Dibandu 49 - La Sainte Bible en Langue Yipunu

Jacob ugabila egabili yigumi na baana bandi babeji bababaala miula

¹ Jacob amanengila baana bandi bababaala na amabaruma rie: Gukamanu, guluanu mbigulu tsiami.

² Gukamanu, baana bababaala baJacob guluanu! Guluanu taji enu Israel!

³ Ruben, ndeju tsomi ami, muana umangolu mabungebi buami. Ndeʼ guvu utega na duyitsu nesi na mangolu,

⁴ tumba guvu nderi mingiba mimujamba gugomueba utega! mu mbari gumandasa tindi yisonyi, gumabivisa mugatsi ami gumafubana yitsiga nandi.

⁵ Simeon na Levi bavu baana banguji; bamafubana mirima ulasa dikasi diogu.

⁶ Murima ami, kakana nogu! Nyiyafubana na dibuli diogu na kabu tsiogu bamaboka babaala, na kanda bamanemisa balumi babangombi!

⁷ Ka muna mulogu gu uvu nogu, kabu ogu jimaviolila uranga kabu ogu jivu na tindi dikasi! Nyubakakasana na bategula bogu; nyubapansa yiari na yiari o Israel.

⁸ Juda, guyitsu na baana bataji bagu; gutsotsa bavinitsi bagu ukesunsa va gusu agu. Nesi baana bataji bagu bogudama va gusu agu.

⁹ Juda muana ami guvu nderi mumfumfu yimbungu, nderi yimbungu ayibanoruyila o ulega novopula; nderi yibusi yiyimbungu, anyi orungula ugukibisa?

¹⁰ Aa Juda nguangu jibukaga jigogupatulu, muansu ubusefu ubanganga na bategula bagu te na fumu buonyi oruga; agu batu botsu bodedila.

¹¹ Otunga buru andi mu mfuga na otunga muana buru andi mu yibibili yiboti; oputiga yikutu yiandi mu malamu; osusa biduaru mu mamba mamilunda.

¹² Misu mandi mavu na yinyuru yimalamu minu mandi mavu bujua nderi mabenyi.

¹³ Zabulon otsananga va mugula mubu, va mbura aji makumbi mesikimini mandilu mandi motola te no Sidon.

¹⁴ Issakar avu nderi buru ajiroga, ajimasundusa mifuna uyesilama o yivanga.

¹⁵ Olaba yiri mbura andi jivu jiboti na yiari ayi etsanini yivu yiboti wandi omanina mangolu mandi ubeganga mifuna osinga ukotusu o buviga.

¹⁶ Dan otabulila batu bandi bunsonsi va mosi na bifumba bisusu biIsrael.

¹⁷ Dan oba nderi nyoga va nsila, nderi pili va mugula nsila, nyoga ajigakingi kabala mu bakondu na mubeyitsi andi ebonduyi.

¹⁸ Aa, Fumu kobuli wami!

¹⁹ Gad okindu na batu bandi tumba abamamukinda bokindu nandi.

²⁰ Asser o yiari yiandi oba na digumba dineni. Na odilanga biwelimina ugabila nesi bakaga.

²¹ Neftali avu nderi kabi ajilingingi nana erondili; ajiburingi baana baboti.

²² Joseph avu nderi yitayi yimuiri, yitayi yimuiri aguiburingi, aguvu va mugula yileka; bitayi bi-uonyi biuwala tindi uwala.

²³ Bamamutunumuna na bamamunonga mbansa; bamamufuengilila na divina.

²⁴ Tumba pita andi jimaba jiwara na miogu miandi mimawarusu na mangolu maNsambi Jacob; na mangolu mamubungulitsi bindombu, nesi Dimanyi DiIsrael.

²⁵ Nsambi aguvu Nsambi taji agu oyiguwamusa; Nsambi aguvu Mungo Mangolu motsu oyigugabila miula: miula amiuruyila o julu, miula amiuruyila o butamba, miula miduburu na mitulu nguji,

²⁶ miula ami nyigugabili miviolili nesi maboti amavu o julu tsimikongu, miviolili nesi digumba diwelimina dibikundubuga, mibi nderi yilimba va julu muru agu muana ami Joseph, Ndeʼ aguvu sefu jibaana bataji bagu.

²⁷ Benjamin avu nderi minsi aguivopuli; kedi jineni eji nyama, na ava tsisiga emueyenabokilanga basusu.

²⁸ Jogu bana bavu yigumi na bifumba bibeji biIsrael. Atsitsi mbigulu tsitaji ogu ava amabagabila miula. Amagabila mutu mutu miula miandi.

Dufu duJacob

²⁹ Mbana Jacob amabaruma rie: Namapapa ufu nyifu; dukansiga va mugula bataji bami o dilima adivu o gari nungi jiEfron, muisi Hitt,

³⁰ diwendi rie: o dilima adivu o nungi Makpela ajivu va nsungisini na Mamre o bulongu buCanaan aji Abraham amasumba na Efron muisi Hitt utsiyila bamfumbi bandi.

³¹ Avana bamatsiyila Abraham na mugatsi andi Sara, avana wandi bamatsiyila Isaac na mugatsi andi Rebecca; na avana nyimatsiyila Lea.

³² Nungi na dilima adivu guna bimasumbu na baana bababaala baHitt.

³³ Jacob anomana uvosa mambu memama ombu baana bandi bababaala amasilama, amatsukama na amafu.