Dulasu 7 - La Sainte Bible en Langue Yipunu

Kama na magumana na tosini jina tsibatu baIsrael

¹ Mbana nyimalaba biansa bina, yiansa yiansa va yitungu yibutamba. Jogu bamagaanga punga jina tsibutamba yiri tsigogumba va butamba nesi va mubu nesi va muiri uotsu.

² Nyimalaba yiansa yisusu ayimamata o yiari ayi wisi epatili, jandi amagaanga ayimanamugu na Nsambi aguvu monyu. Amagamuga na diufi dineni ombu biansa bina abimavegu musuga ubi visa butamba na mubu. Yiansa yimavosa rie:

³ Duyabivisa butamba vo mubu nesi miri te na tumamana usona basalitsi baNsambi etu bilimba va mambami.

⁴ Nyimatsingulu durangu dujogu abamasonu va mambami: diwendi rie: kama na magumana na tosini jina abamaruyila bifumba biotsu biIsrael,

⁵ mu yifumba yiJuda, digumi na tosini beji abamasonu va mambami; mu yifumba yiRuben, digumi na tosini beji; mu yifumba yiGad, digumi na tosini beji;

⁶ mu yifumba yiAsser, digumi na tosini beji; mu yifumba yiNeftali, digumi na tosini beji; mu yifumba yiManasse, digumi na tosini beji;

⁷ mu yifumba yiSimeon, digumi na tosini beji; mu yifumba yiLevi, digumi na tosini beji; mu yifumba yiIssakar, digumi na tosini beji;

⁸ mu yifumba yiZabulon, digumi na tosini beji; mu yifumba yiJoseph, digumi na tosini beji; mu yifumba yiBenjamin, digumi na tosini beji abamasonu va mambami.

Yinombu yineni

⁹ Mbana nyimagengila na vamaba yinombu yineni: mutu agorungula uyitala. Bamaruyila o malongu motsu no bifumba biotsu na batu botsu na mambembu motsu. Barnaba diteli va gusu yitsiga yibufumu na va gusu Muana Yindombu, bamaduara bilinga bivema na mutu mutu amagaanga dietu va dikaka.

¹⁰ Bamagamuga na diufi dineni rie: Dugobutsu duetu duiruyili ombu Nsambi etu oyitsani va yitsiga yibufumu, nombu Muana Yindombu.

¹¹ Botsu bamatsiengila yitsiga yibufumu na biansa na bivunda na bibulu bina. Bamakutama va gusu yitsiga yibufumu na bamayitsanga Nsambi

¹² rie: Amen! Ombu Nsambi ubi duyitsu na bundumba na diela na mangolu mutubu na mutubu! Amen!

¹³ Yivunda yimosi amakwivula rie: Abeduari bilinga bivema banyi? Agunyi beruyisini?

¹⁴ Nyimamugabusila rie: Ngejabi, ndeʼ guidijabi. Amansingula rie: Tsiri jogu abamawarila mukilu uneni? Jogu abamasusa bilinga biogu na bamabivemisa na malungu maMuana Yindombu.

¹⁵ La dibandu baji diteli va gusu yitsiga yibufumu buNsambi na bemusalili nyangu na mukolu o Ndagu andi. Jandi oyitsani va yitsiga yibufumu obakelisa na mangolu mandi.

¹⁶ Jogu bagomuegulu nsala nesi puila; nyangu vo yiusila bigobalasa maguga.

¹⁷ Mu mbari Muana Yindombu oyitsani va yitsiga yibufumu obabungula nobabeganga o bileka bimamba mamonyu. Na Nsambi obatsindula matsanga mogu motsu.