Dibandu 25 - La Sainte Bible en Langue Yipunu

Dufu duAbraham. Bategula bandi basusu

¹ Abraham amamuewela mugetu ususu diina diandi Quetoura.

² Amamuburila Zimran na Yoxan na Madian na Ichebac na Choua.

³ Yoxan akabura Saba na Dedan. Baana bababaala baDedan bamaba baAchour na baLetuch na baLeoum.

⁴ Baa-na bababaala baMadian bamaba Efa na Efer na Hanok na Abida na Elda. Botsu bana la baana bababaala baQuetoura.

⁵ Abraham amavega biandi biotsu ombu Isaac.

⁶ Ombu baana bababaala babagatsi bandi basusu amavega mua bima bimosi; ava mbe akivu monyu amabakakasana vala na muana andi Isaac, amabasindiga o yiari ayi wisi epalili.

⁷ Yitsingu yiotsu yiAbraham yimaba: kama na magumidusambuali na bilima biranu.

⁸ Bununu buAbraham bumabueji, bilima biandi bimaba bipuela na dufu duandi dusamaba na mambu.

⁹ Isaac na Ismael baana bandi bababaala bamamutsiga o dilima diMakpela bebeli na Mamre o nungi jiEfron muana dibaala uSohar muisi Hitt.

¹⁰ Nungi eni aji Abraham amasumba na baana bababaala baHet, avana mfumbi jiAbraham na jimugatsi andi Sara bamatsigulu.

¹¹ Abraham anofu Nsambi amagabila muana andi Isaac miula. Isaac amatsananga bebeli na yiduna yimamba ayinengulungu Lahai-Roi.

¹² Ababa la bategula baIsmael, muana dibaala uAbraham agu Agar muisi Egypte, agumaba muviga uSara, amaburila Abraham.

¹³ Miina mabaana bababaala baIsmael na kula tsiogu amama: Nebayot, la tsomi andi na Quedar na Adbeel na Mibsam,

¹⁴ na Michema, na Douma na Massa,

¹⁵ na Hadad na Tema na Yetour na Nafich na Quedma.

¹⁶ Abana la baana bababaala baIsmael; amana la miina mogu na miina mamimbu mogu na mamasaku mogu; bamaba yigumi na basefu babeji babatu bogu.

¹⁷ Yitsingu yiotsu yiIsmael yimaba: kama na magumarieru na yisambuali yibilima, na dufu duandi dusamaba na mambu.

¹⁸ Baana bandi bababaala bamatsaninanga ubandila o Havila te no Chour agumaba usungasana na Egypte o yiari yiAchour. Jandi asamatsananga va mosi na baana bataji bandi.

JACOB Esau na Jacob

¹⁹ Ayiyi la yilombi yilsaac muana dibaala uAbraham.

²⁰ Abraham amabura Isaac. Isaac amaba na magumana mabilima ava amawelila Rebecca muana mugetu uBetouel muisi Aram o Mesopotamie, na yibusi yiLaban muisi Aram.

²¹ Tumba Rebecca amaba yinguma kabogu Isaac amasambila Fumu mu diambu diandi. Fumu amagulu dusambu duandi mbana mugatsi andi Rebecca amadila dimi.

²² Baana bamakunganga o moji, amakewivula rie: Pa anana divu, dibandu yi nyimadilila dimi diedidi? Kabogu amayewivula Fumu.

²³ Fumu amamutsingula rie: Malongu mabeji mavu o moji agu. Minongu mibeji miupalila o yiburutsu yiagu. Umosi oviolila ususu mangolu. Yivunda oba o tsi durumu dungebi.

²⁴ Yilumbu yiduburu yimatola; dingensa amabura mavasa.

²⁵ Agutega amapala mubengi na jaʼ uotsu amaba mionyi na mionyi nana yijungi yimionyi; bamamuluga Esau.

²⁶ Mbana yiduki yiandi amapala, amagaanga yisonginyi yiEsau; bamamuluga Jacob. Isaac amaba na magumasiamunu mabilima ava amabab urila.

²⁷ Baana banoba bivunda, Esau amaba tindi murela na amakotanga o musiru; Jacob asamaba murela tumba amaba mubungulitsi ubindombu agumatsananga o ndagu tsanda.

²⁸ Isaac amarondanga Esau mu diambu dibanyama bandi tumba Rebecca amarondanga Jacob.

²⁹ Yilumbu yimosi Jacob amalamba musulu umisa, avana Esau amaruyila o musiru na yideku yineni.

³⁰ Esau amavonda Jacob rie: Kokolu peʼpeyi mua musulu eni ubenga; nyimagaangu na tindi yideku, (la dibandu bamaluyda Esau Edom).

³¹ Jacob amavosa rie: Lensumbisa buvundabuagu.

³² Esau amawaka rie: Yika ufu nyifu, buvunda bueni yisalu yi bunsalila?

³³ Jacob amavosa rie: Ka ndevili pesi. Amamulevila jionyi, anana amasumbisila buvunda buandi ombu Jacob.

³⁴ Mbana Jacob amamuvega dipa na musulu umisa, Esau amaguvavabila mbana amayenawenda. Anana Esau amalensila buvunda buandi.