Dibandu 37 - La Sainte Bible en Langue Yipunu

JOSEPH Mandosi maJoseph

¹ Jacob amatsananga o bulongu buCanaan o yiari ayi taji andi amatsaninanga.

² Ayiyi la yilombi yibaana bababaala baJacob. Ava Joseph amabila yigumi na yisambuali yibilima amakelisanga bindombu na binsabi na amalinganga va mosi na baana bataji bandi abamaburu na Bila na Zilpa bagatsi bataji andi. Joseph amayededanga matamba ombu taji ogu.

³ Jacob amarondanga Joseph uviolila baana bandi botsu basusu bababaala mu mbari amamuburila va bununu buandi na amamurariyila yijungi ayimaba tindi yiboti.

⁴ Baana bataji bandi bamalaba yiri taji ogu amamurondanga uviolila jogu botsu, mu dionyi bamamuvinina, posulu tsiogu tsimaba yika minyangila na minyangila.

⁵ Mukolu mosi Joseph amadora ndosi aji amawalulila baana bataji bandi ajimabarombisa umuvina uviolila.

⁶ Amabatsingula rie: Kokolu tsienu guluanu ndosi aji nsidora!

⁷ Tutsitunga mifuna mikunsa o musiru; mufuna ami ubetsi urelama na mifuna mienu amibetsi yiari na yiari mitsigudama va gusu uonyi.

⁸ Baana bataji bandi bamamuwivula rie: Ndeʼ guba kaga uturumanga? Kabogu bamaviolila umuvina mu diambu dindosi tsiandi na nana amatsiwalulilanga.

⁹ Amamuedora ndosi jisusu, na amajiwalulila baana bataji bandi. Amavosa rie: Nsimuedora ndosi! Nsilaba wisi na tsungi na yigumi na mbuelili mosi bitsigudama va gusu ami.

¹⁰ Amajiwalulila taji andi dedi mosi nana amalejiwalulila baana bataji bandi. Taji andi amamunyangila na amamuwivula rie: Divindugulu dindosi aji gutsidora yi? Guitasi yiri jetu na nguji agu na baana bataji bagu tugudama va gusu agu?

¹¹ Jionyi jimapindisa baana bataji bandi mirima, tumba taji andi amajitasanga.

Joseph amasumbusu na baana bataji bandi

¹² Temu mosi baana bataji baJoseph bamawenda o Sichem uyenakelisanga bindombu na binsabi bitaji ogu,

¹³ yilumbu yimosi Jacob amawivula Joseph rie: Baana bataji bagu tsia o Sichem bekelisili migamba? Ruga, nyigusindiyi ombu gogu. Amagabusila rie: Nyuwenda!

¹⁴ Jacob amamuruma rie: Weʼ yelaba pa baana bataji bagu baji buranga na pa migamba mivu buranga, kabogu Joseph amawenda o Sichem.

¹⁵ Mutu amabenguna nandi ava amayenatsiemuyilanga o musiru. Jandi amawivula Joseph rie: Anyi guirombi?

¹⁶ Joseph amamugabusila rie: Baana bataji bami nyirombi. Gumabalaba? Gurungula undonsa agu bekelisili migamba miogu?

¹⁷ Dibaala dieni amavosa rie: Bamagusuga vava; nsigulu batsivosanga rie: Tʼwendianu o Dotan. Joseph amaduka baana bataji bandi na amabarasuna o Dotan.

¹⁸ Baana bataji bandi banomulabilila bamatunga fundu umubokila.

¹⁹ Bamavosa rie: Labanu mudoritsi umandosi uruga eruyi.

²⁰ Ruganu tumubokianu na tumubuayianu o yiduna ayimaleba mamba: tuvosa yiri yibulu yibukanyi yimamuji na tulabanu disukusulu dimandosi mandi.

²¹ Ruben anogulu posulu tsiogu amabusa na amavosa rie: Tuyamubokanu!

²² Ruben amabagandisa rie: Duyadekisa malungu; mubuayianu o yiduna ayimaleba mamba ayivu o kumu, ayaboku nenu. Amaba na tindi ditasa ubapatula Joseph nomugabusa ombu taji andi.

²³ Joseph amatola ombu baana bataji bandi, bamamuvula yijungi yiandi, yijungi ayimaba tindi yiboti.

²⁴ Bamamugaanga na bamamubuaga o yiduna ayimaleba mamba ayimakamuga: yisamaba na mamba.

²⁵ Mbana bamatsana uji, banobuaga misu bamalabilila yinombu yibaIsmael abamarugasana o Galaad; basamo bogu bamaba na mifuna mibima bimbunga jiboti jiminongu na minongu abi bamasuvanga o Egypte.

²⁶ Kabogu Juda amawivula baana bataji bandi rie: Ubueji uka pa tuboka muana taji etu nosuega dufu duandi?

²⁷ Tumusumbisianu ombu baIsmael ayaboku netu; avu tindi muana taji etu. Baana bataji bamadisinga.

²⁸ Ava batiyitsi bamuteti babisi Madian bamavioyila, baana bataji baJoseph bamamupalisa o yiduna ayimaleba mamba bamamusumbisa ombu baIsmael na dufunu dumagumabeji mambongu. Batiyitsi bamuteti bamayenamubega o Egypte.

²⁹ Ruben amagabuga o yiduna ayimaleba mamba; amalaba yiri Joseph asaa o yiduna. Amapasa biduaru biandi,

³⁰ amagabuga ombu baana bataji bandi na amavosa rie: Joseph asaa o yiduna ayimaleba mamba! Je meʼ aguʼ nyuwendasana.

³¹ Kabogu bamabonga yijungi yiJoseph ayimaba tindi yiboti; bamaboka mulumi yinsabi, bamagolasana yijungi yieni malungu.

³² Bamatinda yijungi ayimaba tindi yiboti ombu taji ogu na bamatinda yilumbi rie: Labati adi tumalaba! Gengilati, je ayina yijungi yimuana agu?

³³ Jacob amayijaba na amagamuga rie: Ayina yivu yijungi yimuana ami! Yibulu yibukanyi yimamuji! Joseph aka misiali misiali!

³⁴ Amapasa biduaru biandi na amaduara siela, amakota o bukuili uyenalilanga.

³⁵ Baana bandi botsu bababaala na babagetu bamayemubembiga tumba asamagaru. Amavosanga rie: Ngopala o bukuili te na tulaba na na muana ami o mbura jiabafu! Amalilanga muana andi.

³⁶ Bisi Madian bamayesumbisa Joseph o Egypte ombu Potifar agumaba yivunda yibagora baPharaon.