Dutalu 13 - La Sainte Bible en Langue Yipunu

Moise usindiga esindiyi babaala uyesieenga bulongu buCanaan

¹ Fumu amatsingula Moise rie:

² Sindiga babaala uyesieenga bulongu buCanaan abu nyiveyi ombu baIsrael. Gukasindiga dibaala dimosi mu kadi yifumba; botsu boba yika bivunda na bivunda.

³ Ava bamabila o Paran Moise amasindiga babaala abamaba bivunda biIsrael uyesieenga bulongu.

⁴ Miina mogu amama: Mu yifumba yiRuben, Chammoua muana dibaala uZakour;

⁵ Mu yifumba yiSimeon, Chafat muana dibaala uHori;

⁶ Mu yifumba yiJuda, Caleb muana dibaala Yefounne;

⁷ Mu yifumba yiIssakar, Igal muana dibaala uJoseph;

⁸ Mu yifumba yiEfraim, Hosee muana dibaala uNoun;

⁹ Mu yifumba yiBenjamin, Palti muana dibaala uRafou;

¹⁰ Mu yifumba yiZabulon, Gaddiel muana dibaala uSodi;

¹¹ Mu yifumba yiJoseph na mu yifumba yiManasse, Gaddi muana dibaala uSoussi;

¹² Mu yifumba yiDan, Ammiel muana dibaala uGuemali;

¹³ Mu yifumba yiAsser, Setour muana dibaala uMikael;

¹⁴ Mu yifumba yiNeftali, Nabi muana dibaala uVofsi;

¹⁵ Mu yifumba yiGad, Gouel muana dibaala uMaki.

¹⁶ Amana la miina mababaala aba Moise amasindiga uyesieenga bulongu. Moise amaluga Hosee muana dibaala uNoun diina diJosue.

¹⁷ Moise amabasindiga uyesieenga bulongu buCanaan. Amabatsingula rie: Vioyilanu o yiari yitandu na dukayemata o julu mukongu.

¹⁸ Dulaba nana bulongu bueni buvu na dujaba batu abavu guna; pa bavu na mangolu maneni vo bavu badeda; pa bavu mua dutalu dugeyi vo duneni.

¹⁹ Dujaba nana bulongu abu betsanini buvu; yeri buboti vo bubi na nana misiengi ami betsanini mivu; pa migaa mikandu vo pa mivu mikandu.

²⁰ Dujaba nana butamba buvu; pa buvu bunyega vo pa bugaa bunyega; pa buvu na miri vo pa bugaa na miri. Duyaba na mirima o julu, beganu milunda mibulongu bueni. Jimaba temu jiumanga mirayisan.

²¹ Babaala beni bamawenda na bamayesieenga bulongu ubandila o kumu jiTsin te no Rehob muna nsila jiHamat.

²² Bamavioyila o yiari yitandu na bamatola te no Hebron agu baAnac abavu mikuimbi betsanini. Miina mogu: Ahiman na Chechai na Talmai. (Hebron umarungu yisambuali yibilima nesi Soan ukarungu o Egypte.)

²³ Bamatola o yibususu yiEchekol agu bamatabulila yisaga yimirayisan; babeji bamayibeganga mu nguangu; bamabega na migeranada na mifiga wandi.

²⁴ Bamaluga mbura eni diina diyibususu yiEchekol, divindugulu rie: yisaga, mu diambu diyisaga yirayisan ayi baIsrael bamatabula vana.

Abamasindugu na Moise uvosa bevosi misamu

²⁵ Banomana usieenga bulongu mu magumana mabilumbu bamayenagabuga.

²⁶ Ava bamagabuyila bamawenda ombu Moise na Aaron na dibuli diotsu dibaIsrael o Cades o kumu jiParan. Bamabatsingula misamu na bamabalasa milunda mibulongu bueni.

²⁷ Ami bamatsingula Moise amimi rie: Jetu tumatola o bulongu abu gumatusindiga. Dingensa bulongu bueni buvu na digumba dineni; laba nesi milunda ami tutsigubeyila.

²⁸ Tumba batu abetsani o bulongu bueni bavu na tindi mangolu; misiengi miogu mivu mineni na mikandu; tutsilaba nesi baAnac abavu mikuimbi.

²⁹ Bisi Amalec betsani o yiari yitandu; baHitt na baJebusie na baAmor betsani o mikongu; bisi Canaan betsani o mugula umubu na uJourdain jiotsu.

³⁰ Caleb amavotsa batu abamatatilanga Moise, amagamuga rie: Tʼwendianu o bulongu bueni tuna mangolu ubudila.

³¹ Tumba bambatsi baCaleb bamavosa rie: Tugorungula uwenda noyetoga na batu beni mu mbari betuviolili mangolu!

³² Bamapupisa mirima mibaIsrael na misamu mibulongu bueni abu bamayesieenga. Bamavosa rie: Bulongu abu tumayetsiengila nobusieenga buvu bulongu abuitsiemusi batu; botsu aba tutsiyelaba bavu batu basakama.

³³ Tutsilaba nesi mikuimbi, bategula baAnac abavu mu yifumba yimikuimbi: tutsikelaba va misu mogu nderi makokoku.