Dulasu 18 - La Sainte Bible en Langue Yipunu

Babylone umapansiga

¹ Mbana nyimalaba yiansa yisusu ayimaruyila o julu. Yimaba na musuga uneni na bundumba buandi bumamonitsa butamba buotsu.

² Yimagamuga na diufi dineni rie: Babylone uneni umapansiga tindi umapansiga! Abetsani muna yika bayisi na binyunyi bibi na batsoli babi.

³ Jandi amaduba batu botsu malamu mandi, diwendi rie: amabakotisa mu bumbembu buandi. Bakaga bamavaga bumbembu nandi na bisina bimafunisa madila mogu mu diambu diuviosulila umabi mandi.

⁴ Mbana nyimagulu diufi disusu adimaruyila o julu, dimavosa rie: Batu bami palanu. Duyafuama masumu mandi! Dukeekilusu va mosi nandi.

⁵ Masumu mandi mamatola nesi te no julu na Nsambi erangimini mabi mandi.

⁶ Muvayianu nana amaduvayila na mugabusilianu dibi temu beji mu biotsu abi amavaganga.

⁷ Nana amalebila na bundumba na busina anana wandi olabila diguga na purulu. Jandi evosingi rie: Laba nyiji mugetu kaga, ngaa mukuili. Ngokota o bukuili, via!

⁸ Mu diambu dieni bidungu biotsu biumudimba yilumbu yimosi. Diwendi rie: maali na bukuili na nsala; osielusunu na muji. Mu mbari Fumu Nsambi oyimutabulili bunsonsi avu muneni.

⁹ Bakaga abamafuama nandi mu masumu na bumbembu bolila ava bolabila nsumbili jimuji agumusielasana.

¹⁰ Bokakana vala nandi mu mbari bolaba goma jidiguga diandi. Bovosa rie: Ka muna ubiva gu! Ka muna ubiva gu, Baby lone musiengi uneni, musiengi umangolu ulaba! Yika diweru dimosi na mukilu agu umadugu!

¹¹ Bisina belili wandi mu mbari batu bagemuesumba bima biogu:

¹² nana lore na lore jivema na mamanyi madufunu duneni na baperala; matsanda maboti mamunongu na munongu na minongu miotsu mimiri na minongu miotsu mibuketi amimavalu na pungi na minongu miotsu mimiri amivu na dufunu duneni na kunga na madilu na mamanyi mamiduma;

¹³ magaji mamunongu na munongu na miyombu mimunongu na munongu na malamu na matsi na fufu na putu na bangombi na bindombu na bakabala na makalu ne batu.

¹⁴ Bisina bivosi nandi rie: Busina na ubueji uagu ugomuebilaba, via!

¹⁵ Bisina abimadila busina buogu mu diambu diandi bokakana nandi mu mbari diambu didiguga diandi. Bolila novosa rie:

¹⁶ Ka muna ubiva gu! Ka muna ubiva gu musiengi egugu ulaba! Na kala amakeduisa na bilinga bitsanda tsimunongu na munongu abimanamugu lore na mamanyi madufunu duneni na baperala yiari na yiari.

¹⁷ Yika diweru dimosi na busina buotsu bumatsiemuga. Botsu abebeyingi makumbi nesi bisi makumbi na botsu abesali muna, bamakakana vala nandi

¹⁸ ava bamalabila nsumbili jimuji aguimusielisini.

¹⁹ Bamagolana difufundu na bamalilanga rie: Ka muna ubiva gu! Ka muna ubiva gu musiengi egugu ulaba! Abamaba na makumbi bamadila busina mu diambu diandi, yika diweru dimosi na biotsu bimatsiemuga.

²⁰ Jenu bisi julu sangilanu mu diambu diandi! Jenu batu baNsambi na bilumbi na babiyitsi, sangilanu wandi! Mu mbari Nsambi amamugabusa pila mu diambu didibi adi amaduvayila.

²¹ Mbana yiansa ayimaba na mangolu yimabonga dimanyi adimarokulungu putu na yimadibuaga o mubu. Yimavosa rie: Anana Babylone musiengi uneni ubuagulu na mangolu na ugomuelabana.

²² Mu musiengi egugu basalitsi bagomuelabana; nduku jidimanyi adimaroka putu jigomuegulunu.

²³ Yijalala yilambi yigomuelula gunu na mufi mamulumi na mugatsi andi magomuegulunu. Bisina bienu bimaba na busina uviolila biotsu na mavanda magu mamadunsa batu botsu.

²⁴ Babylone umakilusu mu mbari malungu mababiyitsi na mabatu baNsambi mamalabana guna te na botsu abamaboku vava tsi.