Dibandu 14 - La Sainte Bible en Langue Yipunu

Abram na bakaga na Melkisedec

¹ Va temu jiAmrafel, kaga jiMesopotamie na jiAriok kaga jiEllasar na jiKedor-Laomer kaga jiElam na jiTidal kaga jiGoim,

² dimalabana yiri ababa bamatoga divita na Bera kaga jiSodome na Bircha kaga jiGomorrhe na Chinab kaga jiAdma na jiChemeber kaga jiSeboim na kaga jiBela, diwendi rie: Soar.

³ Jogu botsu bamabenguna va mosi o yibususu yiSiddim ayinengulungu mubu uKali va temu ejiji.

⁴ Bamaba o tsi durumu duKedor-Laomer te na yigumi na bilima bibeji; yilima yiyigumi na murieru bamakaluga mimbini.

⁵ Tumba mu yilima yiyigumi na bina Kedor-Laomer na bakaga abamaba nandi bamayetoyisa baRefaim o Achetarot-Camaim, na baZouzi o Ham, na baEmim o Quiriataim.

⁶ Mbe ka baHori bamayetoga o mukongu uSeir te no miri mineni miEl-Paran, amivu bebeli na kumu.

⁷ Mbana bamagabuga o yiari yiEn-Michpat aguvu Cades na bamatoyisa nobetsa baAmalec o bulongu buogu na baAmor abamaba o Hassasson-Tamar.

⁸ Mbana kaga jiSodome na kaga jiGomorrhe na kaga jiAdma na kaga jiSeboim na kaga jiBela aguvu Soar bamakunsama utoga nogu o yibususu yiSiddim,

⁹ diwendi rie: utoga na Kedor-Laomer kaga jiElam na Tidal kaga jiGoim na Amrafel kaga jiMesopotamie na Ariok kaga jiEllasar: bakaga bana bamatoga na bakaga baranu.

¹⁰ Yibususu yiSiddim yimaba na puela biduna bibituma; kaga jiSodome na kaga jiGomorrhe bamarina na bamayebonduga mu bionyi; basusu bamarina o yiari yimukongu.

¹¹ Balungitsi bamakinda busina buotsu buSodome na buGomorrhe na biguji biogu na bamayenawenda.

¹² Lot muana katsi Abram agumatsaninanga o Sodome amabongu na biandi biotsu wandi; bamayenamubega.

¹³ Murinitsi amayeditsingula Abram muisi Hebreu; jandi amatsaninanga va gari miri mineni miMamre, amimaba miAmor muana nguji Echekol na Aner abamavangana pangini na Abram.

¹⁴ Ava Abram amagululu yiri muana katsi andi amakotusu o tsugu, amavega bitogulu ombu kama yirieru na digumi na yinana yibasalitsi bandi abamaba na tindi mangolu, abamaburulu mu ndagu andi na amabingisa bakaga beni te no Dan.

¹⁵ Abram amagaba dibadi diandi makabu utumuna bakaga beni mukolu, diwendi rie: amababelisa na amababingisa te no Hoba aguvu o banda Damas.

¹⁶ Amabapatula abimakindu biotsu; amabatula na muana-katsi andi Lot na biandi biotsu na bagetu na bakoli basusu.

¹⁷ Abram anobelisa Kedor-Laomer na bakaga abamavangana pangini nandi; jogu na kaga jiSodome bamabenguna o yibususu yiChave, ayinengulungu yibususu yikaga va temu ejiji.

¹⁸ Melkisedec kaga jiSalem amabeyisa mapa na malamu: amaba muvagulitsi upagu uNsambi Aguvu Uneni.

¹⁹ Amagabila Abram miula na amavosa rie: Miula mibi na Abram: miula miNsambi Aguvu Uneni agumavaga julu nabutamba!

²⁰ Diboti ombu Nsambi Aguvu Uneni agumaguwakisa bavinitsi bagu! Abram amamuvega yimosi mu digumi mu biotsu.

²¹ Kaga jiSodome amatsingula Abram rie: Kabusili batu, gukabonga abimakindu.

²² Abram amawagula kaga jiSodome rie: Nyilevi pesi va gusu Fumu, Nsambi Aguvu Uneni, agumasunda julu na butamba rie:

²³ Ngobonga ne yima yimosi mu biotsu abivu abiagu ne munsiyi ne mukudu ubapondu mu mbari gukevosa rie: Nyimavega Abram busina.

²⁴ Menu ngerondi ne yima yimosi! Yika biguji abi abami bamaji na dikabu dibabaala abamavangana pangini nami: Aner na Echekol na Mamre.