Dibandu 23 - La Sainte Bible en Langue Yipunu

Abraham usumba esumbi mbura utsiyila mfumbi Sara

¹ Yitsingu yiSara yimaba kama na magumabeji na yisambuali yibilima.

² Sara amafuila o Quiriat-Arba ajivu Hebron o bulongu buCanaan; Abraham amayelila Sara.

³ Abraham amasila mfumbi andi na amayevosa na baana bababaala baHet rie:

⁴ Nyiji muenyi aguitsani nenu; ndonsianu mbura aji nyutimina ngila ami avana nyutsiyila mfumbi ami.

⁵ Baana bababaala baHet bamawagula Abraham rie:

⁶ Aa fumu etu, letuguluati, Nsambi amaguvaga sefu va gari etu; kabogu tsiga mfumbi agu va mbura aji gusola o yiari yibangila betu; vagaa mutu ne umosi va gari etu, agugugandisa usola ngila aji gutsiyila mfumbi agu.

⁷ Abraham amaretsama mbana amagudama va gusu baana bababaala baHet abamatsananga guna.

⁸ Mbana amavosa rie: Pa duisingi yiri nyutsiga mfumbi ami, lekululuatianu, kwivulilianu Efron muana dibaala uSohar,

⁹ yiri onsingisa dilima diMakpela adivu o kodu jinungi andi nonjabisa dufunu wandi yiri diuba ngila ami.

¹⁰ Efron amaba atsana va mosi na baana bababaala baHet. Efron muisi Het amawagula Abraham va misu mabaana bababaala baHet na va misu mabatu botsu abamaba batsana va dikotulu dimusiengi andi rie:

¹¹ Fumu ami tsiri nana, kokolu lekululuati! Ngogusumbisa nungi na dilima adivu muna wandi, va misu mabatu bami nyiguveyi bionyi. Tsiga mfumbi agu.

¹² Abraham amagudama va gusu bisi bulongu.

¹³ Mbana amavosa na Efron va misu mabatu rie: Nyigulendi rie: Kokolu tsiagu, lekululuati! Nyufuta dufunu adu gukwivula: Nsinguli duonyi mbana nyutsiga mfumbi ami.

¹⁴ Efron amawagula Abraham rie:

¹⁵ Fumu ami, lekululuati! Kama jina tsimbongu tsivu diambu va gari jetu nagu? Tsiga mfumbi agu.

¹⁶ Abraham amasinga posulu tsieni tsiEfron, amamuvega dufunu adumatabulu va misu mabaana bababaala baHet diwendi rie: Kama jina tsimbongu atsivu dedi na mbongu tsibatiyitsi bamuteti.

¹⁷ Anana nungi jiEfron ajivu o Makpela va nsungisini na Mamre na nungi na dilima adivu muna na miri miotsu amivu yiari na yiari binungi,

¹⁸ bimasumbusu ombu Abraham va misu mabaana bababaala baHet na mabatu botsu abamaba batsana va dikotulu dimusiengi.

¹⁹ Motsu mana manovioga Abraham amatsiga mfumbi andi Sara o dilima adivu o nungi jiMakpela ajivu va nsungisini na Mamre, diwendi rie: o Hebron o bulongu buCanaan.

²⁰ Baana bababaala baHet bamasumbisa nungi na dilima adivu muna ombu Abraham yiri oba na mbura utsiganga mamfumbi.