Dibandu 18 - La Sainte Bible en Langue Yipunu

Nsambi utubula etubuli yiri Sara obura muana dibaala

¹ Va temu jiyiusila yimuangulu Fumu amalabana na Abraham va gari miri mineni miMamre; amaba atsana va dikotulu dindagu andi jitsanda.

² Amanangula misu na amalaba babaala barieru abasamaba vala nandi. Anobalabilila amayebabengusana mbangu, amagudama.

³ Amavosa na umosi rie: Fumu pa nyimadila maboti ombu gagu, kokolu guyapioga, lekotanu.

⁴ Badubeyili mua mamba ususa makulu mbana letsananu o tsi muiri egugu.

⁵ Nyuyebonga mua mapa utsoka murima, dunomana uji duyenawendanga; mu mbari nyilabi ubueji yiri dumakota ombu gami. Bamagabusila rie: Vaga nana gutsivosila.

⁶ Abraham amalensa ugabuga o ndagu andi jitsanda ombu Sara na amavosa rie: Lensa nosobana bietsu birieru bifufu; lamba mapa mageyi.

⁷ Mbana Abraham amawenda mbangu o mugamba andi amayegaanga muana ngombi uvonga. Amaguwakisa ombu musalitsi agumagulamba mbangu mbangu.

⁸ Biguji binovi Abraham amabisunsa va gusu ogu. Jaʼ beni amatsana va mugula ogu o tsi muiri ava bamajanganga.

⁹ Mbana bamamuwivula rie: Mugatsi agu, Sara, aka? Amawagula rie: Aji guna ndagu.

¹⁰ Umosi va gari ogu amavosa rie: Va temu ejiji mu yilima ayiuruga nyumueruga ombu gagu nyurasuna mugatsi agu Sara na muana dibaala. Kabogu Sara amagulu mambu meni ava amabila o gari ndagu.

¹¹ Abraham na Sara bamanuna; Sara amakubulayitu uburabaana.

¹² Amareka o tsi murima novosa rie: Nyimakenunina, nyumuelaba nsangu jimunongu eni? Fumu ami wandi amanuna.

¹³ Fumu amawivula Abraham rie: Dibandu yi Sara atsirekila novosa rie: Je dingensa, nyubura muana, menu agumakenunina?

¹⁴ Va diambu adigorungulu na Fumu? Muna yilima ayiuruga vana temu ajimatabulu nyumueruga ombu gagu nyurasuna Sara na muana dibaala.

¹⁵ Sara amafura rie: Ngaareka, mu mbari amalaba goma. Tumba Fumu amavosa rie: Dingensa gutsireka.

¹⁶ Babaala beni bamarelama ne bakasogama, bamagengila o yiari yiSodome. Abraham amayebavetsiga.

¹⁷ Mbana Fumu amatasa rie: Je nyusueyila Abraham adi nyirondi uvaga?

¹⁸ Dingensa Abraham oba kaga jibatu bapuela na abavu na mangolu. Bisi malongu motsu bokwivula ubagabila miula nana nyimamugabila miula.

¹⁹ Nyimamusola yiri olonsa baana bandi bababaala nesi bategula bandi ukelisa maruma mami novaga amavu mawelimina na masungama, anana nyudugusulu pangini aji nyimavangana na Abraham.

²⁰ Fumu amavosa na Abraham rie: Nduku atsi nyigulu mu diambu dibisi Sodome na Gomorrhe tsimaviolila na masumu mogu mamaviolila wandi.

²¹ La dibandu nyusunduyila nolaba dibandu dimabi mogu nolaba yeri mavu dedi na nduku atsi nyimagulu; pa mavu nana nyudijaba.

²² Kabogu babaala babeji bamayenawenda o yiari yiSodome tumba Fumu amasiala na Abraham.

²³ Abraham amakueka na amawivula Fumu rie: Gubokisa mutu usungama va mosi na mutu mubi?

²⁴ Tanguji o musiengi uvu magumaranu ma-abasungama. Gubaboka wandi? Gugorungula ukelisa musiengi eni mu diambu dimagumaranu ma-abasungama abavu muna?

²⁵ Viaga, digorungula uba! Ubokisa mutu usungama na mutu mubi, adina dilasi yiri mutu usungama ugengulu nderi mutu mubi digorungula uba nana! Jandi oyitabulili bisi butamba botsu bunsonsi agobutabula na dusungugu?

²⁶ Fumu amabuesa rie: Pa nsirasuna magumaranu ma-abasungama o Sodome, nyutanda bisi musiengi uotsu mu diambu diogu.

²⁷ Abraham amamuevosa rie: Je meʼ aguvu yika mutu nyina musuga umuevosa na Fumu?

²⁸ Yika tsie, pa gurasuna magumana na abasungama baranu, gubunga musiengi uotsu mu diambu dibaranu abegambu? Fumu amawagula rie: Ngobunga musiengi pa nsirasuna magumana na abasungama baranu.

²⁹ Abraham amamuevosa nandi rie: Yika tsie, pa gurasuna magumana buandi ma-abasungama! Fumu amawagula rie: Ngovayila musiengi diambu mu diambu dimagumana meni.

³⁰ Abraham amamuevosa nandi rie: Fumu guyanyoga, pa nyumuevosa. Yika tsie, pa gurasuna magumarieru buandi ma-abasungama? Fumu amawagula rie: Pa nsirasuna magumarieru ma-abasungama ngovayila musiengi diambu.

³¹ Abraham amamuevosa nandi rie: Je meʼ nyurungula umuevosa na Fumu? Yika tsie, pa gurasuna magumabeji buandi ma-abasungama? Fumu amawagula rie: Ne magumabeji, ngobunga musiengi.

³² Abraham amamuevosa nandi rie: Fumu guyanyoga, nyumuevosa temu ajiji buandi. Yika tsie, pa gurasuna digumi buandi di-abasungama? Fumu amawagula rie: Ne digumi di-abasungama ngobunga musiengi.

³³ Fumu anomana uvosa na Abraham amayenawenda. Abraham amayenagabuga o ndagu andi.