Dutalu 12 - La Sainte Bible en Langue Yipunu

Miriam amanamu nyambi

¹ Moise amawela mugetu umuisi Ethiopie. Miriam na Aaron bamagela Moise mu diambu dimugatsi andi.

² Bamawivula rie: Je Fumu evosi yika na Moise? Agevosi netu wandi? Fumu amadigulu.

³ Moise amaba na tindi pugu uviolila babaala botsu va butamba.

⁴ Fumu amasundila uruma Moise na Aaron na Miriam rie: Jenu barieru, wendanu o Ndagu Yibenguna. Jogu botsu barieru bamawenda guna.

⁵ Fumu amasunduga va gari dimungi na amasikama va dikotulu diNdagu Yibenguna, amanengila Aaron na Miriam. Botsu babeji bamakueka ombu gandi.

⁶ Mbana amavosa rie: Guluanu mambu mami na buranga! Menu Fumu nyilabini na mubiyitsi la mubiyitsi; nesi mu yiriariamu nesi mu mandosi.

⁷ Tumba digaa nana na musalitsi ami Moise aguisali yisalu yiami na usigama.

⁸ Tuivosisini na nyikelasa ombu gandi kiakiaki, jandi endabi nana nyivu. Kabogu dibandu yi dusamalabila goma ugela musalitsi ami Moise?

⁹ Fumu amabanyoyila kabu jineni mbana amayenawenda.

¹⁰ Dimungi dimagusuga va julu Ndagu Yibenguna. Vana vana Miriam amanamu nyambi jidugugusa. Aaron anogeluga amalaba yiri Miriam amanamu nyambi.

¹¹ Aaron amatsingula Moise rie: Kokolu tsiagu, guyatukilisa mukilu aguvu uwelimina na buduka buetu. Tuna mbela.

¹² Kokolu tsiagu, Miriam ayaba nana muana agumaburu ufu kala, agu nyuru tsiandi tsimafubila kala.

¹³ Moise amagamuyila Fumu rie: Kokolu tsiagu Nsambi, mubelusi!

¹⁴ Fumu amawagula Moise rie: Pa taji andi amamufuta mateji, agolasu yisonyi te na yisambuali yibilumbu? Abegu wandi pinsa, o tsomu dimbu; mbana agabusu o mulaku.

¹⁵ Miriam amabegu o tsomu dimbu te na yisambuali yibilumbu; batu basamawenda mbura te na Miriam amagabusu.

¹⁶ Adina dinovioga batu bamagusuga va Hasserot na bamayevaga milaku o kumu jiParan.