Dibandu 33 - La Sainte Bible en Langue Yipunu

Israel ubengusana ebengusini Esau

¹ Jacob amabuaga misu na amalabilila Esau uruga eruyi na kama jina tsibabaala Amatandiga batu bandi, diwendi rie: Lea, Rachel na baviga bogu babeji.

² Amaviosa baviga na baana va gusu mbana Lea na baana bandi bamabaduka mbana Rachel na Joseph bamaba va nsima.

³ Jaʼ beni amaba va gusu ogu; amagudama va tsi yisambuali yikumbu te na amabambana na muana nguji andi.

⁴ Tumba Esau amaweʼ mbangu uyemubengusana; amamubumba na amamuviunga mu kingu. Bamalila.

⁵ Esau anobuaga misu amalabilila bagetu na baana, amawivula Jacob rie: Abana banyi? Jacob amawagula rie: Baana aba Nsambi amapega.

⁶ Baviga bamakweka na baana bogu wandi, jogu wogu bamagudama;

⁷ Lea na baana bandi bamakweka wandi, bamagudama; mbana Joseph na Rachel bamakweka na jogu wogu bamagudama.

⁸ Esau amawivula rie: Yi guirondi uvaga na yinombu yieni yiotsu ayitsibenguna nami? Jacob amawagula rie: Yiulasulu yingeba yifumu ami.

⁹ Esau amavosa rie: Muana nguji ami nyina bipuela; ndeʼ beni gukakelisa abiagu.

¹⁰ Jacob amawagula rie: Nesi, kokolu tsiagu singa bima bieni biotsu; ngensa yibenguna yijetu nagu yivu nderi nyimabenguna na Nsambi sinsa viri nana gutsindilila na nsangu.

¹¹ Kokolu singa bibulu biami abi nyimagutindila mu mbari Nsambi amambasa na maboti na ngegambu na yima. Amamugoma te na Esau amasinga.

¹² Esau amavosa rie: Tʼwendi, nyurela o gusu agu mu nsila.

¹³ Jacob amamuwagula rie: Guijabi yiri baana basakaba na mangolu na nyina bindombu na bangombi abinuisi; pa tubatsoyisa na muendu mu yilumbu yimosi migamba miotsu miufu.

¹⁴ Ndeʼ relanga, menu nyuyenadukanga va gegeyi, nyuduka dedi na muendu umugamba aguba va gusu ami na muendu ubaana te na nyutola ombu gagu o bulongu buSeir.

¹⁵ Esau amavosa rie: Nyusila batu bami bamosi nagu. Jacob amawivula rie: Dibandu yi? Dimosi buandi nyimaronda udilu na nsangu nagu!

¹⁶ Muna yilumbu yieni Esau amayenagabuga o Seir.

¹⁷ Jacob amawenda o Soukot. Amarunga ndagu andi na amarunga bivanga bimigamba miandi. La dibandu bamaluyila mbura eni Soukot.

Israel utsana etsani o yiari yiSichem

¹⁸ Ava Israel amarambuyila o Mesopotamie amatola na nsangu o musiengi uSichem o bulongu buCanaan na amavaga milaku miandi bebeli na musiengi.

¹⁹ Amasumba yiasi yimusiru ayi amarangiyila ndagu andi jitsanda, amayisumba ombu bategula baHamor, taji Sichem, dufunu du-uonyi dumaba kama mbongu tsilora jivema.

²⁰ Avana amarungila yinyensulu yipagu ayi amaluga Nsambi Israel.