Daniel 4 - La Sainte Bible en Langue Yipunu

¹ Menu, Nabucodonosor nyimatsananga sui nolabanga ubueji o ndagu ami jibukaga.

² Nyimadora ndosi ajimandasa goma; matasa mami mamateyimisa va tangi.

³ Nyimaruma rie: Ndengililianu batu badiela botsu baBabylone yiri bopindiyila ndosi.

⁴ Mbana bavanditsi na abamawijingi bambuelili na banganga na beresitsi bamaruga. Nyimabawalulila ndosi tumba basamajipindiyila.

⁵ Mua pesu temu Daniel amalabana nami. Jandi agumalugu dima dinsambi ami Beltassar, amagaangu lia yinyunyi yibansambi. Nyimamuwalulila ndosi ami.

⁶ Nyimavosa rie: Beltassar, odeʼ aguvu yivunda yibavanditsi nyijabi yiri ndeʼ guvu na yinyunyi yibansambi na gugelabi uvura na yisuegu yika la yisuegu; pindiyili ndosi ami.

⁷ Avanyibetsi yilu va tangi nsilaba abibi: Nyimalaba muiri uneni va gari bulongu.

⁸ Muiri eni umaroga tindi uroga; bitayi bi-uonyi bimaduka te no julu, umalabululungu o masuka motsu mabutamba.

⁹ Magaji mamaba maboti, umaburanga puela milunda amimaligungu na batu botsu, bibulu bimusiru bimavumanga o tsi yivosi yimuiri eni, batsoli bamarunganga muva mu bitayi, yiotsu ayivu monyu yimakelisila muna.

¹⁰ Yika udora nyidori va tangi ami; nyimalaba yiansa ayimasundiyila o julu.

¹¹ Amagamuga na mangolu rie: Wanganu muiri kukanu magaji pansanu milunda! Bibulu birini muiri nesi batsoli bapurumuyi!

¹² Tumba silanu yisindu ayivu na ngansi, va gari bisinga binungi, yitungianu panga tsimadilu nesi tsikunga. Yitsatsu na disala, yibi vana va mosi na bibulu abejangingi bisinga;

¹³ murima andi umutu umupatulu avegu murima uyibulu. Aviosi yisambuali yibilima.

¹⁴ Kaka ejiji jimabegu na biansa yiri botsu abavu monyu bajabi yiri Nsambi Aguvu Uneni erumi bufumu buotsu; eveyi durumu ombu agu erondi nesi ombu bifufu!

¹⁵ Ajina la ndosi aji menu Nabucodonosor nsidora. Ndeʼ Beltassar, jipindiyili mu mbari bango diela botsu babufumu buami bagerunguli ujipindiyili; ndeʼ gurungula mu mbari guvu na yinyunyi yibansambi.

Daniel uvindiga evindiyi ndosi jikaga

¹⁶ Mbana Daniel agumanengulungu Beltassar amagara muru mua temu na murima andi umaba o julu. Kaga amamuevosa rie: Beltassar guyaba na murima o julu mu diambu dindosi na divindugulu dijionyi! Beltassar amawaka rie: Fumu ami, mbe ndosi jiugengila yika jogu abeguvini na mbe divindugulu dijionyi diugengila yika bavinitsi bagu!

¹⁷ Muiri agu gutsilaba ubetsi uneni na uwara agu bitayi bimaduku te no julu na utsilabananga yiari na yiari;

¹⁸ muiri eni agumafula magaji maboti na agumaburanga milunda mipuela amimaligungu na batu botsu; nesi bibulu bimusiru bimavumanga o tsi yivosi yiuonyi na batsoli bamarunganga muva muna.

¹⁹ Aa kaga, muiri eni la ndeʼ beni! Ndeʼ gumakaluga tindi mutu muneni na guna tindi mangolu. Buneni buagu bumamatanga nesi te no julu na durumu duagu dumanyava te no masuka mabutamba.

²⁰ Gumalaba yiansa yiNsambi ayimasundiyila o julu na yimavosa rie: Wanganu muiri na ubungianu! Tumba dukasila yisindu ayivu nangansi va gari bisinga binungi na yitungianu na panga tsimadilu nesi tsikunga; yitsatsu na disala, yibi vana na bibulu te na yisambuali yibilima.

²¹ Aa kaga, gulu kaka jiNsambi Aguvu Uneni ajiugudugusulu:

²² Gubingu va gari batu! Gutsananga va mosi na bibulu bimusiru! Gujanganga bisinga dedi mosi na bangombi! Gutsatsu disala! Guviosa yisambuali yibilima te na gujaba yiri Nsambi Aguvu Uneni erumi, eveyi durumu ombu agu erondi.

²³ Divindugulu di-usila yismdu ayivu na ngansi divu rie: bufumu buagu busiala yika pa gutsiyisa yiri Nsambi aguvu o julu avu Fumu.

²⁴ Aa kaga, dilongi diami diurungula ugulasa ubueji? Tsie dundi masumu magu nokipanga dusungugu! Lasa abamakambulu yingeba mbana tanguji amagu mobuejingi.

Ndosi jimadugusu

²⁵ Kaga Nabucodonosor amalaba mambu meni motsu.

²⁶ Yigumi na tsungi beji tsinovioga amayenalinganga o ndagu andi o Babylone

²⁷ na amagamuga rie: Agugu tsiri Babylone aguneni agu nyimarungisa? Ajiji tsiri ndagu kaga aji nyimarungisa na mangolu mami uroyisa buneni buami?

²⁸ Kaga uvosa mbe akivosa ava diufi dimagulununu o julu rie: Kaga Nabucodonosor, gulu bulumbi buebubu: Bufumu buagu bumagupatulu!

²⁹ Gubingu va gari batu! Gutsananga va mosi na bibulu bimusiru! Gujanganga bisinga dedi mosi na bangombi! Guviosa yisambuali yibilima te na gujaba yiri Nsambi Aguvu Uneni erumi na eveyi durumu ombu agu erondi.

³⁰ Vana vana diambu dimadugusulu Nabucodonosor. Batu bamamubinga va gari ogu, amaji bisinga nderi bangombi na amanogulu disala. Nanga tsiandi tsimasakama nderi tsala tsimbira na nyala tsiandi tsimasakama nderi tsibatsoli.

Dubelusu duNabucodonosor

³¹ Yisambuali yibilima binosuka menu Nabucodonosor nyimabuaga misu o julu mbana murima ami umutu umagabuga. Nyimagabusila diboti ombu Nsambi Aguvu Uneni, nyimayitsa nododisa jandi aguvu monyu umutubu na mutubu na bufumu buandi buitsingi te na kula tsiotsu.

³² Je bisi butamba bavu dedi nandi? Evayi nana erondili nesi na bambuelili nesi na bisi butamba. Vagaa mutu agurungula ugagana nandi nomuwivula rie: Yi guivayi?

³³ Vana temu eni murima ami umutu umagabuga; bundumbabubufumu buami nesi buneni buami bumakabusulu. Balongitsi bami na baneni bami bamamuetangimina. Nyimagabusu o bufumu buami na mangolu mami mamamuefunanga.

³⁴ Kabogu menu Nabucodonosor nyiyitsi na nyikakisi na nyidodisi Kaga jijulu! Bisalu biandi biotsu bivu bingensa na mambu mandi mavu masungama. Orungula usundusa bango dunangu.