Dulasu 20 - La Sainte Bible en Langue Yipunu

Tosini bilima

¹ Mbana nyimalaba yiansa ayimasunduyila o julu. Va dikaka diandi vamaba tsafi jimbengi na panga jineni.

² Yimagaanga mukuimbi-nyoga, diwendi rie: ajimalugu diabu vo Satan na yimamutunga te na tosini bilima.

³ Yiansa yimamubuaga o mbengi; yimajidibiga nobindiga yiri mukuimbi-nyoga agomuerungula udunsa malongu te na tosini bilima. Bilima bieni binovioga onyangulu mu pesu temu.

⁴ Mbana nyimalaba bitsiga bibufumu na batu batsana muna, bamavegu musuga utabulila batu bunsonsi. Nyimalaba binyunyi bibatu abamaboku mu mbari bamasamuna ngensa aji Jesus amalonsa, diwendi rie: Mambu maNsambi. Basamayitsa yibulu na yibagunu yiandi; basamasonu va mambami mogu nesi va makaka. Bamatsana na Christ na bamaruma va mosi nandi nderi bakaga tosini bilima.

⁵ (Basusu abamafu basamarambuga te na vana tosini bilima jimadugu.) Aduna dumaba durambugu dutega duabafu.

⁶ Ka muna ubueji gu jogu bolaba aborambuga durambugu dutega! Dufu dumubeji dugaa na mangolu ombu gogu tumba boba bavagulitsi bapagu baNsambi na baChrist na boruma va mosi nandi tosini bilima.

Ubela uSatan

⁷ Ava tosini bilima jiusukila Satan opalusu o tsugu

⁸ na oyenadunsanga bisi malongu amavu yiari na yiari, diwendi rie: Gog na Magog, obagukiga utoga divita, durangu duogu dufunanga nesi uviolila yisieyi yimubu.

⁹ Bamalava mu butamba buotsu mbana bamakanda mulaku ubatu baNsambi na musiengi agu Nsambi amaronda puela. Tumba muji umasunduga o julu na umabasielasana.

¹⁰ Mbana diabu agumabadunsanga amabuagu o dianga dimuji na fula agu yibulu na mubiyitsi umamfurulu bamabuagu kala. Botsogusungu nyangu na mukolu te na mutubu.

Bunsonsi abusita

¹¹ Mbana nyimalaba yitsiga yibufumu ayimaba yineni na yivema na nyimalaba mutu agumatsana muna. Butamba na julu bimarina va gusu andi, diwendi rie: bisamamuelabana.

¹² Mbana nyimalaba abamafu: ne baneni ne bageyi bamaba diteli va gusu yitsiga yibufumu. Mabuku mamosi mamadibulu mbana dibuku disusu, diwendi rie: dibuku dimonyu dimadibulu. Abamafu bamatabulu bunsonsi nana dimasonugulu mu mabuku memama.

¹³ Mubu umapalisa abamafu muna. Dufu na mbura jiabafu bimapalisa abamafu abamaba muna. Mutu mutu amatabululu bunsonsi dedi na mambu mandi.

¹⁴ Mbana dufu na mbura jiabafu bimabuagu o dianga dimuji. (Dianga dimuji divu dufu dumubeji.)

¹⁵ Uotsu osamasonu mu dibuku dimonyu amabuagu o dianga dimuji.