Dibandu 6 - La Sainte Bible en Langue Yipunu

Nsambi amatabula diambu utsiemusa batu

¹ Ava batu bamabandila ufunanga va butamba na baana babagetu wandi bamaburungu,

² bisi julu bamalaba yiri baana babagetu beni bamaba baboti, bamabawela; mugetu yika la mugetu, bamasola aba bamaronda.

³ Mbana Fumu amavosa rie: Ngosingisa batu ubanganga monyu mutubu mu mbari bavu yika batu kabogu yitsingu yiogu yiuba yika kama na magumabeji mabilima.

⁴ Va temu eni nesi va temu ajimaduka, mikuimbi mimaba va butamba mu mbari bisi julu bamafubana yitsiga na baana babagetu babisi butamba bamabura baana nogu: abamaburu bamababangogaga abamadumusu va temu eni.

⁵ Fumu amalaba yiri batu bamaviosulila ukebivisa; yilumbu na yilumbu bamatasanga yika uvaga mabi.

⁶ Fumu amagabusa murima nsima mu mbari amasunda batu; amalaba tindi munyongu.

⁷ Fumu amavosa rie: Nyutsiemusa batu botsu aba nyimasunda, ubanda na batu te na biruitsi na bilandila na batsoli; mbe nyisamabasundanga mbe diwelimina.

⁸ Tumba Fumu amalaba ubueji na Noe.

Nsambi amatabula diambu uwaka Noe kalala

⁹ Ayiyi la yilombi yiNoe. Noe amaba dibaala disungama na amaba asigama va gusu Nsambi uviolila babaala botsu batemu andi; Noe amaba na murima umosi na Nsambi,

¹⁰ Noe amabura baana bababaala barieru: Sem, Cham na Japhet.

¹¹ Nsambi amalaba yiri dibi dimabasa butamba buotsu na bango dikasi bamafunanga.

¹² Nsambi anogengila butamba amabulaba nsoruru: batu botsu bamakebivisa.

¹³ Mbana Nsambi amatsingula Noe rie: Menu nyimatabula diambu utsiemusa batu botsu mu mbari bamabasa butamba de na dikasi diogu, nyubatsiemusa va mosi na butamba.

¹⁴ Gomina dikumbj dimamba na tsimbi tsiwelimina na mamba, gukagaba dionyi mu bibuku na gukadisinga maka o gari no julu.

¹⁵ Gulu nana gudigominina: usakama udikumbi uba kama na magumaranu mametera, uroga udionyi uba magumabeji na matera yiranu, na udonga udionyi uba yigumi na metera yiranu.

¹⁶ Muna dikumbi dieni gukavaga fenetera aji gutoba o julu muansa, jionyi jiuba yibuku yimetera; gukavaga munu ndagu umosi buandi; gukavaga kilingu yirieru.

¹⁷ Meʼ beni nyubasa butamba nyidu ajiutsiemusa biotsu abivu va butamba; biotsu abivu vabutamba biufu.

¹⁸ Tumba nyuvangana pangini nagu. Ndeʼ gukota o dikumbi dimamba jenu na baana bagu bababaala na mugatsi agu na bagatsi babaana bagu.

¹⁹ Gukotisa biotsu abivu monyu wandi, diwendi rie: bibeʼ bibeji biyibulu yibulu, yibusi na mulumi yiri bigotsiemuga.

²⁰ Na minongu miotsu mibatsoli, na minongu miotsu mibiruitsi na minongu miotsu mibilandila, bibeʼ bibeji bimunongu munongu biukota nagu yiri bigotsiemuga.

²¹ Gukaromba minongu miotsu mibiguji nobisuega o dikumbi dimamba, abina dujanganga jenu na bibulu.

²² Noe amadugusu motsu ama Nsambi amamuruma.