu baIsrael.

²⁴ Tumba nyiveyi disiala ombu bisi Levi, diwendi rie: yimosi mu yigumi abi baIsrael bogusulila nosambula Fumu. La dibandu nyitubulili yiri bagodila ne disiala dimosi ombu baIsrael.

²⁵ Fumu amatsingula Moise rie:

²⁶ Gukatsingula bisi Levi rie: Ava dudilila yimosi mu yigumi yibaIsrael ayi nyiduveyi yiuba yienu, jenu wenu dugusula dikabu dienu uvagulila Fumu, diwendi rie: yimosi mu yigumi yiyimosi mu yigumi;

²⁷ yionyi yiuba pagu tsienu tsible ajimasambulu na jimienga amimabongulu mu nsienga.

²⁸ Anana dugusulilanga pagu tsiFumu mu yimosi mu yigumi yiotsu ayi dudililanga ombu baIsrael na duvega pagu atsi dugusulila Fumu ombu Aaron muvagulitsi upagu uFumu.

²⁹ Mu miensili miotsu ami dudilanga dugusulilanga Fumu pagu tsiandi, dukagusula abivu biwelimina, dikabu dieni diuba yingitsi.

³⁰ Gukabatsingula rie: Ava dugusulila abiboti yimosi mu yigumi yiuba yibisi Levi nderi atsimabongulu o yisagulu na amimabongulu mu nsienga.

³¹ Ava dubiji mbura yika la mbura, jenu na bisi ndagu agu mu mbari ajina jivu futa enu mu yisalu ayi duisalili o Ndagu Yibenguna.

³² Dunogusula abiboti duna musuga ubiji, dugevayi dibi, dugelensi pagu tsiNsambi tsibaIsrael, kabogu dugofu.