Dibandu 22 - La Sainte Bible en Langue Yipunu

Abraham avu ukunsama uvagula Isaac pagu

¹ Va julu mambu meni motsu Nsambi amaronda utsiyisa usigama uAbraham. Amamunengila rie: Abraham! Amawagula rie: Meʼ janduʼgu!

² Nsambi amavosa rie: Bonga Isaac muana agu udibaala, muana agu divingu, muana agu guirondi puela; wenda o bulongu buMoria, aguna gumuvagulila pagu jiunyensa va julu mukongu agu nyugulonsa.

³ Abraham amarelama kedi jineni. Amariaba mikansu miuvagulila pagu jiunyensa, amalongila buru andi na amasogama uwenda o mbura ajimamulonsu. Amayenabega basalitsi babeji na Isaac muana andi udibaala.

⁴ Yilumbu ayimurieru Abraham amabuaga misu na amalabilila mbura eni.

⁵ Abraham amatsingula basalitsi bandi rie: Sialanu vava na buru, jetu na Isaac tuwenda te na gima uyesambila Nsambi mbana tugabuga ombu genu.

⁶ Abraham amabonga mikansu miuvagulila pagu, amamiwakisa muana andi Isaac, jaʼ beni amabeganga muinda na dibaga, jogu botsu babeji bamawendanga va mosi.

⁷ Mbana Isaac amanengila taji andi Abraham rie: Tata! Amawagula rie: Me janduʼgu muana ami! Isaac amamuevosa rie: Muinda na mikansu nyilabi tumba yindombu yipagu jiunyensa yika?

⁸ Abraham amawagula rie: Muana ami Nsambi jaʼ beni otuvega yindombu yipagu. Jogu botsu babeji bamawendanga va mosi.

⁹ Ava bamatolila va mbura aji Nsambi amalonsa Abraham, Abraham amarunga yinyensulu yipagu na amadukasana mikansu. Amatunga Isaac muana andi udibaala makulu na miogu, amamusakiga va julu mikansu va yinyensulu yipagu.

¹⁰ Mbana Abraham amasomuna dibaga diandi ubokila muana andi Isaac.

¹¹ Mbana yiansa yiFumu agumaba o julu amamunengila rie: Abraham! Abraham! Amawagula rie: Meʼ janduʼgu!

¹² Yiansa yiFumu amavosa rie: Ledundati! Guyavayila muana agu diambu; dingensa nyimajaba guidumi Nsambi na gugaakwimina muana agu udibaala nesi divingu diagu.

¹³ Abraham amabuaga misu, amalaba mulumi-yindombu agumaba ukobama masiyi va diwansi o nsima andi; mbana Abraham amabonga mulumi-yindombu na amaguvagula pagu jiunyensa va yivinga yimuana andi udibaala.

¹⁴ Abraham amaluga mbura eni rie: Fumu oyetuvega. La dibandu bevosili namunyi rie: O julu mukongu Fumu otuveganga.

¹⁵ Yiansa yiFumu agumaba o julu amanengila Abraham temu ajimubeji,

¹⁶ na amavosa rie: Meʼ beni aguvu Fumu nyilevi pesi rie: Mu mbari gutsidedila diufu diami na gugaakwimina muana agu udibaala nesi divingu diagu,

¹⁷ nyugugabila miula na nyufunisa bategula bagu te na boba nana babuelili na nana yisieyi yidukueku dumubu; na bategula bagu boba balungitsi.

¹⁸ Bisi malongu motsu bokwivula ubagabila miula nana nyimagugabila miula mu mbari ndeʼ gumadedila diufi diami.

¹⁹ Abraham amagabuga ombu basalitsi bandi, jogu botsu na Isaac bamarelama na bamagabuga va mosi o Bercheba; mu mbari Abraham amatsananga guna.

²⁰ Mambu meni manovioga Abraham amagulu yiri Milka amaburila muana nguji andi Nahor baana bababaala:

²¹ tsomi andi diina diandi Ous na yiduki yiandi Bouz; na Quemouel taji Aram;

²² na Kessed na Hazo na Pildach na Yidlaf na Betouel.

²³ Betouel amabura Rebecca. Amana la miina mayinana yibaana bababaala baMilka aba amaburila Nahor, muana nguji Abraham.

²⁴ Mugatsi andi Reouma, jaʼ wandi amamuburila baana: Teba na Gaham na Tahach na Maaka.