Dibandu 50 - La Sainte Bible en Langue Yipunu

Ubuaga bebuayi mfumbi Jacob

¹ Joseph amakebuaga va julu mfumbi taji andi noyenalilanga.

² Amaruma bayiritsi usala yisalu yiogu uyira mfumbi jitaji andi, bamayira mfumbi Jacob.

³ Bamaviosa magumana mabilumbu; aduna duvu dutalu dubilumbu biwelimina uyirila mfumbi. Bisi Egypte bamalilanga Jacob te na magumidusa-mbuali mabilumbu.

⁴ Bilumbu bibukuili binosuka, Joseph amavosa na bivunda nandi abimasala o ndagu Pharaon rie: Kokolu tsienu pa duilabi ubueji nami nsingulilianu Pharaon adi nyidutsinguli.

⁵ Taji ami amandevisa pesi ava amavosila rie: Yika ufu nyifu! Gukayensiyila o ngila aji nyimakesumbila o bulongu buCanaan. Kabogu nyirondi uwenda uyetsiga mfumbi ami, mbana nyugabuga.

⁶ Pharaon amawagula rie: Wenda yetsiga mfumbi agu amagulevisila pesi.

⁷ Joseph amawenda uyetsiga mfumbi andi. Abamawenda nandi ababa: baneni baPharaon botsu na bivunda abimasala na Joseph o ndagu andi na bivunda biotsu bibulongu buEgypte,

⁸ na bisi ndagu Joseph botsu na baana bataji bandi na bisi ndagu taji andi botsu: o bulongu buGochen bamasiala yika baana bageyi na biruitsi.

⁹ BaJoseph bamaba na makalu na babeyitsi bamakalu; bamaba na tindi yinombu yineni.

¹⁰ Ava bamatolila o yisagulu yiAtad ayivu o disimu dina diJourdain bamalila tindi ulila. Avana Joseph amalilila bukuili butaji andi yisambuali yibilumbu.

¹¹ Bisi Canaan abamatsana o yiari yieni bamagengila bukuili bueni abumalilulu o yisagulu yiAtad na bamavosa rie: Ka muna bukuili bu bubisi Egypte! La dibandu bamaluyila yisagulu yieni ayivu o disimu diJourdain Abel-Misraim, divindugulu bukuili bubisi Egypte.

¹² Anana baana bababaala baIsrael bamadugusulu maruma ama amabaruma.

¹³ Bamayenabega mfumbi o bulongu buCanaan na bamajitsiga o dilima dinungi jiMakpela aji Abraham amasumba na Efron muisi Hitt utsiyila bamfumbi bandi.

¹⁴ Joseph anotsiga mfumbi andi amayenagabuga o Egypte na baana bataji bandi na botsu abamawenda nandi uyetsiga mfumbi andi.

O nsima dufu duJcob

¹⁵ Yiotsu ayi taji ogu amafu, baana bataji baJoseph bamavosa rie: Yika tsie pa Joseph otuliyila nsima notuvayila mabi dedi mosi nana tumamuvayila?

¹⁶ Bamatinda yilumbi ombu Joseph rie: Tata nesi akafu amasila diambu diedidi rie:

¹⁷ Dukatsingula Joseph rie: Tsie tandi dibi dibaana bataji bagu diuleba bamaguvayila tindi dibi! Kokolu tsiagu tutandi mabi metu; tuyalibana jetu nenuanu tuiyitsi Nsambi mosi aguvu Nsambi taji etu! Ava Joseph amagululu posulu tsieni amalila.

¹⁸ Mbana baana bataji bandi bamawenda uyegudama jogu beni va gusu andi na bamavosa rie: Jetu tuʼjogu ba tuji baviga bagu.

¹⁹ Joseph amabatsingula rie: Duyalaba keri! Je meʼ Nsambi nyivu?

²⁰ Jenu dumatasa upayila dibi; tumba dibi dieni Nsambi amaronda udikalusa diboti udugusu adilabini namunyi; diwendi rie: amaronda uwaka batu bapuela kalala.

²¹ Kabogu duyalaba keri; nyudukelisanga jenu na baana benu! Anana amabasunsila mirima.

²² Joseph amatsana o Egypte na bisi ndagu taji andi; yitsingu yiotsu yiJoseph yimaba kama na yigumi yibilima.

²³ Joseph amalaba baana bababaala baEfraim te na dukulu dumurieru; na baana bababaala baMakir muana dibaala uManasse bamaburu va misu mandi wandi.

²⁴ Yilumbu yimosi Joseph amatsingula baana bataji bandi rie: Yika ufu nyifu! Tumba Nsambi odulingulanga na odugusula o bulongu buebubu nodubega o bulongu abu amavangana uvega ombu Abraham na Isaac na Jacob.

²⁵ Joseph amavosa rie: Nsambi odulingulanga kabogu vangananu nami yiri bivisi biami biuwenda nenu ava dupalila o Egypte.

²⁶ Joseph amafu ava amabila kama na yigumi yibilima. Bamayira mfumbi andi na bamajipodula mu yigara vana o Egypte.