Dibandu 8 - La Sainte Bible en Langue Yipunu

¹ Nsambi asamalibana Noe na bibulu biotsu na bimitsi biotsu abimaba nandi o dikumbi dimamba; Nsambi amavotsisa punga va butamba na mamba mamabanda usiegama.

² Bileka abimaba o tsi butamba bimadibama na julu wandi; mfula jisamamuenoga.

³ Te na kama na magumaranu mabilumbu mamba mamasiegamanga te na mamakamuga.

⁴ Mu yilumbu yimugumi na yisambuali mu tsungi jimusambuali dikumbi dimamba dimayegakama va julu mukongu uArarat

⁵ Mamba mamasiegama te na tsungi jimugumi. Mu yilumbu yitega yitsungi eni julu tsimikongu tsimabanda ulabana.

⁶ Magumana mabilumbu binovioga Noe amadibula fenetera jidikumbi dimamba.

⁷ Amapalisa kavanga agumawendanga nogabuganga mu mbari mamba mbe masakakamuga.

⁸ Mua temu jinovioga amapalisa dibembi wandi uyelaba pa mamba mamasiegama.

⁹ Tumba dibembi disamadila mbura ubetama kabogu dimagabuga o dikumbi dimamba mu mbari butamba buotsu bumaba yika mamba na mamba. Kabogu Noe amapalisa dikaka ubonga dibembi na amadikotisa o dikumbi dimamba.

¹⁰ Amaviva te na yisambuali yibilumbu mbana amamuepalisa dibembi.

¹¹ Ava tsisiga dibembi dimagabuga ombu gandi na dugaji dumuoliva adu dimadokula, adumaba va mukuba andi. Mbana Noe amajaba yiri mamba mamasiegama.

¹² Amamueviva te na yisambuali yibilumbu; amamuepalisa dibembi. Tumba disamamuegabuga ombu gandi.

¹³ Yiiumbu yitega yiyitima yikama yisiamunu na yimosi, mamba mamakamuga tindi ukamuga. Noe amadibula muansa dikumbi; amagengila yiari na yiari na amalaba butamba bumagumuga.

¹⁴ Yilumbu yimagumabeji na yisambuati yitsungi jimubeji butamba bumagumuga.

¹⁵ Mbana Nsambi amaruma Noe rie:

¹⁶ Palanu na mugatsi agu na baana bagu bababaaia na bagatsi bogu.

¹⁷ Palisa bibulu biotsu bimunongu na munongu abivu nagu: ne batsoli ne biruitsi ne bilandila biotsu, biburisini na bifuni te na biubasa butamba de.

¹⁸ Kabogu Noe amapala na baana bandi bababaala na mugatsi andi na bagatsi babaana bandi bababaala.

¹⁹ Na bibulu biotsu na bilandila biotsu na batsoli botsu na biotsu abivu va butamba bimunongu na munongu bimapalila o dikumbi dimamba.

²⁰ Noe amarungila Fumu yinyensulu yipagu. Amabonga yibulu yilioma mu kadi munongu na tsoli jilioma jikadi munongu abi amavagulila Fumu pagu jiunyensa va yinyensulu yipagu.

²¹ Fumu anogulu mbunga jiboti, amatasa rie: Ngomueloga butamba mu diambu dimutu mu mbari matasa mandi magaa maboti ubanda va bungebi buandi; na ngomuebokisa biotsu abivu monyu nana nyibanobokisila.

²² Ava butamba bukivu, bovaranga na botsonsiganga vobanganga yiotsi na yiusila vobanganga mfula na mangala vobanganga nyangu na mukolu biotsu bina bigovioga te na mutubu.