Dulasu 21 - La Sainte Bible en Langue Yipunu

Julu jigona na butamba bugona

¹ Mbana nyimalaba julu jigona na butamba bugona. Julu jitega na butamba butega bimatsiemuga na mubu wandi.

² Mbana nyimalaba musiengi uNsambi, diwendi rie: Jerusalem ugona; umasunduyila ombu Nsambi aguvu o julu, umaba ukunsama nderi mugetu oyivivi yiwela-mugetu.

³ Mbana nyimagulu diufi dineni adimaruyila o yitsiga yibufumu. Dimavosa rie: Ubongila namunyi Nsambi otsana mbura mosi na batu! Diwendi rie: Jandi otsana nogu na jogu boba batu bandi. Nsambi jaʼ beni oba nogu, diwendi rie: oba Nsambi ogu.

⁴ Jandi obatsindulila matsanga motsu. Vagomueba ne dufu ne bukuili ne matsanga ne buali. Motsu magulu motsiemuga.

⁵ Mbana jandi agumatsana va yitsiga yibufumu amavosa rie: Ubongila namunyi nyuvaga bima biotsu bigona. Mbana amabuesa uvosanami rie: Sona diambu diedidi rie: Mambu mami mavu mangensa na gurungula umavayila yitu.

⁶ Amabuesa rie: Mamavagu! Nyiji Alpha na Omega, diwendi rie: dibandu na disukusulu. Jandi oyigulu puila nyumuvega mamba mamonyu muensili, diwendi rie: mamba mayileka yimonyu.

⁷ Jogu abelungi bodila pegulu ejiji; nyuba Nsambi ogu na jogu boba baana bami.

⁸ Tumba batsoritsi na abagaa na yitu na babi na bikongu na bivuyisa na bavanditsi na basambilitsi babakosi na bafuritsi botsu bana mbura o dianga dineni dimuji na fula adivu dufu dumubeji.

Jerusalem ugona

⁹ Mbana yiansa yimosi ayimaba va gari yisambuali abimaba na yisambuali yikopa tsibasana yisambuali yibidungu biusita yimatasuna na yimavosa nami rie: Rugati nyugulasa mugatsi uMuana Yindombu.

¹⁰ Yinyunyi yiNsambi amakaanga na yiansa yimambega o julu mukongu uneni na usakama. Yimandasa Jerusalem, musiengi

¹¹ Nsambi agumasunduyila ombu Nsambi aguvu o julu nagumalulanga bundumba buNsambi. Musiengi umalulanga nana dimanyi adinengulu jaspa adivu janga janga nana dusiengi.

¹² Musiengi eni umakandu na yivaga ayimaba na digumi na maguyi mabeji: diguyi diguyi dimakelusu na yiansa. Diguyi diguyi dimasonu diina dimosi didigumi na bifumba bibeji bibaIsrael.

¹³ O yiari ayi wisi epalili mamaba maguyi marieru, o banda mamaba maguyi marieru, o tandu mamaba maguyi marieru na o yiari ayi wisi ewendili mamaba maguyi marieru wandi.

¹⁴ Yivaga yimusiengi yimanmgu va julu digumi na mamanyi mabeji na dimanyi dimanyi dimasonu na diina dimosi didigumi na bilumbi bibeji biMuana Yindombu.

¹⁵ Yiansa ayimavosa nami yimaba na nguangu jilora uwetsiga musiengi na maguyi na yivaga.

¹⁶ Biari biotsu bimusiengi bimaba dedi: usakama u-uonyi umaba dedi mosi na uroga u-uonyi. Yiansa yimawetsiga musiengi na nguangu na amalaba umaba tosini beji tsikilumetera. Usakama na uroga na umata bimaba yietsu yimosi.

¹⁷ Yiansa yimawetsiga yivaga na yimalaba yimaba magumidusambuali mametera. Yietsu ayimaba na yiansa yimaba dedi na yietsu ayi mutu ewetsiyi.

¹⁸ Yivaga yimarungu na dimanyi dijaspa na musiengi umarungu na lora ajimavedama nderi yibuku yiyilasi.

¹⁹ Mamanyi ama yivaga yimarungulu mamaba maminongu na minongu: amatega majaspa, amamubeji masafira, amamurieru ma-agata, amamuina ma-emaroda,

²⁰ amamuranu ma-onikisa, amamusiamunu masarduana, amamusambuali ma-eskabukala, amamunana maberela, amamufu matopasa, amamugumi makirosofarasa, amamugumi na dimosi maturakosa, amamugumi na mabeji ma-amatisa.

²¹ Digumi na maguyi mabeji mamaba mavagu na perala, diguyi diguyi dimavagu perala mosi. Mansila mamusiengi mamaba lora ajimavedama nana yibuku yiyilasi.

²² Mu musiengi vasamaba tindi Ndagu Nsambi mu mbari Fumu Nsambi aguvu na mangolu motsu na aguvu Muana Yindombu avu tindi Ndagu.

²³ Musiengi ugaa na nsala wisi vo tsungi umonitsa mu mbari bundumba buNsambi builulingi na Muana Yindombu avu Iambi.

²⁴ Bisi bulongu bowendanga na yijalala yiandi na bakaga bokotisa busina buogu muna.

²⁵ Maguyi mamusiengi eni magodibama via! Mu mbari aguna vagoba mukolu.

²⁶ Bundumba na busina bimalongu biukotusu muna.

²⁷ Vagokotanga yima yimuinsi muna ne mutu oyivayingi nsoruru vo mutu oyifuri, yika jogu abasonu mu dibuku dimonyu uMuana Yindombu bokota o musiengi eni.