Dibandu 20 - La Sainte Bible en Langue Yipunu

Abraham na Abimelek

¹ Abraham amagusuga vana amayenawenda o Neguev; amayetsana va gari Cades na Chour, diwendi rie: Amaviosa mua temu o bulongu buGuerar.

² Abraham amavosa mu diambu dimugatsi andi Sara rie: Avu yibusi yiami. Kabogu Abimelek agumaba kaga jiGuerar amamupatula Sara.

³ Mbana Nsambi amalabana mukolu o ndosi na Abimelek na amamutsingula rie: Gufu mu diambu dimugetu agu gumabonga, ana mulumi.

⁴ Abimelek agusamafubana yitsiga na Sara, amagamuga rie: Fumu gubunga nesi dilongu adivu disungama?

⁵ Jandi asamamfurila rie: Avu yibusi yiami? Na Sara jaʼ beni asamamfurila rie: Avu katsi ami? Nyimadivaga na murima usunduga, ngaajaba.

⁶ Muna ndosi eni Nsambi amabuesa rie: Nyijabi gumadivaga na murima usunduga; nyimagugubitsa yiri gugovaga dibi va gusu ami. La dibandu ngaasingisila yiri gufubana yitsiga nandi.

⁷ Tsie gabusi mugatsi ngana. Jandi avu mubiyitsi, ogusambilila na gudila monyu. Tumba pa gugogabusa mugetu eni, jaba rie: gufu na abagu botsu wandi.

⁸ Abimelek amarelama kedi jineni amanengila basalitsi bandi botsu na amabatsingula mambu meni motsu; baneni bandi bamagaangu na goma jineni.

⁹ Abimelek amanengila Abraham wandi na amamuwivula rie: Ayina yi? Dibi yi nyimaguvayila yiri gutulasa maguga mamunongu egugu, jetu na batu bami? Disaawelimina uvaga nana gumapayila.

¹⁰ Mbana amawivula Abraham rie: Dibandu yi gumavayila nana?

¹¹ Abraham amawagula rie: Nyimatasa yiri batu bebaba bagaa na goma Nsambi diurungula uba bomboka mu diambu dimugatsi ami.

¹² Va julu vana aji yibusi yiami, avu muana mugetu utaji ami tumba tugaa nguji mosi; la dibandu nyimamuwelila.

¹³ Ava Nsambi amandinsila vala na ndagu taji ami nyimatsingula Sara rie: Gulu diboti adi gupayila adidi rie: mbura tsiotsu atsi tuyenawendanga gukaposila rie: Avu katsi ami.

¹⁴ Abimelek amawakisa Abraham mulendu ubindombu na binsabi na bangombi na basalitsi bababaala na babagetu; amamugabusila mugatsi andi Sara.

¹⁵ Mbana Abimelek amavosa nandi rie: Bulongu buami abuna; tsana ava ndeʼ beni guirondi.

¹⁶ Na amatsingula Sara rie: Laba nyiveyi tosini mbongu tsilora jivema ombu katsi agu; tsionyi tsiutsindula mbela agu va misu mabatu botsu.

¹⁷ Abraham amasambila Nsambi, Nsambi amabelusa Abimelek, na mugatsi andi na basalitsi bandi babagetu yiri borungula uburanga.

¹⁸ Mu mbari Fumu amalevaga bisi ndagu Abimelek botsu binguma, mu diambu diSara mugatsi uAbraham.