Dibandu 48 - La Sainte Bible en Langue Yipunu

Jacob ugabila egabili baana bababaala baJoseph miula

¹ Mambu meni manovioga, batu bamayetsingula Joseph rie: Taji agu ubela ebeli. Amawenda na baana bandi bababaala babeji Manasse na Efraim.

² Batu bamalubusa Jacob rie: Muana agu Joseph uruga eruyi. Jacob amakewarisa na amatsana va tangi andi.

³ Jacob amatsingula Joseph rie: Nsambi aguvu na mangolu motsu amalabana nami o Louz o bulongu buCanaan na amakabila miula.

⁴ Amansingula rie: Nyugufunisa te na guba dilongu, nyuvega bulongu buebubu ombu bategula bagu yiri buba buogu te na mutubu.

⁵ Meʼ rie: Baana bagu bababaala babeji aba gumaburila o bulongu buEgypte nesi menu ngaatola ombu gagu o Egypte, boba abami: Efraim na Manasse boba abami dedi mosi na Ruben na Simeon.

⁶ Tumba baana aba gubuesa ubura boba bandeʼ beni; bobialila disiala dibaana bataji bogu.

⁷ Ava nyimaruyila o Mesopotamie, nguji agu Rachel amamfuila mu nsila o bulongu buCanaan ava tumatolila bebeli na Efrata; avana nyimamutsiyila mu nsila Efrata, diwendi rie: mu nsila jiBethleem.

⁸ Jacob anogengila baana baJoseph, amawivula rie: Ababa banyi?

⁹ Joseph amawagula taji andi rie: Abana baana bami bababaala aba Nsambi amayipega. Jacob amavosa rie: Kokolu babambisini nami yiri nyubagabila miula.

¹⁰ Jacob amaba na budunga bubununu; asamarungula umuelaba na buranga. Joseph amabambasana baana bandi bababaala nandi; Jacob amababumba na amabagabila miula.

¹¹ Mbana Jacob amatsingula Joseph rie: Ngaatasanga umuegulaba, tumba laba Nsambi amandasa nesi baana bagu.

¹² Joseph amabagusula va tulu taji andi na amagudama va tsi va gusu andi.

¹³ Mbana Joseph amababonga jogu botsu babeji, Efraim o dikaka diandi dimabaala, diwendi rie: o magetu maJacob, na Manasse o dikaka diandi dimagetu, diwendi rie: o mabaala maJacob, amababambasana nandi.

¹⁴ Jacob amasamba dikaka diandi dimagetu va julu muru uManasse: amabindasana miogu ava amabasakiyila mionyi mu mbari Manasse amaba tsomi.

¹⁵ Amagabila Joseph miula na amavosa rie: Nsambi agumawendisa bataji bami, diwendi rie: Abraham na Isaac, Nsambi agumakwendisa ubanda na duburu duami te na namunyi,

¹⁶ yiansa ayimakwaka kalala mu purulu tsiotsu agabili baana bebaba miula! Bonengulungu na diina diami na dibataji bami, Abraham na Isaac na bafuni tindi ufuna mu bulongu!

¹⁷ Joseph amalaba tindi ubiva mu mbari taji andi amasakiga dikaka diandi dimabaala va julu muru uEfraim; amagaanga dikaka ditaji andi, amaronda udigusula va julu muru uEfraim nodivinsa va julu muru uManasse.

¹⁸ Joseph amatsingula taji andi rie: Tsiri nana tata, mu mbari agugu la tsomi; sakiga dikaka diagu dimabaala va julu muru andi.

¹⁹ Taji andi amabusa na amavosa rie: Nyidijabi muana ami, nyidijabi; jaʼ wandi oba muneni; jaʼ wandi ofunanga te na bate-gula bandi boba dilongu, tumba ngebi andi omuviolila buneni; jandi na bategula bandi bofunanga te na boba malongu mapuela.

²⁰ Muna yilumbu yieni amabagabila miula na amavosa rie: O gusu baIsrael bosalisa miina menu ava bogabila batu miula; bovosa rie: Nsambi aguvayili nana amavayila Efraim na Manasse! Anana amaveyila buvunda buManasse ombu Efraim.

²¹ Jacob amatsingula Joseph rie: Yika ufu nyifu! Tumba Nsambi oba nenu na odugabusa o bulongu bubataji benu.

²² Va julu adi nyiduveyi, jenu na baana bataji bagu, nyigubuesi Sichem dikabu adi nyimadilila na dijenga na pita ombu bisi Amor.