Dulasu 4 - La Sainte Bible en Langue Yipunu

Duyitsu nana duvu o julu

¹ Mbana nyimalaba yiriariamu yisusu o julu, nyimalaba diguyi dibinduga. Na diufi adi nyimalegulu, diwendi rie: diufi nderi mumbandadimavosa nami rie: Mata gunu na nyugulasa adiulabana o gusu.

² Vana vana Yinyunyi amakaanga. Nyinogengila o julu nyimalaba yitsiga yibufumu na mutu amaba atsana.

³ Yinsi yiandi yimalula nana mamanyi majaspa na masarduana melulilingi. Muyama agumabagunu na emaroda umatsiengila yitsiga yibufumu.

⁴ Yitsiga yieni yimatsiengulu na magumabeji na bitsiga bina na vana bitsiga bieni magumabeji na bivunda bina bimatsana abimaduara mivuatu mivema na kaba tsilora.

⁵ Tsiemu na mufi na bidumi bimapalila o yitsiga yibufumu. Vamaba yisambuali yibalambi abamalulanga va gusu yitsiga yibufumu; balambi beni la yisambuali yibinyunyi biNsambi.

⁶ Vagusu yitsiga yibufumu vamaba mubu agumakadama nderi dusiengi. Vamaba nderi bibulu bina abimatsiengila yitsiga yibufumu abimaba misu na misu.

⁷ Ayitega yimabagunu na yimbungu; ayimubeji yimabagunu na muana ngombi; ayimurieru yimaba na yinsi ayimabagunu na mutu; ayimuina yimabagunu na mbira ajipurumuyi.

⁸ Biotsu bimaba na mapapi masiamasiamunu, nyuru tsiogu te no gari yika misu na misu. Nyangu na mukolu bamawimbilanga rie: Ka muna muneni gu! Fumu Nsambi mangolu motsu! Ojivu na omaba na oyiruyi!

⁹ Yiotsu ayi biotsu bina biwimbililanga nyimbu tsibundumba natsiduyitsu nesi tsidiboti ombu jandi oyitsani va yitsiga yibufumu na ojivu mutubu na mutubu,

¹⁰ magumabeji na bivunda bina bekutimingi va gusu jandi oyitsani va yitsiga yibufumu na bemuyitsingi, diwendi rie: Ojivu monyu umutubu na mutubu. Bebuayingi kaba tsiogu va gusu yitsiga yiandi novosanga rie:

¹¹ Fumu Nsambi etu, ndeʼ guwelimina udila bundumba na duyitsu na mangolu. Mu mbari gumasunda bima biotsu. Bima biotsu bivu na bimasundu na duganu duagu.