Dibandu 11 - La Sainte Bible en Langue Yipunu

Kumfu mu mbembu

¹ Va temu eni batu botsu bamavosanga mbembu mosi na posulu tsimosi.

² Batu bamakumuga o yiari ayi wisi epalili na bamasupulila kumu jibulongu buMesopotamie na bamayetsana guna.

³ Bamanengasana rie: Ruganu! Tudimbianu birika na tubigokianu! Bamasalisa birika nderi mamanyi, bamabinamiga na butamba.

⁴ Bamamuevosa rie: Ruganu! Turungianu musiengi na ndagu jisakama ajiuduku te no julu, turoyisianu diina dietu yiri tugopansiga yiari na yiari bibutamba buotsu.

⁵ Fumu amasunduga uyelaba musiengi na ndagu jisakama abi batu bamarunga.

⁶ Fumu anojilaba amatasa rie: Laba ayi batu abavu dibuli dimosi na abevosi mbembu mosi borungula uvaga. Pa bebandi nana vagoba diambu adiubagubitsa udugusu ayi betasi usala.

⁷ Ruganu, tusunduyianu nobarombisa kumfu mu mbembu ogu te na bagomuegulusunu.

⁸ Avana Fumu amabapansila yiari na yiari te na bamadunda urunga musiengi eni.

⁹ Bamaluga musiengi eni Babel mu mbari avana Fumu amarombisila bisi butamba kumfu mu mbembu ogu na avana amabapansila o biari biotsu bibutamba.

Bategula baSem te na baAbram

¹⁰ Nyidu jinovioga, vamamuevioga bilima bibeji, vana yilima yieni Sem amaba na kama bilima na amabura Arpaxad.

¹¹ Sem anobura Arpaxad amabuela kama yiranu tsibilima, amaburanga baana bababaala na babagetu.

¹² Ava Arpaxad amabila magumarieru na bilima biranu akabura Chela.

¹³ Arpaxad anobura Chela amabuela kama jina na bilima biriem; amamueburanga baana bababaala na babagetu.

¹⁴ Ava Chela amabila magumarieru mabilima akabura Eber.

¹⁵ Chela anobura Eber amabuela kama jina na bilima birieru; na amaburanga baana bababaala na babagetu.

¹⁶ Ava Eberamabila magumarieru na bilima bina akabura Peleg.

¹⁷ Eber anobura Peleg amabuela kama jina na magumarieru mabilima; na amaburanga baana bababaala na babagetu.

¹⁸ Ava Peleg amabila magumarieru mabilima akabura Reou.

¹⁹ Peleg anobura Reou amabuela kama beji na yifu yibilima; na amaburanga baana bababaala na babagetu.

²⁰ Ava Reou amabila magumarieru na bilima bibeji akabura Seroug.

²¹ Reou anobura Seroug amabuela kama beji na yisambuali yibilima; na amaburanga baana bababaala na babagetu.

²² Ava Seroug amabila magumarieru mabilima akabura Nahor.

²³ Seroug anobura Nahor amabuela kama beji tsibilima; na amaburanga baana bababaala na babagetu.

²⁴ Ava Nahor amabila magumabeji na yifu yibilima akabura Tera.

²⁵ Nahor anobura Tera amabuela kama na yigumi na yifu yibilima; na amaburanga baana bababaala na babagetu.

²⁶ Ava Tera amabila magumidusambuali mabilima akabura Abram na Nahor na Haran.

²⁷ Agugu la mukuta uTera na bategula bandi. Tera akabura Abram na Nahor na Haran. Haran akabura Lot.

²⁸ Haran amafuila va misu mataji andi Tera o bulongu abu amaburulu, diwendi rie: o Our o bulongu buBabylonie.

²⁹ Abram na Nahor bamawela bagatsi: mugatsi Abram diina diandi Sarai, mugatsi Nahor diina diandi Milka, agumaba muana mugetu uHaran, agumaba taji Iska wandi.

³⁰ Sarai asamaba na baana: amaba yinguma.

³¹ Tera amayenabega Abram muana andi udibaala na Lot muana dibaala uHaran, diwendi rie: muana katsi andi na boji buandi Sarai, mugatsi Abram na jogu botsu bamarambuyila o Our o bulongu buBabylonie uwenda o bulongu buCanaan. Bamatola o Haran na bamayetsana.

³² Yitsingu yiotsu yiTera yimaba kama beji na bilima biranu mbana amafuila o Haran.