Dibandu 31 - La Sainte Bible en Langue Yipunu

¹ Jacob amagulu baana bababaala baLaban bamavosa rie: Biotsu abivu na Jacob bivu bitaji etu, amadila busina buneni abumaleba butaji etu.

² Jacob anoditasa amajaba yiri dinonga na Laban disaa nana va kala.

³ Kabogu Fumu amatsingula Jacob rie: Gabuga o bulongu bubataji bagu o mbura aji gumaburulu na nyuba nagu.

⁴ Jacob amaruma mutu uyenengila Rachel na Lea umurasuna o musiru o yiari ayi amakelisilanga migamba.

⁵ Amatsingulanga bagatsi bandi rie: Nyilabi yiri taji enu agemuetonda nana va kala; tumba Nsambi taji ami amaba nami.

⁶ Jenu beni duijabi nana nyimasalila taji enu na mangolu mami motsu.

⁷ Tumba taji enu amandionga na amavinsa futa ami yigumi yikumbu. Ne nana Nsambi asamagaru yiri opayila tindi dibi.

⁸ Pa taji enu amavosa rie: Abiuba na matodi biuba futa agu, bindombu biotsu bimabura baana abavu na matodi. Ava amavosila rie: Abivu na milimba biuba futa agu, bindombu biotsu bimabura baana abavu na milimba.

⁹ La Nsambi agumapatula taji enu biruitsi na amabipega.

¹⁰ Nyimadora ndosi, diwendi rie: nyimabuaga misu ava bindombu bimagululu nsala ubeba na nyimalaba yiri balumi babindombu vo babinsabi abimabebanga bimaba yika milimba na matodi.

¹¹ Yiansa yiNsambi amandengila o ndosi rie: Jacob! Nyimawagula rie: Meʼ janduʼgu!

¹² Amavosa rie: Nangula misu na labati! Balumi botsu babindombu vo babinsabi abibebi bivu milimba na matodi; dionyi dimalabana mu mbari nyimalaba motsu ama Laban amaguvayila.

¹³ Menu la Nsambi agumalabana nagu o Bethel va mbura aji gumasingila yirangumunu yiyingitsi matsi na mbura aji gumavanginina pangini nami. Gusuga o bulongu buebubu, gabuga o bulongu abu gumaburulu.

¹⁴ Rachel na Lea bamamuwivula rie: Jetu tuki na dikabu vo disiala o ndagu taji etu?

¹⁵ Agetugengili nderi benyi tuvu? Asamatusumbisa? Asamaji madila metu?

¹⁶ Busina buotsu abu Nsambi amapatula taji etu buvu abuetu na baana betu. Vaga diotsu adi Fumu atsigutsingula.

¹⁷ Kabogu Jacob amatabula diambu usogama, amanangiga baana bandi na bagatsi mu basamo.

¹⁸ Amabega migamba miandi na biotsu abimaba nandi abi amadilila o Mesopotamie na amayenawenda ombu taji andi Isaac o bulongu buCanaan.

¹⁹ Ava Laban amawendila o uyefuga bindombu biandi, Rachel amadaga bakosi bataji andi.

²⁰ Jacob amasundila uwenda, asamaganina Laban muisi Aram.

²¹ Amarina na biandi biotsu, amasabuga mujamba na amatola o mukongu uGalaad.

²² Yilumbu ayimurieru bamatsingula Laban yiri Jacob amarina.

²³ Laban amagukiga batu bandi na bamadukila Jacob mu yisambuali yibilumbu na bamamurasuna o mukongu uGalaad.

²⁴ Tumba mukolu Nsambi amalabana na Laban, muisi Aram, o ndosi na amamutsingula rie: Kebana, guyavosa ne diboti ne dibi na Jacob!

²⁵ Kabogu Laban amarasuna Jacob. Jacob amarangiga ndagu andi jitsanda va julu mukongu; Laban na batu bandi bamavaga dedi mosi.

²⁶ Mbana Laban amawivula Jacob rie: Yi gutsivaga? Dibandu yi gumansoyila diela? Dibandu yi guibeyili baana bami babagetu nderi baviga aba gumadilila na dijenga?

²⁷ Dibandu yi gumatinina? Gumansoga diela na gusamakanina. Mbe nyimaguganina na nsangu na nyimbu na bandungu na basambi.

²⁸ Gusamansingisa uganina baana bami bababaala na babagetu! Gutsivaga buduka buneni.

²⁹ Nyina mangolu mawelimina uguvayila dibi; tumba Nsambi taji agu atsinsingula masiga rie: Kebana, guyavosa ne diboti ne dibi na Jacob!

³⁰ Diuleba guna nsala jineni ugabuga o ndagu taji agu, dibandu yi gutsidayila bakosi bami?

