Dulasu 10 - La Sainte Bible en Langue Yipunu

Yiansa na dibuku digeyi

¹ Mbana nyimalaba yiansa yisusu yimangolu ayimasunduyila o julu. Yimapietu dimungi na muru andi umatsiengusu na muyama; yinsi yiandi yimalula nana wisi na makulu mandi mamaba nana milutsu mimuji.

² Yimagaanga dibuku digeyi didibulu va dikaka diandi. Yimatsiarila dikulu dimabaala va julu mubu na dikulu dimagetu va butamba.

³ Diufi diandi dimaba nderi yimbungu ava egumbili. Yinogamuga, yisambuali yibidumi bimayiwaka.

⁴ Yiotsu ayi yisambuali yibidumi bimayiwakila, mbe nyisona mambu meni tumba nyimagulu diufi adimaruyila o julu adimavosa rie: Kelisa ama yisambuali yibidumi bivosi; guyamuemasona.

⁵ Mbana yiansa ayimalabana utsiarila mubu na butamba, yimanangula gogu umabaala.

⁶ Na yimaleva pe si mu diina diNsambi, diwendi rie: mu diina dijandi ojivu monyu umutubu na mu diina dijandi omasunda julu na bima abivu muna, nesi butamba na bima abivu muna nesi mubu na bima abivu muna. Yiansa yimavosa rie: Ngensa tugomueviva.

⁷ Diwendi rie: ava yiansa ayimusambuli yiusiyila mumbanda andi Nsambi olasa kaka tsiandi atsimasuegu nana amalonsila basalitsi na babiyitsi bandi.

⁸ Mbana diufi dimamueruyila o julu na dimavosa nandi rie: Wenda yebonga dibuku digeyi didibulu adivu na yiansa ayitsiarili mubu na butamba.

⁹ Nyimawivula yiansa upega dibuku digeyi. Yimakwaka rie: Ka dibongi na diji. Gugulu moji yika buali mu mbari diuba yika nduli tumba o gari rnunu gugulu dueyi nderi buji.

¹⁰ Nyimabonga dibuku digeyi adimagaatigu na yiansa na nyimadiji; o gari munu nyimagulu yika dueyi nderi buji. Tumba nyinddiji o gari moji nyimagulu yika buali, dimaba yika nduli na nduli.

¹¹ Mbana nyimalonsu rie: Vengu gumuelonsa malongi maNsambi mu diambu dibatu bapuela nd malongu na mambembu na bakaga.