Dutalu 17 - La Sainte Bible en Langue Yipunu

Bisunsulu bimuji biCore na bambatsi bandi

¹ Fumu amatsingula Moise rie:

² Tsingula Elazar muana dibaala uAaron, muvagulitsi upagu rie: Agusuli bisunsulu bimuji o muji eni nopansa muji yiari na yiari mu mbari bionyi bivu biyingitsi.

³ Mu diambu dibisunsulu bimuji biyingitsi bibatu beni abamavaga masumu amamabarombisa dufu, babituli uvaga yikubugulu yiyinyensulu yipagu; bionyi biuba yirangumunu ulubusa baIsrael.

⁴ Elazar muvagulitsi upagu amabonga bisunsulu bimuji bikunga bi-abamanyensu mbisu; amabitula yikubugulu yiyinyensulu yipagu.

⁵ Ayina yivu yirangumunu ulubusa baIsrael yiri ne muenyi mosi uyifumba yiAaron ayabambana uvagula bima bimbunga jiboti ombu Fumu; ayaba nana Core na nana batu bandi, anana Moise amavosila Fumu.

BaIsrael utata betatili Moise na Aaron

⁶ Kedi jineni dibuli diotsu dibaIsrael dimatatila Moise na Aaron rie: Dumabokisa batu baFumu.

⁷ Dibuli dimamuegukama ombu Moise na Aaron; ava bamagengilila o yiari yiNdagu Yibenguna, dimungi dimabakubiga na bundumba buFumu bumalabana.

⁸ Moise na Aaron bamatola va gusu Ndagu Yibenguna.

⁹ Fumu amatsingula Moise rie:

¹⁰ Kakananu na dibuli dieni, nyusundila ubasielasana. Moise na Aaron bamagudama va tsi.

¹¹ Moise amanima Aaron rie: Bonga yisunsulu yimuji, sunsa muji uyinyensulu yipagu muna, sunsa bima bimbunga jiboti muna wandi, lensa nowenda ombu dibuli uyeditsindulila dibumi; kabu jiFumu jimaranga, yivunga yimabanda.

¹² Aaron amabonga yisunsulu yimuji nana Moise amamurumina na amawenda mbangu ombu dibuli; amalaba yiri batu beni bamabanda ugaangu na yivunga. Amavagula bima bimbunga jiboti na amatsindulila batu dibumi.

¹³ Amaretsama va gari bamfumbi na abakivu monyu; vana vana yivunga yimavioga.

¹⁴ Dutalu dubatu abamaboku na yivunga yieni dumaba yigumi na tosini jina na yisambuali yikama tsibatu, tsiri utala abamafu mu diambu diCore.

¹⁵ Aaron amagabuga ombu Moise o dikotulu diNdagu Yibenguna. Yivunga yimavioga.

Nguangu jiAaron

¹⁶ Fumu amatsingula Moise rie:

¹⁷ Tsingula baIsrael rie: Mukuta mukuta baguveyi nguangu jiyivunda yiogu, diwendi rie: yigumi na manguangu mabeji ama baana babasefu bamandagu boguvega.

¹⁸ Gukasona diina dimukuta mukuta muna nguangu andi na gukasona diina diAaron mu nguangu jiLevi; mu mbari voba nguangu mosi jiyivunda yimukuta mukuta.

¹⁹ Gukamakotisa o Ndagu Yibenguna va gusu yigara yipangini va mbura aji nyibengunini nenu.

²⁰ Dibaala adi nyusola diuba jandi agu nguangu andi jiubenda, mbana nyuvotsa mitatu miotsu mibaIsrael ami bedutatili.

²¹ Moise amavosa na baIsrael na baana bogu botsu babasefu; mutu mutu amamuvega nguangu andi, diwendi rie: muna mikuta mibataji bogu, kabogu mamaba yigumi na manguangu mabeji; nguangu jiAaron jimaba va gari manguangu mogu.

²² Moise amasunsa manguangu motsu va gusu Fumu o gari Ndagu Yibenguna.

²³ Kedi ava Moise amakotila o Ndagu Yibenguna amalaba yiri nguangu jiAaron jimukuta uLevi jimawansa na jimapalisa magumba amamapasiga te na miamandi mimawela.

²⁴ Moise amagusula manguangu motsu va gusu Fumu na amamabega ombu baIsrael botsu yiri bomalaba na yiri mutu mutu obonga nguangu andi.

²⁵ Fumu amaruma Moise rie: Gabusa nguangu jiAaron o Ndagu Yibenguna, jionyi jiukelusu nana yirangumunu ombu mimbini yiri guvotsa mitatu miogu va gusu ami na bagomuefu.

²⁶ Anana Moise amavayila, amaduka diruma adi Fumu amamuruma.

Bisaiu bibavagulitsi bapagu na bibisi Levi

²⁷ BaIsrael bamatsingula Moise rie: Laba jetu ubungana tuibungini, tumatsiemuga, nyiina, jetu botsu tumatsiemuga.

²⁸ Uotsu agubambana na Ndagu Yibenguna afu! Diwelimina yiri jetu botsu tubungana?