Dibandu 5 - La Sainte Bible en Langue Yipunu

Bategula: ubandila na Adam te na Noe

¹ Adidi la dibuku dibategula baAdam. Ava Nsambi amasundila Adam amamusunda mu yikebutsu yiandi.

² Amasunda dibaala na mugetu, amabagabila miula na amabaluga batu muna yilumbu ayi bamasundulu.

³ Adam anodugusu kama na magumarieru mabilima akabura muana dibaala mu yibagunu yiandi diwendi rie: yikebutsu yiandi; amamuluga Seth.

⁴ Adam anobura Seth amabuela yinana yikama tsibilima na amamueburanga baana bababaala na babagetu.

⁵ Yitsingu yiotsu yiAdam yimaba yifti yikama na magumarieru mabilima; mbana amafu.

⁶ Ava Seth amabila kama na bilima biranu akabura Enos.

⁷ Seth anobura Enos amabuela yinana yikama na yisambuali yibilima na amaburanga baana bababaala na babagetu.

⁸ Yitsingu yiotsu yiSeth yimaba yifu yikama na yigumi na bilima bibeji; mbana amafu.

⁹ Ava Enos amabila magumidufu mabilima akabura Quenan.

¹⁰ Enos anobura Quenan amabuela yinana yikama na digumi na bilima biranu na amaburanga baana bababaala na babagetu.

¹¹ Yitsingu yiotsu yiEnos yimaba yifu yikamana bilima biranu; mbana amafu.

¹² Ava Quenan amabila magumidusambuali mabilima akabura Melaleel.

¹³ Quenan anobura Melaleel amabuela yinana yikama na magumana mabilima na amaburanga baana bababaala na babagetu.

¹⁴ Yitsingu yiotsu yiQuenan yimaba yifti yikama na yigumi yibilima; mbana amafu.

¹⁵ Ava Melaleel amabila magumasiamunu na bilima biranu akabura Yered.

¹⁶ Melaleel anobura Yered amabuela yinana yikamana magumarieru mabilima na amaburanga baana bababaala na babagetu.

¹⁷ Yitsingu yiotsu yiMelaleel yimaba yinana yikama na magumidufu na bilima biranu; mbana amafu.

¹⁸ Ava Y ered amabila kama na magumasiamunu na bilima bibeji akabura Henok.

¹⁹ Yered anobura Henok amabuela yinana yikama tsibilima na amaburanga baana bababaala na babagetu.

²⁰ Yitsingu yiotsu yiYered yimaba yifu yikama na magumasiamunu na bilima bibeji; mbana amafu.

²¹ Ava Henok amabila magumasiamunu na bilima biranu akabura Matusalem.

²² Henok anobura Matusalem amalinganga na Nsambi kama yirieru tsibilima na amaburanga baana bababaala na babagetu.

²³ Yitsingu yiotsu yiHenok yimaba kama yirieru na magumasiamunu na bilima biranu.

²⁴ Henok amaba na murima umosi na Nsambi; mbana amatsiemuga mu mbari Nsambi amamubonga.

²⁵ Ava Matusalem amabila kama na magumidunana na yisambuali yibilima akabura Lemek.

²⁶ Matusalem anobura Lemek amabuela yisambuali yikama na magumidunana na bilima bibeji na amaburanga baana bababaala na babagetu.

²⁷ Yitsingu yiotsu yiMatusalem yimaba yifu yikama na magumasiamunu na yifu yibilima; mbana amafu.

²⁸ Ava Lemek amabila kama na magumidunana na bilima bibeji akabura muana mosi udibaala.

²⁹ Amamuluga Noe mu mbari amavosa rie: jandi gugu otubembiga mu diambu dimaguga metu na bisalu bietu biranga abiruyili mu butamba buebubu abu Fumu amaloga.

³⁰ Lemek anobura Noe amabuela kama yiranu na magumidufu na bilima biranu na amaburanga baana bababaala na babagetu.

³¹ Yitsingu yiotsu yiLemek yimaba yisambuali yikama na magumidusambuali na yisambuali yibilima; mbana amafu.

³² Ava Noe amabila kama yiranu tsibilima akabura Sem na Cham na Japhet.