Dibandu 28 - La Sainte Bible en Langue Yipunu

¹ Isaac amanengila Jacob, amamuganina. Mbana amamuruma rie: Guyawela mugetu umuisi Canaan.

² Wenda o Mesopotamie o ndagu Betouel ombu bakaga bagu, yewela muana uLaban muana nguji nguji agu.

³ Fumu Nsambi Mangolu agugabili miula na agufunisi tindi ufunisa te na gubura baana bapuela bapuela.

⁴ Agugabili miula nana amagabila Abraham miula, ndeʼ na bategula bagu yiri bulongu abu gutsanina buba abuagu, abu amavega Abraham.

⁵ Isaac amaganina Jacob agumawenda o Mesopotamie ombu Laban muana dibaala uBetouel, jandi amaba muisi Aram na muana nguji Rebecca nguji Jacob na Esau.

⁶ Esau amagulu yiri Isaac amasindiga Jacob o Mesopotamie uyewela mugetu. Amagulu wandi yiri ava amamuganina amamugandisa rie: Guyawela bagetu baCanaan.

⁷ Amalaba wandi yiri Jacob amadedila taji andi na nguji andi na amawenda o Mesopotamie.

⁸ Adina dimamujabisa yiri taji andi Isaac agerondi bagetu baCanaan.

⁹ Esau amayenawenda ombu Ismael; va julu bagatsi abamaba nandi, amatabula diambu uyewela Mahalat muana uIsmael muana uAbraham na yibusi yiNebayot.

Ndosi jiJacob

¹⁰ Jacob amarambuga o Bercheba, amawenda o Charan.

¹¹ Amatola va mbura, avana amasilimina mu mbari wisi mbe umawenda. Amabonga dimanyi adi amavaga pika andi na amasilimina vana mbura eni.

¹² Amadora ndosi ajimamulasa yikadi va butamba na kodu jiyionyi jimaduku o julu. Biansa biNsambi bimosi bimamatanga na bisusu bimasunduganga muna yikadi yieni.

¹³ Fumu amaba o julu yikadi yieni na amavosa nandi rie: Menu la Fumu Nsambi agu bataji bagu Abraham na Isaac bamayitsanga. Mbura aji guisilimini nyujivega ombu gagu nombu bategula bagu.

¹⁴ Bategula bagu bonyava nana difufundu, diwendi rie: ubandila o yiari ayi wisi epalili te no wisi ewendisini nesi o banda nesi o tandu. Mikuta miotsu bokwivula ubagabila miula nana nyimadugabila miula jenu na bategula bagu.

¹⁵ Rangimina yiri nyiji nagu, nyugukelisanga mbura tsiotsu atsi guwendanga na nyumuegugabusa o bulongu buebubu. Ngogusila pinsa, nyudugusu adi nyimavangana nagu.

¹⁶ Jacob anorambuga, amavosa rie: Dingensa Fumu aji va mbura ejiji, ngaadijabanga.

¹⁷ Amalaba goma na amavosa rie: Mbura ejiji jivu yingitsi! Ndagu Nsambi avava jivu na dikotulu dijulu avava divu.

¹⁸ Jacob amarelama kedi jineni amabonga dimanyi adi amavaga pika andi, amadiretsiga na amawitila matsi va julu dionyi, amadivaga yirangumunu yiyingitsi.

¹⁹ Amaluga mbura eni Betouel; va kala musiengi eni umanengulungu Louz.

²⁰ Mbana Jacob amavangana rie: Pa Nsambi aji nami na ekelisi mu mulingu egugu, pa epeyi biguji na biduaru,

²¹ pa ekabusi na polu o ndagu taji ami mbana Fumu obanganga Nsambi ami;

²² mbura ejiji aji nyimaretsiga dimanyi diyirangumunu jiuba Ndagu Nsambi; nyuveganga Nsambi yimosi mu digumi mu biotsu abi opeganga.