Dulasu 5 - La Sainte Bible en Langue Yipunu

Dibuku na Muana Yindombu

¹ Mbana nyimalaba dibuku va dikaka dimabaala dijandi agumatsana va yitsiga yibufumu. Dimasonu yiari na yiari na dimanamugu yisambuali yikumbu.

² Na nyimalaba yiansa yimangolu ayimagamuganga na diufi dineni rie: Anyi avu awelimina ukakula abimanamugu nodibula dibuku?

³ Tumba vasamaba mutu ne umosi, nesi o julu nesi va butamba nesi o tsi butamba agumarungula udidibula nesi udigengila.

⁴ Nyimalila puela mu mbari vasamaba ne mutu umosi awelimina udibula dibuku dieni nesi udigengila.

⁵ Yivunda yimosi amansingula rie: Guyalila. Laba yimbungu yiyifumba yiJuda, mutegula uDavid, amalunga, jandi avu awelimina ukakula abimanamugu nodibula dibuku.

⁶ Mbana nyimalaba Muana Yindombu ayimaba diteli va julu yitsiga yibufumu ayimatsiengulu na bibulu bina nesi bivunda bieni, yimalabana nderi yimaboku. Yimaba na yisambuali yimasiyi na yisambuali yimisu abimaba yisambuali yibinyunyi biNsambi abimasindugu yiari na yiari.

⁷ Muana Yindombu amayebonga dibuku va dikaka dimabaala dijandi agumatsana va yitsiga yibufumu.

⁸ Yiotsu ayi edivayi bibulu bina na magumabeji na bivunda bina, bimagudama va gusu Muana Yindombu. Mutu mutu amaba na sambi, mutu mutu amaba na kopa tsilora atsibasa na bimbunga abimaba tsambu tsiabaNsambi.

⁹ Bamawimbila duimbu dugona rie: Ndeʼ guwelimina ukakula abimanamugu nobonga dibuku mu mbari gumaboku na dufu duagu gumabega batu ombu Nsambi. Nyiina, malongu motsu na mbembu tsiotsu na batu botsu.

¹⁰ Gumabavaga bavagulitsi bapagu usalila Nsambi etu na jogu boruma vava tsi.

¹¹ Nyimamuegengila na nyimagulu mufi mabiansa, durangu duogu dumaba bivevi na bivevi na batosini na batosini. Bamatsiengila yitsiga yibufumu, jogu botsu na bibulu bina na bivunda,

¹² na bamawimbila na diufi dineni rie: Muana Yindombu agumaboku, avu awelimina udila mangolu na busina na diela na duyitsu na bundumba!

¹³ Mbana nyimagulu bisundu biotsu abivu o julu na va butamba na o tsi butamba nesi o mubu, bimawimbilanga rie: Ombu jandi oyitsani va yitsiga yibufumu nombu Muana Yindombu ubi duyitsu na digoba na bundumba na mangolu mutubu na mutubu!

¹⁴ Bibulu bina bimawaka rie: Amen! Na bivunda bimakutama na bimamuyitsanga.