Dibandu 35 - La Sainte Bible en Langue Yipunu

Jacob ukumuga ekumuyi o Sichem uwenda o Bethel

¹ Yilumbu yimosi Nsambi amaruma Jacob rie: Relama, wenda o Bethel, yetsana guna, avana gurungila yinyensulu yipagu yiNsambi. Avana nyimalabinina nagu ava gumayenarininanga muana nguji agu Esau.

² Jacob amatsingula bisi ndagu andi na botsu abamaba nandi rie: Gusulanu bansambi bangana abavu nenu, keliomisanu na duaranu biduaru bisusu.

³ Turelama nowenda o Bethel avana nyurungila Nsambi yinyensulu yipagu, Nsambi agumalabana nami mu temu jimaguga mami na agumalinganga nami mu mulingu ami uotsu.

⁴ Bamawakisa bakosi bangana botsu abamaba nogu ombu Jacob na bipunga wandi. Jacob amayetsiga bakosi beni na bipunga va tsi muiri uneni agumaba bebeli na Sichem.

⁵ Mbana bamayenawenda. Goma jiNsambi jimanyava o misiengi miotsu amimaba yiarina yiari na batu basamaweliga uduka baana bababaala baJacob.

⁶ Jaʼ beni Jacob na botsu abamaba nandi bamatola o Louz aguvu Bethel.

⁷ Avana amarungila yinyensulu yipagu, na amaluga mbura eni rie: Nsambi Bethel; mu mbari avana Nsambi amakelasila ombu gandi ava amayenarininanga muana nguji andi.

⁸ Debora agumaba ndetsi Rebecca amafu, amatsigu va banda Bethel va tsi muiri uneni agu bamaluga Muiri Umatsanga.

⁹ Ava Jacob amaruyila o Mesopotamie Nsambi amamuelabana nandi; amamugabila miula.

¹⁰ Nsambi amavosa nandi rie: Diina diagu divu Jacob; gugomuenengulungu Jacob tumba gunengulungu Israel.

¹¹ Nsambi amamuemutsingula rie: Menu la Nsambi aguvu na Mangolu Motsu. Nyufunisa baana bagu te na bategula bagu boba malongu. Bategula bagu bamosi boba bakaga wandi.

¹² Nyuguvega bulongu abu nyimavega ombu Abraham na Isaac na o gusu nyubuvega bategula bagu wandi.

¹³ Mbana Nsambi amagusuga va mbura aji amavosila na Jacob;

¹⁴ Jacob amaretsiga dimanyi vana mbura aji Nsambi amavosila nandi; amawitila pagu jiunu va julu dionyi na matsi wandi; amadivaga yirangumunu yiyingitsi.

¹⁵ Jacob amaluga mbura aji Nsambi amavosila nandi Bethel.

Duburu duBenjamin na dufu duRachel

¹⁶ BaJacob bamarambuyila o Bethel na mbe bakivu na dilala dineni utola o dimbu adinengulungu Efrata, avana Rachel amaburila. Amalaba tindi maguga na duburu dueni.

¹⁷ Ava amagululungu misongu, muburisitsi amamuwarisa rie: Guyalaba keri mu mbari gumamuedila muana dibaala!

¹⁸ Yika ufu efu, amaluga muana eni Ben-Oni; tumba taji andi amamuluga Benjamin.

¹⁹ Rachel anofu amatsigu va mugula nsila jiEfrata adinengulungu Bethleem va temu ejiji.

²⁰ Jacob amaretsiga dimanyi vana ngila andi: te na namunyi divu dimanyi diRachel.

²¹ Jacob amayenawenda na amarangiga ndagu andi jitsanda o yiari yina yiMigdalEder.

²² Ava Jacob amatsanina o bulongu bueni, Ruben amafubana yitsiga na Bila mugatsi taji andi. Jacob amadigulu na amadinyonga. Jacob amaba na yigumi na baana babeji bababaala.

²³ Miina mabaana bababaala baLea amama: Ruben tsomi Jacob, na Simeon na Levi na Juda na Issakar na Zabulon.

²⁴ Miina mabaana bababaala baRachel amama: Joseph na Benjamin.

²⁵ Miina mabaana bababaala baBila muviga uRachel amama: Dan na Neftali.

²⁶ Miina mabaana bababaala baZilpa muviga uLea amama: Gad na Asser. Amana la miina mabaana bababaala baJacob abamaburulu o Mesopotamie.

²⁷ Jacob amatola ombu taji andi Isaac o Mamre o Quiriat-Arba abuvu Hebron agu Abraham na Isaac bamaletsaninanga.

²⁸ Yitsingu yiotsu yilsaac yimaba kama na magumidunana mabilima.

²⁹ Bununu bulsaac bumabueji, bilima biandi bimaba bipuela na amafu. Baana bandi bababaala Esau na Jacob bamamutsiga.