Daniel 3 - La Sainte Bible en Langue Yipunu

Durumu usambila yitumba yilora

¹ Kaga Nabucodonosor amavaga kosi jilora ajimaba na usakama umagumarieru mametera na uroga umetera yirieru. Amajireliga o kumu jiDoura o yiari yiBabylone.

² Mbana amanengila baneni babulongu: barumitsi na bansonsi na bakelisi bambongu na bivunda biandi biotsu bimunongu na munongu uruga o duwakusulu duyitimba ayi amavaga.

³ Kabogu baneni babulongu na barumitsi na bansonsi na bakelisi bambongu na bivunda biandi biotsu bimunongu na munongu bamagukama o duwakusulu duyitumba yikaga.

⁴ Muwansitsimuansu amabawansila muansu rie: Jenu batu botsu na bisi malongu motsu na mambembu motsu guluanu diruma adi dumarumu:

⁵ Ava dugululu diufi dimumbanda nesi didimbika nesi diyitara nesi disambuka nesi disaleterio nesi dikomamusa nesi dibisigu bimunongu na munongu dukagudama nosambila yitumba yilora ayi kaga Nabucodonosor amavaga.

⁶ Mutu uotsu agugogudama nosambila osundila ubuagu o furu ajimabangusu muji uneni.

⁷ La dibandu ava batu botsu bamagululu diufi dimumbanda nesi didimbika nesi diyitara nesi disambuka nesi disaleterio nesi dibisigu bimunongu na munongu batu botsu na bisi malongu motsu na babaala bamambembu motsu bamagudama na bamasambila yitumba yilora ayi kaga Nabucodonosor amavaga.

Bambatsi baDaniel bamaba basigama baNsambi

⁸ Vana temu eni bisi Babylone bamaronda ufuengilila baJuif.

⁹ Bamatsingula kaga Nabucodonosor rie: Aa kaga, kaga abi kaga te na mutubu!

¹⁰ Ndeʼ gumavega diruma adivosi yiri botsu abogulu diufi dimumbanda nesi didimbika nesi diyitara nesi disambuka nesi disaleterio nesi dikomamusa nesi dibisigu dimunongu na munongu vengu bogudama nosambila yitumba yilora.

¹¹ Botsu abobusa ugudama noyisambila bobuagu o furu ajimabangusu muji uneni.

¹² Kabogu bavu baJuif aba gumawakisa bisalu uruma o Babylone, diwendi rie: Chadrac na Mechak na Abed-Nego. Aa kaga, jogu bagegukipi, bagesalili bansambi bagu na bagesambili yitumba yilora ayi gumavaga.

¹³ Kabogu Nabucodonosor amanyoga tindi kabu na amaruma yiri babeyi Chadrac na Mechak na Abed-Nego. Banobegu ombu kaga,

¹⁴ amabawivula rie: Dingensa dugesalili bansambi bami na dugesambili yitumba ayi nyimavaga?

¹⁵ Banu dukunsama, ava dugululu diufi dimumbanda nesi didimbika nesi diyitara nesi disambuka nesi disaleterio nesi dikomamusa nesi dibisigu biotsu bimunongu na munongu dukagudama nosambila yitumba ayi nyimavaga; pa dugoyisambila dusundila ubuagu o furu ajiubangusu muji uneni. Nsambi yi oduwaka kalala ombu garni?

¹⁶ Chadrac na Mechak na Abed-Nego bamawaka kaga Nabucodonosor rie: Tugaa na nsala uwaka diambu diedidi.

¹⁷ Aa kaga, gulu Fumu Nsambi etu agu tuisalili orungula utuwaka kalala o furu ajimabangusu muji uneni notuwaka kalala ombu gagu.

¹⁸ Jaba yiri jetu tugosalila bansambi bagu na tugosambila yitumba yilora ayi gumavaga.

¹⁹ Adinadimanyoyisa kaga Nabucodonosor tindi kabu ajimamurombisa ugalisa murima. Amaruma uyirasana muji ufuru ne uviolila na kala.

²⁰ Mbana amaruma bagora bandi bamangolu utunga Chadrac na Mechak na Abed-Nego nobabuaga o furu ajimabangusu muji uneni.

²¹ Vana vana bamatunga barieru beni baduara na mikudu na bamababuaga o furu ajimabangusu muji uneni.

²² Diruma dikaga dimaba na mangolu na furu eni jimayirusunu tindi uyirusunu, milutsu mimaboka babaala abamabuaga Chadrac na Mechak na Abed-Nego o muji.

²³ Babaala beni barieru: Chadrac na Mechak na Abed-Nego bamabonduga batungu o furu ajimabangusu muji uneni.

Bambatsi barieru bamagobulu o furu

²⁴ Mbana kaga Nabucodonosor amakambulu na amasundila uretsama. Amavosa na babaala abamaba vana rie: Tsia babaala barieru tutsibuaga batungu o muji? Jogu bamawaka kaga rie: Nyiina!

²⁵ Mbana amamuevosa rie: Tumba nyilabi babaala bana abagaa batungu na ulinga belingi o gari muji nderi bagegulu ne diambu; yinsi yidibaala adimuina yibagunu na yinsambi.

²⁶ Mbana Nabucodonosor amabamabana va dikotulu difuru na amagamuga rie: Chadrac na Mechak na Abed-Nego, basalitsi baNsambi aguvu uneni, palanu, mganu! Mbana Chadrac na Mechak na Abed-Nego bamapala o gari muji.

²⁷ Baneni babulongu na barumitsi na balongitsi bakaga bamagukama; bamalaba yiri muji usamavaga babaala beni diambu, nesi nanga tsiogu tsisamanyenga nesi biduaru biogu bisamabiva na basamanamu nesi mbunga jimuji.

²⁸ Nabucodonosor amagamuga rie: Diboti ombu Nsambi Chadrac na Mechak na Abed-Nego agumasindiga yiansa yiandi uwaka basalitsi bandi kalala; abamamuvayila yitu, abamalensa diruma dikaga nowakisa nyuru tsiogu tsiri usambila noyitsa nsambi jisusu yika Nsambi ogu!

²⁹ Guluanu diruma adi nyirumi rie: Mutu uotsu, mutu yika la mutu mu dilongu yika la dilongu na mbembu yika la mbembu aji evosingi pa ovosila Nsambi Chadrac na Mechak na Abed-Nego dibi aboku mbisu na ndagu andi jiupansu mu mbari vagaa nsambi jisusu ajiurungula uwaka mutu kalala nana jandi.

³⁰ Va julu vana kaga amamatisa Chadrac na Mechak na Abed-Nego mu bisalu biogu o Babylone.

Ndosi jimubeji jikaga: Muiri uneni

³¹ Kaga Nabucodonosor utinda etindi bulumbi ombu batu botsu: Mutu yika la mutu, dilongu yika la dilongu na mabembu yika la mbembu abetsaningi yiari na yiari rie: Duvotsu dubangingi nenu!

³² Nyimalaba ubueji udujabisa bilimba na bimaga abi Nsambi Aguvu Uneni amapayila:

³³ Ka muna bilimba biandi! Ka muna bimaga biandi! Bufumu buandi buvu mutubu; orumanga mutubu na mutubu.