Dibandu 13 - La Sainte Bible en Langue Yipunu

¹ Abram amarambuyila o Egypte ugabuga o Neguev; jogu na mugatsi andi na biotsu abimaba nandi na Lot wandi.

Abram na Lot bamakakana

² Abram amaba na busina buneni: migamba na mbongu na lora.

³ Amayenakumuganga milaku ubandila o Neguev te na amatola va gari Bethel na Ai.

⁴ Va mbura aji amalerungila yinyensulu, avana Abram amasambilila Nsambi nomunengila Fumu.

⁵ Lot agumalinganga na Abram amaba na bindombu na binsabi na bangombi na mandagu mamatsanda.

⁶ Basamarungula utsana va mosi mu mbari bima biogu bimaviolila ufuna, mbura jimaba jigeyi.

⁷ Vamaba mitsundu va gari babungulitsi babindombu baAbram na babungulitsi babindombu baLot. (Bisi Canaan na bisi Perezie bamatsananga o bulongu bueni.)

⁸ Abram amatsingula Lot rie: Vayamueba mitsundu va gari jetu nagu vo nesi va gari babungulitsi bami na babungulitsi bagu mu mbari jetu nagu tuvu katsi na muana katsi.

⁹ Gugelabi yiri bulongu buvu buneni? Kabogu kakana nami: pa ndeʼ guwenda o yiari yibanda, nyuwenda o yiari yitandu; pa guwenda o yiari yitandu, nyuwenda o yiari yibanda.

¹⁰ Lot amagengila yiari na yiari na amalaba kumu jiotsu jiJourdain ajimaba na butamba bunyega. Mbe Fumu asakabunga Sodome na Gomorrhe, mbura eni te na Soar, jimaba nderi nungi Fumu na nderi bulongu buEgypte.

¹¹ Lot amasola kumu jiotsu jiJourdain na amavaga milaku miandi o yiari ayi wisi epalili. Anana bamakakinina.

¹² Abram amayevaga milaku miandi te no Sodome.

¹³ Kabogu bisi Sodome bamaba batu baranga abamalensanga Fumu.

¹⁴ Lot anokakana na Abram, Fumu amatsingula Abram rie: Avana guvu, gengila o yiari yibanda no tandu no yiari ayi wisi epalili na ayi wisi ewendisini;

¹⁵ bulongu buotsu abu guilabi nyubuvega jenu na bategula bagu mutubu.

¹⁶ Nyufunisa bategula bagu te na boba nderi difufundu, diwendi rie: pa mutu orungula utala difufundu, kabogu abagu borungula utalu.

¹⁷ Relama, tsiengila bulongu yiari na yiari; mu mbari nyuguvega buonyi.

¹⁸ Abram amamuekumuga uyevaga milaku va gari miri mineni miMamre amivu bebeli na Hebron. Avana amarungila Fumu yinyensulu yipagu.