Dibandu 34 - La Sainte Bible en Langue Yipunu

Simeon na Levi ugabusa begabusi pila jiyibusi yiogu agumabivusu

¹ Yilumbu yimosi Dina, muana mugetu agu Lea amaburila Jacob, amawenda uyelaba bagetu nandi.

² Sichem muana dibaala uHamor, muana dibaala usefu bulongu bueni amamulabilila. Amamutsotsa ufubana yitsiga nandi, diwendi rie: amamubivisa.

³ Amanyungila Dina muana Jacob; amamuronda tindi uronda na amaronda yiri bofubana mirima.

⁴ Sichem amaruma taji andi Hamor rie: Kwelili muana mugetu egugu.

⁵ Jacob amagulu yiri Sichem amabivisa muana andi Dina; va temu eni baana bandi bababaala bamaba o musiru ukelisa migamba miandi, kabogu Israel amaba sui te na bamaruga.

⁶ Hamor, taji Sichem, amawenda ombu Jacob uyevosa nandi.

⁷ Vana temu eni baana bababaala baJacob bamaruyila o musiru; banogulu yiri bamalensu bamanyoga kabu jineni mu mbari Sichem amavayila baIsrael nsoruru ava amafubinina yitsiga na muana mugetu uJacob, adina disamaba diwelimina nogu.

⁸ Hamor amabatsingula rie: Sichem muana ami udibaala amafubana murima na muana enu umugetu; kokolu tsienu muwetsianu nandi.

⁹ Tubianu na dinami; jenu dutuvega baana benu babagetu na jetu wetu tuduvega abetu.

¹⁰ Jenu dutsananga netu, bulongu buba abuenu; tsananu muna na busalianu nodila busina muna.

¹¹ Sichem amatsingula taji na baana banguji baDina rie: Pa duinsingi na mawela nyuduvega biotsu abi dukwivula.

¹² Tubulilianu dufunu nesi durangu nesi na bikoka bineni, nyuvega biotsu abi duponda; tumba nsingianu na mawela.

¹³ Baana babaala baJacob bamatabula diambu udunsa Sichem nalaji andi Hamor mu mbari Sichem amabivisa yibusi yiogu Dina.

¹⁴ Bamabatsingula rie: Tugorungula uvega yi-busi yietu ombu dibaala adisarebu: adina divu nsoruru ombu getu;

¹⁵ turungula usinga diambu diagu pa guisingi uba nana jetu, diwendi rie: jenu babaala durebu.

¹⁶ Mbana turungula uduvega baana betu babagetu na jetu wetu turungula ubonga baana benu babagetu; tutsananga nenu, tubianu yika dilongu dimosi.

¹⁷ Tumba pa dugesingi urebu tubonga muana etu umugetu noyenawenda.

¹⁸ Posulu tsieni tsimalasa Hamor na muana andi Sichem ubueji.

¹⁹ Mufudu eni asamatsikadana uvaga adi bamamutsingula mu mbari amarondanga muana mugetu uJacob. Sichem amayitsu uviolila botsu mu ndagu taji andi,

²⁰ kabogu jogu na taji andi Hamor bamawenda o dikotulu dimusiengi ogu na bamatsingula bisi musiengi rie:

²¹ Batu bebaba bavu bawelimina utsana o bulongu buetu: batsaningi; basalingi netu, bulongu buvu buwelimina na jetu botsu. Jetu tuwela baana bogu babagetu, jogu wogu bowela baana betu babagetu.

²² Tumba babaala beni bagogaru utsana netu noba dilongu dimosi netu pa babaala botsu basakarebu nana jogu beni bavu barebu.

²³ Migamba miogu na biogu biotsu na biruitsi biogu bigoba bietu? Tusingianu duiebu adu beturumi yiri botsana netu.

²⁴ Botsu abamarugao dikotulu dimusiengi bamagulu Hamor na muana andi Sichem, kabogu botsu bamasinga urebu, diwendi rie: babaala botsu bamusiengi.

²⁵ Mu yilumbu yimurieru ava babaala beni bamalabila maguga, baana bababaala babeji baJacob; Simeon na Levi, baana banguji baDina bamabonga majenga mogu bamayesutusu bisi musiengi abamatasa rie: Tuji sui; bamaboka babaala botsu.

²⁶ Bamaboka Hamor na muana andi Sichem wandi; mbana bamapalisa Dina o ndagu Sichem na bamayenawenda.

²⁷ Baana bababaala baJacob bamayevula bamfumbi na bamayekinda musiengi mu mbari yibusi yiogu yimabivusu.

²⁸ Bamabonga bindombu biogu na binsabi biogu na bangombi bogu na baburu bogu, diwendi rie: biotsu abimaba nogu nesi o misiengi nesi o musiru.

²⁹ Bamayenabega bima biotsu na baana bogu bageyi na bagatsi bogu na biotsu abimakindu bindagu.

³⁰ Mbana Jacob amatsingula Simeon na Levi rie: Dumatombisa diambu, bisi bulongu bonsama nesi bisi Canaan nesi bisi Pherezie. Pa bisi malongu meni bogungasana uyitoyisa bomboka nyina yika mua pesu babaala; nyubungu na bisi ndagu ami wandi.

³¹ Jogu bamawivula rie: Yibusi yietu yiugengulungu nderi yimbembu?