Dibandu 10 - La Sainte Bible en Langue Yipunu

Bategula baNoe

¹ Agugu la mukuta ubaana bababaala baNoe na bategula bogu nyidu jinokamuga: Sem, Cham na Japhet bamabura baana bababaala.

² Miina mabaana bababaala baJaphet amama: Gomer na Magog, na Madai, na Yavan, na Toubal, na Mechek na Tiras.

³ Miina mabaana bababaala baGomer amama: Achekenaz, na Rifat, na Togarma.

⁴ Miina mabaana bababaala baYavan amama: Elicha, na Tarsis na Kittim na Rodanim.

⁵ Jogu bamabasisa nyingi tsiotsu batu; dilongu dilongu nesi mbura mbura na mbembu andi na mukuta andi.

⁶ Miina mabaana bababaala baCham amama: Kouch, na Misraim, na Pout na Canaan.

⁷ Miina mabaana bababaala baKouch amama: Seba na Havila na Sabta na Ragma na Sabteka. Miina mabaana bababaala baRagma amama: Saba na Dedan.

⁸ Kouch akabura Nemrod; la jandi agumaba kaga jitega va butamba.

⁹ Amaba murela uneni va gusu Fumu: la dibandu bamavosila rie: Avu nana Nemrod murela uneni va gusu Fumu.

¹⁰ Durumu duandi dumabanda tetega o Babel te no Erek na Accad na Kalne o bulongu buChinear.

¹¹ O bulongu bueni Assyrie amapalila; amarunganga Ninive na Rehobot-Ir na Kela,

¹² na Ressen aguvu va gari Ninive na Kela aguvu musiengi uneni.

¹³ Misraim akabura baLoud na baAnem na baLehab na baNaftou

¹⁴ na baPatros na baKaslou na baKaptor agu baPhilistin bamapatila.

¹⁵ Canaan akabura tsomi andi Sidon na Het;

¹⁶ na baJebusie na baAmor na baGuirgachie,

¹⁷ na baHivie na baArquie na baSinie

¹⁸ na baArvadie, na baSemarie na baHamat. Va julu vana mikuta mibisi Canaan mimapansiga.

¹⁹ Mandilu maCanaan mamabandila o Sidon o yiari yiGuerar te no Gaza no yiari yiSodome na Gomorrhe na Adma na Seboim te no Lecha.

²⁰ Botsu bana bavu baana bababaala baCham na mikuta miogu na mambembu na biari biogu na malongu mogu.

²¹ Sem agumaba yiduki yiJaphet amabura baana bababaala wandi, jandi agumabura baana botsu bababaala baEber.

²² Miina mabaana bababaala baSem amama: Elam na Assour na Arpaxad na Loud na Aram.

²³ Miina mabaana bababaala baAram amama: Ous na Houl, na Gueter na Mach.

²⁴ Arpaxad akabura Chela; na Chela akabura Eber.

²⁵ Eber amabura baana babeji bababaala: umosi diina diandi Peleg mu mbari va temu andi butamba bumagabulu, na diina dimuana nguji andi Yoctan.

²⁶ Yoctan akabura Almodad, na Chelef na Hassarmavet, na Yera,

²⁷ na Hadoram na Ouzal na Dicla,

²⁸ na Obal, na Abimael na Saba,

²⁹ na Ofir na Havila, na Yobab. Botsu bana baana bababaala baYoctan.

³⁰ Bamatsaninanga ubandila o Mecha, o yiari yiSefar te no mukongu aguvu o yiari ayi wisi epalili.

³¹ Botsu bana baana bababaala baSem na mikuta miogu na mambembu mogu na biari biogu na malongu mogu.

³² Biotsu bina la bibandu bibaana bababaala baNoe na kula tsiogu na malongu mogu. Mu jogu amumapalila malongu amamapansiga yiari na yiari o butamba buotsu yiotsu ayi nyidu jimavioga.