Dibandu 42 - La Sainte Bible en Langue Yipunu

Jacob usindiga esindiyi baana bandi bababaala o Egypte

¹ Jacob amagulu yiri uvu ble o Egypte, amawivula baana bandi hababaala rie: Dibandu yi duitsingiyi yika utsingiga miogu?

² Amavosa rie: Nyigulu yiri uvu ble o Egypte; wendanu uyetusumbila ble yiri tudilanu monyu na tugomuefuanu.

³ Yigumi yibaana bataji baJoseph bamawenda o Egypte uyesumba ble.

⁴ Jacob asamasingisa Benjamin agumaba muana nguji Joseph uwenda nogu; amavosa rie: Goma nyilabi yiri odila diambu.

⁵ Baana bababaala baJacob na batu basusu abamaronda uyesumba ble bamatola va mosi o Egypte mu mbari nsala jimaba dungosu nesi o bulongu buCanaan.

Joseph na baana bataji bandi

⁶ Joseph amarumanga o bulongu bueni; jandi agumasumbisanga ble ombu benyi botsu. Baana bataji baJoseph banotola bamagudama va gusu andi te na bamadukusu mbami tsiogu mu tsi.

⁷ Joseph anolaba baana bataji bandi amabajaba; tumba amavaga nderi agebajabi. Amabawivula na bukanyi rie: Agunyi duiruyisini? Bamawagula rie: O bulongu buCanaan, tuirondi usumba biguji.

⁸ Joseph amajaba baana bataji bandi tumba jogu basamamujaba.

⁹ Mbana Joseph amarangimina mandosi mandi ama amabadorilanga, na amabatsingula rie: Jenu duji baleyitsi, dutsiruga uyisieenga bulongu nojaba udeda uetu.

¹⁰ Jogu bamamugabusila rie: Fumu, kokolu tsiagu, tsiri nana. Jetu tutsiruga yika uyisumba biguji.

¹¹ Jetu botsu tuvu baana badibaala dimosi; tugaa na mabeʼ mabeji. Kokolu tsiagu tugaa baleyitsi.

¹² Joseph amabatsingula rie: Viaga! Dutsiruga uyisieenga bulongu nojaba udeda uetu.

¹³ Bamamuwagula rie: Kokolu tsiri nana, tuvu baana badibaala dimosi na tuiruyili o bulongu buCanaan. Tumaleba yigumi na baana bataji babeji, tindi ngebi etu atsisiala namunyi na taji etu, umosi asaatsi.

¹⁴ Joseph amabatsingula rie: Adina nyibanodutsingula yiri duvu baleyitsi.

¹⁵ Tulelaba! Pharaon! Pa marina menu asakaruga jenu dugopala mu bulongu bubuebu.

¹⁶ Sindiganu mutu enu umosi uyelanda muana taji enu; jenu dusiala o tsugu. Tulelaba pa ufura duifuri vo pa ngensa duivosi. Pharaon! Duji baleyitsi.

¹⁷ Amabakotisa va mosi o tsugu te na bilumbu birieru.

¹⁸ Yilumbu ayimurieru Joseph amabaruma rie: Vaganu adi nyivosi pa duirondi udila monyu! Nyidumi Nsambi!

¹⁹ Tulelaba yeri duna mabeʼ mabeji. Diwendi rie: muana taji enu umosi osiala o tsugu, jenu basusu dukayenawenda na ble uyebungula mikuta mienu.

²⁰ Mbeyilianu muana taji enu, agu ngebi, mbana nyujaba yiri dugaa na mabeʼ mabeji, na dugomuefu. Anana bamavayila.

²¹ Tumba bamavosasana rie: Nyiina, jetu tuna mbela mu diambu dimuana taji etu, nesi amakalana notulenda tusamamulasa yingeba, la dibandu tuilabili maguga memama.

²² Ruben amabawivula rie: Nyisamadulubusa rie: Duyavaga muana dibi? Tumba dusamakulu. Tsiri dufu duandi tuifuti namunyi?

²³ Basamajaba yiri Joseph amabagulungu mu mbari amavosanga nogu na yikambi. Kabogu jandi amakakana nogu uyelila.

Baana bababaala baJacob ugabuga begabuyi o Canaan

²⁴ Ava Joseph amagabuyila amavosa nogu rie: Nyusikiga Simeon mbana amamutungisa bapanga va misu mogu.

²⁵ Joseph amaruma basalitsi ubasa saku tsiogu ble nogabusa mutu mutu mbongu tsiandi mu saku andi mbana bamabavega biguji ujanganga muna nsila. Adina dimabavagulu.

²⁶ Bamalongila baburu saku tsiogu tsible mbana bamayenawenda.

²⁷ Va mbura aji bamasilimina, mutu ogu umosi amadibula saku andi uvega buru andi biguji, kabogu mbongu tsimaba vana munu saku.

²⁸ Amagamuyila baana bataji bandi rie: Mbongu tsiami tsimakabusulu, aratsi, tsivu mu saku ami. Mbana bamabakama mirima te na bamawivusana na goma rie: Diambu yi Nsambi amatuvaga?

²⁹ Bamatola o bulongu buCanaan ombu taji ogu Jacob na bamamutsingula motsu ama bamalaba. Bamavosa rie:

³⁰ Dibaala adivu fumu bulongu amavosa netu na bukanyi na amatugengila nderi baleyitsi tuvu.

³¹ Tumamutsingula rie: Tugaa na mabeʼ mabeji na tugaa baleyitsi.

³² Tuvu yigumi na baana bataji babeji, jetu botsu taji mosi; umosi asaatsi, marina atsisiala na taji etu o bulongu buCanaan.

³³ Dibaala adivu fumu bulongu atsitutsingula rie: Tulelaba pa dugaa na mabeʼ mabeji. Silanu muana taji enu umosi ombu gami, bonganu ble uyebungula mikuta mienu,

³⁴ mbeyilianu muana taji enu aguvu marina. Mbana nyujaba yiri dugaa baleyitsi na dugaa na mabeʼ mabeji; mbana nyudugabusila muana taji enu Simeon na durungula ne ulinga nana duirondili mu bulongu buebubu.

³⁵ Ava bamafulila saku tsiogu, mutu mutu amalaba diumba dimbongu tsiandi o gari saku andi. Jogu na taji ogu banolaba mumba meni mambongu bamagaangu na goma.

³⁶ Taji ogu Jacob amabatsingula rie: Jenu dumbana baana botsu! Joseph esaatsi na Simeon wandi, va julu vana dumuebonga Benjamin! Ngeba menua, aa Nsambi!

³⁷ Ruben amavangana na taji andi rie: Pa ngaagugabusila Benjamin gukaboka baana bami babeji bababaala; abi va julu muru ami na nyumugabusa ombu gagu.

³⁸ Jacob amavosa rie: Muana ami agoweʼ nenu; mu mbari muana nguji andi amafu na jandi esiali pinsa. Pa olaba diambu mu mulingu enu nyufu na dufu duami duba na mambu.