Dibandu 46 - La Sainte Bible en Langue Yipunu

Jacob uweʼ ewendi o Egypte

¹ Jacob amawenda na biandi biotsu. Anotola o Bercheba amavagulila Nsambi taji andi Isaac pagu.

² Ava mukolu Nsambi amalasa Jacob yiriariamu na amamunengila rie: Jacob! Jacob amawagula rie: Meʼ janduʼgu!

³ Nsambi amavosa rie: Menu la Nsambi, Nsambi taji agu. Guyalaba keri uwenda o Egypte mu mbari aguna nyufunisa tindi ufunisa bategula bagu.

⁴ Meʼ beni nyugugabusa; Joseph oba nagu ava gufuila.

⁵ Jacob amarambuyila o Bercheba; baana bandi bababaala bamamunangiga va mosi na baana bogu na bagatsi bogu mu makalu maPharaon ama amatinda ubabeyila.

⁶ Bamabonga na migamba miogu wandi na biotsu abi bamadilila o bulongu buCanaan na bamawenda o Egypte.

⁷ Jacob amayenawenda na baana bandi bababaala o Egypte na baana bababaala babaana bandi bababaala na baana bandi babagetu babaana bandi bababaala, diwendi rie: mukuta andi uotsu.

Mukuta uJacob

⁸ Amama la miina mabaana bababaala baJacob abamawenda o Egypte. Jacob na baana bandi bababaala. Tsomi Jacob: Ruben.

⁹ Miina mabaana bababaala baRuben amama: Hanok na Pallou na Hesron na Karmi.

¹⁰ Miina mabaana bababaala baSimeon amama: Yemouel na Yamin na Ohad na Yakin na Sohar; na Saul muana dibaala umuisi Canaan.

¹¹ Miina mabaana bababaala baLevi amama: Guerchon na Quehat na Merari.

¹² Miina mabaana bababaala baJuda amama: Er na Onan na Chela na Peres na Zera; tumba Er na Onan bamafuila o bulongu buCanaan. Miina mabaana bababaala baPeres amama: Hesron na Hamoul.

¹³ Miina mabaana bababaala baIssakar amama: Tola na Pouva na Job na Chimron.

¹⁴ Miina mabaana bababaala baZabulon amama: Sered na Elon na Yaleel.

¹⁵ Abana la baana bababaala aba Lea amaburila Jacob o Mesopotamie, na muana andi umugetu diina diandi Dina. Baana bandi bababaala na babagetu dutalu duogu dumaba magumarieru na baana barieru.

¹⁶ Miina mabaana bababaala baGad amama: Sifion na Hagui na Chouni na Esbon na Eri na Arodi na Areli.

¹⁷ Miina mabaana bababaala baAsser amama: Imna na Icheva na Ichevi na Beria; na yibusi yiogu Sera. Miina mabaana bababaala baBeria amama: Heber na Malkiel.

¹⁸ Amana miina mabaana bababaala baZilpa agu Laban amavega ombu muana andi umugetu Lea; aba amaburila Jacob. Botsu bamaba yigumi na batu basiamunu.

¹⁹ Miina mabaana bababaala baRachel mugatsi Jacob amama: Joseph na Benjamin.

²⁰ Asnat muana mugetu uPotifera agumaba muvagulitsi pagu uOn amaburila Joseph Manasse na Efraim o bulongu buEgypte.

²¹ Miina mabaana bababaala baBenjamin amama: Bela na Beker na Achebel na Guera na Naaman na Ehi na Roch na Houppim na Mouppim na Aide.

²² Abana la baana bababaala baRachel aba amaburila Jacob. Dutalu duogu dumaba yigumi na batu bana.

²³ Diina dimuana dibaala uDan adidi: Houchim.

²⁴ Miina mabaana bababaala baNeftali amama: Yassiel na Gouni na Yesser na Chillem.

²⁵ Abana la baana bababaala baBila agu Laban amavega ombu muana andi umugetu Rachel, aba amaburila Jacob. Dutalu duogu duvu yisambuali yibatu.

²⁶ Batu abamawenda na Jacob o bulongu buEgypte aba jaʼ beni amabura, dutalu duogu duotsu dumaba magumasiamunu na batu basiamunu, tsiri utala bagatsi babaana bandi.

²⁷ Joseph amaba na baana babeji bababaala abamaburulu o bulongu buEgypte; dutalu duotsu dumukuta uJacob agumaba o bulongu buEgypte dumaba magumidusambuali.

²⁸ Jacob amaretsa Juda ombu Joseph uyemutsingula rie: Gukatasuna o Gochen.

²⁹ Joseph amakunsa dikalu diandi na amanangama uwenda o Gochen uyebengusana taji andi Jacob. Anomulaba amamubumba na amalila tindi ulila.

³⁰ Jacob amatsingula, Joseph rie: Ka muna nsangu ji! Nyimagulaba! Gukivu monyu!

³¹ Joseph amatsingula baana bataji bandi na botsu abamaba nandi rie: Nyuyelubusa Pharaon rie: Baana bataji bami, na botsu ababetsi o bulongu buCanaan bamatasuna.

³² Babaala beni bavu babungulitsi babindombu, bebunguli migamba; bamabega bindombu biogu na binsabi biogu na bangombi bogu na biogu biotsu.

³³ Pa Pharaon odimengila oduwivula rie: Yisalu yienu yi?

³⁴ Dukawagula rie: Tuji babungulitsi babindombu ubanda va bungebi buetu te na namunyi, jetu botsu na bataji betu. Adina diudurombisa utsana o yiari yiGochen mu mbari babungulitsi botsu babindombu bavu nsoruru ombu bisi Egypte.