Dibandu 16 - La Sainte Bible en Langue Yipunu

Duburu duIsmael

¹ Sarai, mugatsi Abram asamamuburila baana. Sarai amaba na muviga umugetu agumaba muisi Egypte, diina diandi Agar.

² Sarai amatsingula Abram rie: Laba Fumu amapaga yinguma; nyiguveyi musuga ufubana yitsiga na muviga ami, tanguji ombu gandi nyudilila baana. Abram amasinga adi Sarai amavosa.

³ Yiotsu ayi Abram amatsanina yigumi yibilima o bulongu buCanaan, Sarai mugatsi andi, amabonga muviga andi Agar agumaba muisi Egypte na amamuwakisa ombu mulumi andi Abram.

⁴ Abram amafubana yitsiga na Agar agumadila dimi. Anolaba yiri amadila dimi, amalensa Sarai.

⁵ Kabogu Sarai amatatila Abram rie: Ndeʼ guitombisi ulensu. Nyimaguvega muviga ami, laba yiotsu ayi ejabi yiri aka na dimi yika ulensa endensi. Fumu jaʼ beni abi nsonsi va gari jetu nagu.

⁶ Abram amagabusila Sarai rie: Ndeʼ gugaa na musuga ombu muviga agu? Muvayili adi guirondi, kabogu Sarai amabanda umukuana; Agar amamurina vala.

⁷ Yiansa yiFumu yimamurasuna o kumu va mugula uyiduna yimamba, ayivu va mugula unsila jiChour.

⁸ Yiansa yimamuwivula rie: Agar muviga uSarai, aguʼ guiruyisini? Aguʼ guiwendisini? Agar amawagula rie: Urina nyirini Fumu ami Sarai.

⁹ Yiansa yiFumu yimamuruma rie: Gabuga ombu fumu agu nokesunsa va gusu andi.

¹⁰ Yiansa yiFumu yimamutsingula rie: Nyufunisa bategula bagu te na bagorungula utalu.

¹¹ Yiansa yiFumu yimamutsingula rie: Laba gubura muana dibaala na gumuluga diina diIsmael; Fumu amalaba munyongu agu.

¹² Ismael obanganga pinsa nderi buru jimusiru; otoyisa batu bapuela na batu bapuela botoga nandi; ovaga mulaku andi vala na milaku mibaana bataji bandi.

¹³ Yiotsu yina Agar amanengilanga Fumu, El-Roi; amawivula yiansa rie: Tsiri vava nyimalabila Fumu Nsambi agumandaba?

¹⁴ Amaluga yiduna yieni Lahai-Roi; ayimaba va gari Cades na Bered.

¹⁵ Agar amaburila Abram muana dibaala. Abram amaluga muana agu Agar amamuburila Ismael.

¹⁶ Abram amaba na magumidunana na bilima bisiamunu ava Agar amaburila Ismael.