Dutalu 1 - La Sainte Bible en Langue Yipunu

BAISRAEL O KUMU JISINAI Sansama jitega jibifumba biIsrael

¹ Fumu amavosa na Moise o kumu jiSinai ava amabila o Ndagu Yibenguna mu yilumbu yitega yitsungi ajimubeji yiyilima yimubeji, yiotsu ayi bamapalila o Egypte.

² Amavosa rie: Vaganu sansama jidibuli diotsu dibaIsrael; jenu na Aaron dukabasansama muna bifumba na muna mikuta mibataji bogu;

³ dukavaga sansama jibabaala ubanda na jogu abakavu na magumabeji mabilima, babaala botsu baIsrael abavu na mangolu utoga divita.

⁴ Vabi yivunda yimosi yikadi yifumba, diwendi rie: yivunda yindagu bataji bandi.

⁵ Guluanu miina mababaala aboba nenu: mu ndagu jiRuben: Elissour muana dibaala uChedeour;

⁶ mu ndagu jiSimeon: Cheloumiel muana dibaala uSourichaddai;

⁷ mu ndagu jiJuda: Nachon muana dibaala uAmminadab;

⁸ mu ndagu jiIssakar: Netaneel muana dibaala uSouar,

⁹ mu ndagu jiZabulon: Eliab muana dibaala uHelon;

¹⁰ mu ndagu jiEfraim: muana dibaala uJoseph: Elichama muana dibaala uAmmihoud; mu ndagu jiManasse: muana dibaala uJoseph: Gamliel muana dibaala uPedassour;

¹¹ mu ndagu jiBenjamin: Abidan muana dibaala uGuidoni;

¹² mu ndagu jiDan: Ahiezer muana dibaala uAmmichaddai;

¹³ mu ndagu jiAsser: Paguiel muana dibaala uOkran;

¹⁴ mu ndagu jiGad: Eliassaf muana dibaala uDeouel;

¹⁵ mu ndagu jiNeftali: Ahira muana dibaala uEnan,

¹⁶ Amana la miina majogu abamanengulu o yibenguna, bivunda bimikuta mibataji bogu na bivunda bibatosini baIsrael.

¹⁷ Moise na Aaron bamanengila yigumi na babaala beni babeji abamasolu,

¹⁸ na bamanengila dibuli diotsu mu yilumbu yitega yitsungi ajimubeji. Bamabasona muna mikuta mikuta na muna mandagu mabataji bogu na miina mogu ubanda na abakavu na magumabeji mabilima.

¹⁹ Moise amavaga sansama o kumu jiSinai nana Fumu amamurumina.

²⁰ Bamasona miina mabaana bababaala baRuben, tsomi jiIsrael; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

²¹ Babaala bayifumba yiRuben abamasansumu: magumana na tosini yisiamunu na kartia yiranu.

²² Bamasona miina mabaana bababaala baSimeon; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamabana mangolu utogadivita.

²³ Babaala bayifumba yiSimeon abamasansumu: magumaranu na yifu yitosini na kama yirieru.

²⁴ Bamasona miina mabaana bababaala baGad; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

²⁵ Babaala bayifumba yiGad abamasansumu: magumana na tosini yiranu na kama yisiamunu na magumaranu.

²⁶ Bamasona miina mabaana bababaala baJuda; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

²⁷ Babaala bayifumba yiJuda abamasansumu: magumidusambuali na tosini jina na kama yisiamunu.

²⁸ Bamasona miina mabaana bababaala baIssakar; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

²⁹ Babaala bayifumba yiIssakar abamasansumu: magumaranu matosini na tosini jina na kama jina.

³⁰ Bamasona miina mabaana bababaala baZabulon; na mikuta miogu na mandagu mabataji bogu; bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

³¹ Babaala bayifumba yiZabulon abamasansumu: magumaranu na yisambuali yitosini na kama jina.

³² Bamasona miina mabaana babaala baJoseph; baana bababaala baEfraim na mikuta miogu na mandagu mabatji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

³³ Babaala bayifumba yiEfraim: magumana matosini na kama yiranu.

³⁴ Bamasona miina mabaana bababaala baManasse; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

³⁵ Babaala bayifumba yiManasse: magumarieru na tosini beji na kama beji.

³⁶ Bamasona miina mabaana bababaala baBenjamin; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

³⁷ Babaala bayifumba yiBenjamin abamasansumu: magumarieru na tosini yiranu na kama jina.

³⁸ Bamasona miina mabaana bababaala baDan; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

³⁹ Babaala bayifumba yiDan abamasansumu: magumasiamunu na tosini beji na yisambuali yikama.

⁴⁰ Bamasona miina mabaana bababaala baAsser; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

⁴¹ Babaala bayifumba yiAsser abamasansumu: magumana na tosini mosi na kama yiranu.

⁴² Bamasona miina mabaana bababaala baNeftali; na mikuta miogu na mandagu mabataji bogu, bamatala babaala ubandila na jogu abamaba na magumabeji mabilima, jogu botsu abamaba na mangolu utoga divita.

⁴³ Babaala bayifumba yiNeftali abamasansumu: magumaranu na tosini yirieru na kama jina.

⁴⁴ Abana aba Moise na Aaron bamasansama na yigumi na bifumba bibeji biIsrael, mutu mutu amasansama mukuta andi.

⁴⁵ Anana baana bababaala botsu baIsrael bamasansimina mutu mutu mukuta andi, ubandila na magumabeji mabilima, baIsrael botsu abamaba na mangolu utoga divita.

⁴⁶ Abamasansumu: kama yisiamunu na tosini yirieru na kama yiranu na magumaranu.

Yisalu yibisi Levi buandi

⁴⁷ Bisi Levi na mikuta mibataji bogu basamasansumu muna sansama eni.

⁴⁸ Fumu amatsingula Moise rie:

⁴⁹ Guyasansama bisi Levi na guyabasobana mu dutalu dubaIsrael.

⁵⁰ Wakisa yisalu yiNdagu Yibenguna ombu bisi Levi na bisalulu bijionyi na biotsu bisusu wandi. Bonangulanga Ndagu Yibenguna na bisalulu bijionyi biotsu; bosalanga bisalu na bovaganga milaku yiari na yiari biNdagu Yibenguna.

⁵¹ Pa vengu Ndagu Yibenguna jiuvinga mbura, bisi Levi bojipansa; ava Ndagu Yibenguna jiurangimina, bisi Levi bodivaga. Muenyi agubambana na jionyi aboku,

⁵² BaIsrae! bovaganga milaku mutu mutu va mbura andi, mutu mutu bebeli na yilimbu yiandi, muna mabuli mabuli.

⁵³ Bisi Levi buandi bovaganga milaku yiari na yiari yiNdagu Yibenguna yiri ngonyoyila dibuli dibaIsrael; bisi Levi bokelisanga Ndagu Yibenguna.

⁵⁴ BaIsrael bamavaga motsu nana Fumu amarumina Moise.