Dulasu 3 - La Sainte Bible en Langue Yipunu

Bulumbi abumatindu ombu bisi Sardes

¹ Sonina yilumbi yidibundu diSardes rie: Gengilati, jandi ojivu na yisambuali yibinyunyi biNsambi na yisambuali yibambuelili, mutu eni evosi rie: Nyijabi motsu amavu nenu. Nyijabi batu bedugengili nderi dukivu monyu diuleba dumafu kala!

² Rambuganu, warisanu ayivu nenu yiri yigokubuga tindi ukubuga. Nyilabi yiri bisalu bienu bigaa biwelimina na Nsambi ami.

³ Kabogu duyalibana ama dumalonsu ne nana dumalonsulu; madukianu na kalulanu diela. Nyuruga nana muifi, kabogu pa dugorambuga bilu dugojaba diweru adi nyuruga.

⁴ Nyijabi jenu bisi Sardes bamosi dusakabivisa bikutu bienu; duvu duwelimina uwendanga nami noduaranga bikutu bivema.

⁵ Botsu abolunga boduisu bikutu bivema na ngotsindula miina mogu mu dibuku dimonyu. Va gusu Taji ami na biansa biandi nyuvosa kengili rie: Baji abami.

⁶ Jandi oyigulu alubuyi! Agulu ama Yinyunyi yiNsambi evosi ombu bisi mabundu.

Bulumbi abumatindu ombu bisi Philadelphie

⁷ Sonina yilumbi yidibundu diPhiladetphie rie: Gengilati, agu Nsambi na aguvu ngensa na aguvu na tsafi jiDavid, jandi onmgula ubindula na mutu agobindiga, jandi orungula ubindiga na mutu agobindula, mutu eni evosi rie:

⁸ Nyijabi motsu amavu nenu. Nyijabi duna mua mangolu; nyijabi dumaduka malongi mami na duji dusigama.

⁹ Kabogu nyimadubindulila diguyi adi mutu agorungula udubindiyila. Guluanu! Mu diambu didibundu diSatan, jogu abevosi yiri baji baJuif, kabogu bagaa baJuif; nyubaruma ukutama va gusu enu noduyitsa. Mbana botsu bojaba yiri nyidurondi.

¹⁰ Dumadugusu diruma diami adi nyimaruma rie: Banu na pugu, kabogu nyudukelisa va temu maguga ajiuruga uweliga batu botsu.

¹¹ Uruga nyiruyi. Kefisanu amavu nenu yiri dugopatulu dugaba.

¹² Jandi ogulunga nyumuvaga dikutu diNdagu Nsambi adigomuegusulu. Nyusona diina diNsambi ami va dunyuru duandi na diina dimusiengi uNsambi ami, diwendirie: Jerusalem jigona ajiusunduyili ombu Nsambi ami. Va julu vana nyusona diina diami digona va dunyuru duandi.

¹³ Jandi oyigulu alubuyi! Agulu ama Yinyunyi yiNsambi evosi ombu bisi mabundu.

Bulumbi abumatindu ombu bisi Laodicee

¹⁴ Sonina yilumbi yidibundu diLaodicee rie: Guluati, adi Amen evosi, aguvu mbeji jisigama na jingensa, aguvu dibandu didusundulu duNsambi jandi rie:

¹⁵ Nyijabi motsu amavu nenu. Nyijabi yiri dugaa ne posi ne muji! Ka muna dibi di mu mban dugaa ne posi ne muji.

¹⁶ Kabogu mu mbari duji yielili, diwendi rie: dugaa ne posi ne muji, nyudugobula!

¹⁷ Duivosi rie: Nyiji yisina; nyimadila motsu mawelimina, diwendi rie: Ngegambu na yima. Tumba dugejabi nana duvu! Duji bijaga, diyi penyi na duji bidunga.

¹⁸ Kabogu nyidulubusi rie: Yisumbanu lora nami, lora ajivu tindi lora yiri duba tindi bisina. Yisumbanu bikutu bivema wandi yiri dudibiga penyi tsienu. Va julu vana yisumbanu bilongu abiudutiemusa.

¹⁹ Nyisiembi na nyikilisi botsu aba nyirondi. Kabogu kalulanu diela.

²⁰ Laba, nyirelama va diguyi na nyidukisi. Pa mutu egulu diufi diami na endibulili, nyukota na jetu nandi tuji va mosi.

²¹ Botsu abolunga botsana nami o bufumu buami mu mbari menu wami nyimalunga na nyimatsana na Taji ami va yitsiga yiandi o bufumu buandi.

²² Jandi oyigulu alubuyi! Agulu ama Yinyunyi yiNsambi evosi ombu bisi mabundu.