Dulasu 9 - La Sainte Bible en Langue Yipunu

¹ Mbana yiansa ayimuranu yimasiga mumbanda andi. Nyimalaba mbuelili mosi ajimabonduyila o julu va butamba ajimadila tsafi jimbengi.

² Mbuelili jimadibula mbengi na nsumbili jimapala nderi nsumbili kangi; wisi na julu bimapindusu na nsumbili eni.

³ Makokoku mamapalila o gari nsumbili na mamabasa butamba; mamavegu mangolu nana mangolu mabakuru.

⁴ Mamalubusu rie: Duyabivisa biriri, nesi miri nesi bivaru. Duna musuga yika ombu batu abasakasonu va mambami.

⁵ Makokoku masamavegu musuga uboka batu, yika ubalasa maguga te na tsungi yiranu. Buali abu batu beni bamagulungu bumaba nderi buali abu mutu egulu ava egakulu na kuru.

⁶ Te na tsungi yiranu batu beni boba na nsala ufu tumba bagolefu.

⁷ Makokoku meni mamabagunu na bakabala abamatsonsama utoga divita. Mamaduara kaba nderi atsilora na binsi biogu bimaba nderi bibabaala.

⁸ Nanga tsiogu tsimaba nderi tsibagetu na minu mogu mamaba nderi mabimbungu.

⁹ Tulu tsiogu tsimadibugu na yima ayimabagunu na bikutu bimadilu na nduku tsimapapi mogu tsimaba nderi nduku tsimakalu amewendusu na bakabala bapuela o divita.

¹⁰ Mamaba na bapilibinsi nana bakuru na tsionyi tsimabavega mangolu ulasa batu maguga te na tsungi yiranu.

¹¹ Kaga ogu la yiansa oyikelisi mbengi mu mbembu Hebreu diina diandi: Abaddon na mu mbembu Grecdivu rie: Apollyon. (Divindugulu rie: Mubungitsi.)

¹² Dibi ditega dimavioga mbana vakivu mabeji amoruga.

¹³ Mbana yiansa ayimusiamunu yimasiga mumbanda andi. Nyimagulu diufi adimapalila va bitungu bina biyinyensulu yipagu yilora ayimaba va gusu Nsambi.

¹⁴ Dimavosa na yiansa ayimusiamunu ayimaba na mumbanda rie: Nyangula biansa bina abivu bikapu mu mujamba uneni uEuphrate.

¹⁵ Biansa bina bimanyangulu; batu bamagabu makabu marieru na biansa bimaba bikunsama uboka dikabu dimosi muna diweru ditsungi jiyilima yieni ayimasolu.

¹⁶ Nyimagulu durangu dubabeyitsi babakabala badivita: dumaba kama beji tsibivevi.

¹⁷ Mbana mu yiriariamu yiami nyimalaba bakabala na babeyitsi; babeyitsi bamaduara bikutu va tulu tsiogu abimaba bibenga nana muji na bidumbulu nana safira na bisiemu nana fula. Miuru mibakabala mimabagunu nana miuru mibimbungu; muji na nsumbili na fula bimapalila o gari miunu miogu.

¹⁸ Batu bamagabu makabu marieru na dikabu dimosi dimaboku na bidungu, diwendi rie: muji na nsumbili na fula abimapalila o miunu mibakabala.

¹⁹ Mangolu mabakabala mamapalila o miimu miogu nesi miyila miogu mibagunu na banyoga ami bamasalisa ulasa batu maguga.

²⁰ Botsu basusu abasamaboku na bidungu basamakalula diela. Basamadunda uyitsa bayisi nesi bakosi bamunongu na munongu, diwendi rie: bakosi balora na balora jivema na bangunga na bamiri abasamarungula ulaba vo ugulu vo uwenda.

²¹ Basamadunda bukongu buogu nesi mavanda mogu nesi buvuyisa buogu nesi udaga uogu.