Dibandu 40 - La Sainte Bible en Langue Yipunu

¹ Yilumbu yimosi dimalabana yiri bo-yi na muvayitsi mapa bakaga jiEgypte bamamuvayila mabi.

² Pharaon kaga jiEgypte amanyoyila basabtsi beni babeji: yivunda yibaboyi na yivunda yibavayitsi bamapa.

³ Amabakotisa o tsugu jiyivunda yibagora, guna tsugu aji Joseph amaba.

⁴ Yivunda yibagora amabawakisa ombu Joseph agumabakelisanga; bamaleviosa mua temu o tsugu.

Joseph uvindiga evindiyi mandosi mabisi tsugu babeji

⁵ Mukolu mosi, boyi na muvayitsi mapa bakaga jiEgypte abamaba o tsugu, jogu botsu babeji bamadora mandosi. Mutu mutu na ndosi andi na ndosi ndosi na divindugulu diandi.

⁶ Kedi Joseph amalaba yiri botsu babeji bavu na munyongu.

⁷ Amawivula basalitsi beni abamaba nandi o tsugu rie: Mu mbari yi duvu na munyongu namunyi?

⁸ Bamamugabusila rie: Jetu botsu tumadora mandosi na vagaa mutu umavindiga. Joseph amabawivula rie: Tsia Nsambi oyivindiyi mandosi? Kwalulilianu mandosi menu.

⁹ Mbana yivunda yibaboyi amamuwalulila ndosi andi rie: Muna ndosi ami vabetsi mfuga va gusu ami.

¹⁰ Mfuga eni jibetsi na bitayi birieru. Binonega bitsifula tsangu atsibetsi bisaga mirayisin amimawela.

¹¹ Kopa Pharaon jibetsi va dikaka diami. Nsidokula milunda, nsimigama mu kopa Pharaon na nsijiwakisa ombu gandi.

¹² Joseph amamuvindiyila rie: divindugulu dindosi adidi: Bitayi birieru bivu bilumbu birieru.

¹³ Gubuela bilumbu birieru o tsugu mbana Pharaon ogupalisa na ogugabusa o yisalu yiagu. Gumuwakisa kopa nana gumamuwakisilanga ava gumalebila boyi andi.

¹⁴ Tangimini ava gulabila ubueji. Kokolu tsiagu posili maboti ombu Pharaon yiri opalisa meʼ wami o tsugu.

¹⁵ Nyimapatulu o bulongu buHebreu na diuleba nyisamavaga dibi nyimakotusu o tsugu.

¹⁶ Yivunda yibavayitsi bamapa amalaba yiri divindugulu dimaba diboti kabogu amawalula ndosi andi rie: Muna ndosi ami vabetsi bievi birieru bimapa va julu muru ami.

¹⁷ Mu yievi ayimavioga uroga mubetsi mapa mageyi ama Pharaon amarondanga; tumba batsoli batsidodanga mapa amabetsi mu yievi ayibetsi va julu muru ami.

¹⁸ Joseph amamuvindiyila rie: Divindugulu dindosi adidi: Bievi birieru bivu bilumbu birieru.

¹⁹ Gubuela bilumbu birieru o tsugu mbana Pharaon ogutabula muru na oguleliga va muiri na batsoli bododa musonyi agu.

²⁰ Bilumbu birieru binovioga feta jiduburu duPharaon jimaba; amalambisila basalitsi bandi botsu mulambu uneni mbana va misu mogu amapalisa yivunda yibaboyi na yivunda yibavayitsi bamapa o tsugu.

²¹ Amagabusa yivunda yibaboyi o yisalu yiandi yiboyi yiri omuemuwakisa kopa.

²² Tumba amatabula yivunda yibavayitsi bamapa muru na amaleliga mfunbi andi va muiri nana Joseph amabavindiyila mandosi.

²³ Yivunda yibaboyi asamamuekipa ne ukipa Joseph. Amamulibana.