Dutalu 11 - La Sainte Bible en Langue Yipunu

BaIsrael o Tabera

¹ Yilumbu yimosi baIsrael bamatatila Fumu. Ava Fumu amagululu mitatu miogu kabu andi jimamata; muji uFumu umabalulila na umanyensa kodu mosi jimilaku.

² Batu bamagamuyila Moise. Moise amasambila Fumu na muji umatsima.

³ Bamaluga mbura eni diina diTabera, divindugulu rie: kangi; avana muji uFumu umabalulila.

BaIsrael utsunda betsundi nyama

⁴ Bisi malongu masusu abamatsana va gari baIsrael bamanyungila biguji; nesi baIsrael bamabanda ulila nowivula rie: Anyi otuvega nyama?

⁵ Tuirangimini nyama tsimamba atsi tumajanganga o Egypte, atsi tusamasumba. Na kokombura na melon na puaro na banyonda na layi.

⁶ Mangolu metu mamasuka: tuisaa na yima. Tuilabi yika manna.

⁷ Manna jimabagunu na tsangu tsigeyi tsivema.

⁸ Batu bamapansiga uyenajibola; bamajinyiganga na bamajirokanga; na bamajilambanga na bamavaganga mapa mageyi na jionyi. Jimaba na mugangu umapa mageyi amamalambu na matsi.

⁹ Ava disala dimakukumuyilanga mukolu va milaku, avana wandi manna jimabonduyilanga.

¹⁰ Moise amagulu baIsrael ulila belili, mutu mutu na mukuta andi va dikotulu dindagu andi jitsanda. Kabu jiFumu jimaranga tindi uranga na Moise amalaba munyongu.

¹¹ Kabogu amawivula Fumu rie: Dibandu yi guindasili maguga? Dibandu yi gugendasili maboti magu? Dibandu yi gumapeyila mufuna ukelisa batu bebaba?

¹² Je meʼ nyivu dibandu dibatu bebaba? Je meʼ nyimababura? Diuleba guitumi rie: Balelingi nana mubusi elelilingi muana agu enuisi te na botola o bulongu abu gumavangana pangini uvega ombu bataji bogu?

¹³ Agunyi nyudilila nyama uvega batu bebaba? Bendililingi na bepondi rie: Tuveyi nyama!

¹⁴ Meʼ beni ngorungula uwendisa batu bebaba; ubawendisa uvu tindi mufuna.

¹⁵ Kokolu mboki! Ngerondi ulaba purulu tsimunongu egugu. Pa guilabi ubueji nami kusulili purulu tsiami.

¹⁶ Fumu amaruma Moise rie: Gukiga magumidusambuali mabivunda biIsrael, abi ndeʼ beni guilabi bavu tindi bivunda na abivu na tindi musuga; babeyi o Ndagu Yibenguna, agu duba dukunsama va gusu ami.

¹⁷ Nyusunduga na avana nyuvosila nagu; nyukabula Yinyunyi ayivu nagu nobagabila wandi yiri jogu bowarila mufuna ubatu bebaba va mosi nagu.

¹⁸ Gukaruma batu rie: Keliomisanu! Mugesa duji nyama mu mbari dumalilila Fumu ava dumawivulila rie: Anyi otulisila nyama? O Egypte tumaba sui. Kabogu Fumu oduvega nyama ujanganga.

¹⁹ Dujanganga nyama tsiri mu yilumbu yimosi nesi bilumbu bibeji nesi biranu nesi yigumi nesi magumabeji mabilumbu,

²⁰ tumba dujanganga nyama te na tsungi jimfuimbila te na duviosulila ugukuru na dugomuerungula ugengila ne ugengila nyama mu mbari jenu beni dumaliyila Fumu aguvu va gari enu nsima ava dumamulilila nowivula rie: Dibandu yi tumagusuyila o Egypte?

²¹ Moise amavosa rie: Batu abavu nami bavu kama yisiamunu tsitosini na guivosi rie: Nyubavega nyama atsi bojanganga te na tsungi jimfuimbila?

²² Bindombu na binsabi na bangombi biuboku yiri bobanganga na nyama tsiwelimina? Vo nyama tsiotsu tsimubu tsiubagukugulu yiri bobanganga na tsiwelimina?

²³ Fumu amawivula Moise rie: Je dikaka diami divu difurama? Gulaba pa adi nsigutsingula diulabana vo digolabana.

Nsambi ugabila egabili magumidusambuali mabivunda Yinyunyi yiandi

²⁴ Moise amapala na amayetsingula batu misamu miFumu mbana amagukiga magumidusambuali mabivunda biIsrael na amabatsiengisa Ndagu Yibenguna.

²⁵ Fumu amasunduga va gari dimungi na amavosa na Moise. Amakabula Yinyunyi ayimaba nandi na amayigabila magumidusambuali mabivunda. Yika bedili Yinyunyi bamabiga; basamamuebiganga va julu vana.

²⁶ Vamaba babaala babeji, dimosi diina diandi Eldad, disusu diina diandi Medad, jogu bamasiala va milaku; jogu wogu bamadilila Yinyunyi mu mbari bamaba mu dutalu duabamasonu, jogu wogu bamabiga va milaku mu mbari basamawenda o Ndagu Yibenguna.

²⁷ Mufudu amawenda mbangu uyelubusa Moise rie: Eldad na Medad ubiga bebiyi o milaku.

²⁸ Josue muana dibaala uNoun, musalitsi uMoise ubanda va bungebi buandi, amavosa rie: Moise, fumu ami bagubitsi!

²⁹ Moise amamuwivula rie: Guwavila guikwavili? Mbe ka menu diwelimina yiri batu baFumu botsu babiyingi na Fumu abagabili Yinyunyi yiandi!

³⁰ Moise na magumidusambuali mabivunda biIsrael bamagusuga va milaku.

BaIsrael udila bedili banguali o Quibrot-Taava

³¹ Fumu amavotsa punga jineni ajimaruyila o mubu ajimabega banguali abamabasa yiari na yiari bimilaku abamaba murutsu umetera mosi.

³² Yilumbu yieni yiotsu ayimubeji batu bamarelama uyenabolanga banguali; ne jandi agumabola mua pesu amadila yigumi yibietsu, bamayenabawanyiganga va milaku yiari na yiari.

³³ Mbe baki na nyama mu miunu miogu Fumu amabanyoyila kabu jineni na Fumu amabanamusu yivunga yineni.

³⁴ Bamaluga mbura eni diina diQuibrot-Taava, divindugulu rie: mangila madunyungi; avana bamatsiyila batu abamanyungila biguji.

³⁵ BaIsrael bamarambuyila va Quibrot-Taava na bamawenda o Hasserot na bamayevaga milaku.