Dulasu 11 - La Sainte Bible en Langue Yipunu

Bambeji babeji

¹ Nyimavegu nguangu na nyimatsingulu rie: Relama, yewetsiga Ndagu Nsambi na yinyensulu yipagu na tala batu abeyitsi guna.

² Tumba guyawetsiga piasu tsiNdagu Nsambi mu mbari piasu tsimavegu ombu abageduki Nsambi na jogu boyenatsiarilanga musiengi uNsambi te na magumana na tsungi beji.

³ Nyutinda bambeji babeji aboduara basiela na bosamunanga malongi maNsambi te na tosini na kama beji na magumasiamunu mabilumbu.

⁴ Bambeji babeji bavu mioliva mibeji na mangasa mabeji amavu va gusu Fumu butamba.

⁵ Pa mutu eweliyi ubalasa maguga muji upalila o miunu miogu ubunga bavinitsi bogu. Diwendi rie: uotsu oyiweliyi ubalasa maguga oboku.

⁶ Bana musuga ukamusa mfula ava besamunini malongi maNsambi. Bana musuga ukalusa bileka malungu na bana musuga uvaga bidungu nana borondila.

⁷ Ava bomanina usamuna malongi mogu, yibulu yiupalila o mbengi uyetoga nogu. Yiulunga nobaboka.

⁸ Mfurnbi tsiogu tsiuba layini va dulombili dumusiengi uneni agu Fumu ogu amagomununu va kurusu. Musiengi eni umafuigusu na Sodome vo na Egypte.

⁹ Te na bilumbu birieru na yibuku batu botsu, diwendi rie: bifumba biotsu na mambembu motsu na malongu motsu bagogaru yiri mfumbi tsieni tsiutsigu.

¹⁰ Bisi butamba bolaba nsangu mu diambu didufu dubambeji babeji. Bosangila na bosakasana mu mbari babiyitsi abamalasa puela batu maguga bamafu.

¹¹ Bilumbu birieru na yibuku binovioga punga jimonyu ajimaruyila ombu Nsambi jimabakotila na bamarelama. Botsu abamabalaba bamagaangu na goma.

¹² Mbana babiyitsi babeji bamagulu diufi adimaruyila o julu adimavosa rie: Rugatianu! Ava bavinitsi bamabalabila, bambeji beni bamamatao julu va gari dimungi.

¹³ Vanadiweru dieni vamaba disisana dineni dibutamba. Musiengi umapasu digumi dibiasi na yiasi yimosi yimabungu, diwendi rie: yisambuali yitosini tsibatu tsimaboku na disisana dibutamba. Botsu basusu bamakambulu puela na bamayitsa buneni buNsambi aguvu o julu.

¹⁴ Dibi dimubeji dimavioga. Vakivu adimurieru adiuruga.

Mumbanda agumusambuali

¹⁵ Mbana yiansa ayimusambuali yimasiga mumbanda andi. Mufi maneni mamavosanga rie: Musuga uruma butamba umavegu ombu Fumu etu nombu Christ andi na jandi orumanga mutubu.

¹⁶ Mbana magumabeji na bivunda bina abimatsananga va bitsiga biogu abimaba va gusu Nsambi bamakutama na bamayitsa Nsambi

¹⁷ rie: Fumu Nsambi, mungo mangolu motsu ndeʼ aguvu na agumaba, tuigugabusili diboti mu mbari gumalasa mangolu magu na gumabanda uruma.

¹⁸ Abageduki Nsambi bamanyoga puela, temu jikabu agu jimatola na abamafu botabululu bunsonsi. Temu jimatola usaka basalitsi na babiyitsi bagu, nesi abagu botsu, diwendi rie: botsu abedumi diina diagu, ne baneni ne bageyi; temu jimatola ubungajogu abebungi butamba.

¹⁹ Ndagu Nsambi jivu o julu jimadibulu na yigara yipangini yimalabana guna. Vamaba tsiemu na nduku na bidumi na disisana dibutamba na mfula jineni jimamanyi.