³¹ Jacob amawagula Laban rie: Nyimalaba goma na nyimatasa rie: Gupatula baana bagu babagetu.

³² Pa guilabi mutu ami na bakosi bagu aboku! Fuyi mifuna miami va misu mabaana bataji betu, pa guilabi yima yiagu yibongi. Jacob asamajaba yiri Rachel amadaga bakosi bataji andi.

³³ Laban amakotao ndagu jitsanda jiJacob no ndagu jitsanda jiLea no ndagu jitsanda jibaviga beni babeji, asamalaba yisalu. Anopala o ndagu jitsanda jiLea amakota o ndagu jitsanda jiRachel.

³⁴ Kabogu Rachel amabonga bakosi beni amabasuega o tsi yitsiga yisamo, jaʼ beni amatsana va julu yionyi. Laban amafuyi ndagu jiotsu jitsanda tumba asamalaba yisalu.

³⁵ Rachel amatsingula taji andi rie: Tata ami guyanyoga, ngorungula uretsama va gusu agu, mu mbari nyiji va tsi. Diuleba Laban amaromba, asamalaba bakosi bandi.

³⁶ Jacob amanyoga te na amatsundisa Laban rie: Dineni yi nyimavaga? Disumu yi nsivaga? Dibandu yi guindukili na muna kabu nana?

³⁷ Gunofuyi bima biami biotsu, yima yiagu yi gutsilaba muna? Yipalisi vava va misu mabatu bagu, jogu bakatabula bunsonsi.

³⁸ Laba nyimamana magumabeji mabilima nagu. Je bindombu biagu na binsabi biagu bimasuga mioji? Je nyimaji balumi bagu babindombu?

³⁹ Je nyimagubeyila bibulu abimavopulu? Tsatsabi, meʼ beni nyimafuta abimabungu. Ne nana gumakwivulanga abimadagungu nyangu nesi mukolu.

⁴⁰ Nyimatsoga tindi utsoga na yiusila yinyangu na yiotsi yimukolu na nyimatsiemusa yilu.

⁴¹ Nyimasinga utsana o ndagu agu magumabeji mabilima; nyimagusalila yigumi na bilima bina uwela baana bagu babeji na nyimagusalila bilima bisiamunu usumba migamba, va temu eni gumavinsa futa ami yigumi yikumbu.

⁴² Mbe nyisamawamusu na Nsambi Abraham, Nsambi agu taji ami edumi mbe gumakabusa miogu na miogu. Tumba Nsambi amalaba ukesunsa uami na yisalu yiranga ayi nyimasalanga; masiga atsitutabulila bunsonsi.

⁴³ Laban amagabusila Jacob rie: Bagetu bebaba bavu baana bami, baana bagu bavu bategula bami, migamba mieni mivu migamba miami, biotsu abi guilabi vava abiami. Diambu yi nyurungula uvaga baana bami vo baana aba jogu bamabura?

⁴⁴ Tsie tuvangini pangini jetu nagu tujikelisa mutubu!

⁴⁵ Jacob amabonga dimanyi adi amareliga nana yirangumunu.

⁴⁶ Jacob amaruma batu bandi rie: Bolanu mamanyi. Bamabola mamanyi na bamamagukiga; na bamajanganga va julu diguki.

⁴⁷ Laban amadiluga Yegar Sahadouta, Jacob amadiluga Galed.

⁴⁸ Laban amavosa rie: Namunyi diguki didimanyi dibi nderi mbeji va gari jetu nagu! La dibandu bamadiluyila Galed, divindugulu: Diguki dimbeji.

⁴⁹ Va julu vana bamadiluga Mispa, mu mbari Laban amavosa rie: Fumu atukelisi, jetu nagirava tukakinina.

⁵⁰ Pa gulasa baana bami babagetu maguga vo pa gumuewela bagetu basusu diuleba vagaa mutu ami aguidilabi, rangimina Nsambi aji mbeji va gari jetu nagu.

⁵¹ Laban amatsingula Jacob rie: Guilabi diguki diedidi dimamanyi na yirangumunu yieyiyi: nyimabireliga va gari jetu nagu.

⁵² Diguki diedidi divu mbeji na yirangumunu yieyiyi yivu mbeji, bivu mandilu wandi, menu ngomavioga uguvayila dibi, na ndeʼ gugomavioga upayila dibi.

⁵³ Nsambi Abraham na Nsambi Nahor aguvu Nsambi bataji bagu abi nsonsi va gari jetu nagu. Mbana Jacob amaleva pesi na diina diNsambi agu Isaac amadumanga.

⁵⁴ Va julu vana Jacob amavagula pagu va julu mukongu na amanengila batu bandi o uyeji; banomana uji bamasilimina vana julu mukongu eni.