Daniel 11 - La Sainte Bible en Langue Yipunu

¹ Yilima yitega yiDarius muisi Mede, meʼ beni nyimaba va mugula andi umuwamusa nomuwarisa.

² Gulu, nyugujabisa bulumbi: Vomueba bakaga barieru o Perse. Kaga ajimuina ogukiga busina bupuela uviolila botsu basusu; oba na mangolu mabusina buandi mbana omanina mangolu mandi motsu utoyisa bufumu buGrece.

Divita dikaga jibanda na jitandu

³ Tumba volabana ngogaga ajiuvinga kaga jiGrece. Oba na mangolu maneni novaganga diotsu adi erondi.

⁴ Ava obila na mangolu bufumu buandi bupansiga na bukegaba o biari bina bipunga; bugomueba bubategula bandi na bugomueba na mangolu nana bumalebila mu mbari bupatulu novegu ombu basusu tsiri abandi.

⁵ Kaga jitandu oba na mangolu. Tumba sefu jimosi va gari basefu bandi oba na mangolu uviolila jandi na orumanga; durumu duandi dubanganga na mangolu.

⁶ Mua bilima binovioga bovangana pangini; muana mugetu ukaga jitandu owenda ombu kaga jibanda umuekunsa dinonga. Tumba mugetu agokelisa mangolu mandi ne nana kaga agogagana nandi; mugetu oboku va mosi na jogu abomubega va mosi na taji andi na aguba mulumi andi va temu eni.

⁷ Mutegulu andi olabana va yivinga yiandi; oruga na bagora nokota o bivaga bikaga jibanda, omutumuna nolunga.

⁸ Obega abimakindu o Egypte, diwendi rie: bansambi bogu na bitumba biogu bikunga na bima biogu bidufunu duneni bilora jivema na bilora. Mbana okakana mua bilima na kaga jibanda.

⁹ Kaga jibanda otoga divita na bufumu bukaga jitandu mbana ogabuga o bulongu buandi.

¹⁰ Tumba baana bababaala bakaga jibanda bogukiga bagora bapuela. Bowenda o divita na bobasa bulongu nana nyidu jibasi. Ava boyenagabuyilanga boyenatoganga o musiengi ukandu ubavinitsi.

¹¹ Kaga jitandu onyoga na opala na bagora bapuela utumuna kaga jibanda; bagora bakaga jibanda bobetsu.

¹² Bagora beni banobetsu, kaga jitandu okematisa. Diuleba obokisa puela batosini babagora, agolunga.

¹³ Mu mbari kaga jibanda omueruga na ogukiga bagora bapuela uviolila temu jitega; mu mua temu nesi mua bilima omuegabuga na bagora bapuela na busina bupuela.

¹⁴ Vana temu eni bapuela botoga na kaga jitandu na bango dikasi abavu va gari batu bagu, Daniel, bokaluga mimbini udugusu yiriariamu tumba bagolunga.

¹⁵ Kaga jibanda okueka, orungisa bikadi nopatula musiengi ukandu. Bagora batandu na bagora abamasolu bakaga bagorungula umugagana mu mbari bagoba na mangolu.

¹⁶ Jandi agutoga nandi ovaga diotsu adi erondi ne mutu mosi agogagana nandi; osikama o bulongu abuiviolili malongu motsu ubueji; botsu aba ogaanga boboku.

¹⁷ Oba na ditasa utola na bagora botsu babufumu buandi nokunsa dinonga na kaga jitandu; owetsa muana andi umugetu nandi na ditasa dimubunga; tumba adina digolabana na agolunga.

¹⁸ Ogengila o yiari yibanyingi na obonga bamosi; tumba sefu ngana otsiemusa dunangu duandi na yisonyi yiumugaanga.

¹⁹ Mbana otasa misiengi miandi mikandu, opepalana noyebeniga na dufu duandi duba na mambu.

²⁰ Jandi aguba yivinga yiandi otinda mubongitsi ulepu o biari biotsu bibufumu buandi uyenapatulanga batu busina; tumba yika mua bilumbu osundila ufu, tsiri va misu mabatu o divita.

²¹ Dibaala dibi ovinga va yivinga yiandi, adigaa na bifu biwelimina na bukaga; osundila ulabana na duvotsu udila bufumu na ndiongulu.

²² Bagora bandi bobasa dilongu nderi nyidu ajimabasu; bodiamusu va gusu andi na boboku va mosi na sefu ajimavangunu pangini.

²³ Banomana ufubana nandi, jandi obadunsanga; diuleba yika pesu batu boba nandi oba na mangolu.

²⁴ Osundila ubasa biari bibulongu abivu na digumba novaga mambu ama bataji bandi na bakaga bandi basamavaga: mu mua temu oyenakindanga bulongu nogabila abandi abimakindu. Oyenapansanga bivaga tumba agotsinga.

²⁵ Avaoruminanga bagora bapuela osalisa mangolu mandi na bukidi buandi utoyisa kaga jitandu. Kaga jitandu otoga divita adiuba na bagora bapuela na mangolu maneni; tumba agorungula uwarila mu mbari fundu jimamutungulu.

²⁶ Na jogu abojanginga biguji biandi bomurombisa ubungana; bagora bandi bobasa dilongu nderi nyidu na bapuela bofuanganga.

²⁷ Bakaga beni babeji boyenatasanga uvaga mabi, diuleba botsana va tavula mosi bovosanga mamfurulu. Tumba motsu mana magobueji mu mbari disukusulu diulabana va temu aji dimakunsulu.

²⁸ Kaga jibanda ogabuga o bulongu buandi na busina bupuela tumba ovinanga pangini jiNsambi, jandi ovaga duganu dujaʼ beni noyenagabuga o bulongu buandi.

²⁹ Va temu ajimakunsu omuetoyisa bisi tandu; tumba temu eni jiusita mambu magoba nana mamalebila.

³⁰ Makumbi mamamba maKittim mobambana utoga nandi; ovola nyuru noyenagabuga. Mbana onyoyila pangini jiNsambi kabu, agoba sui, ofiubana na jogu abamabunsa pangini jiNsambi.

³¹ Bagora bolabana na musuga andi; bosabula Ndagu Nsambi na botsiemusa pagu jiyilumbu na yilumbu; bovaganga mambu mansoruru mamubungitsi.

³² Na ndiongulu odunsa babunsitsi bapangini tumba batu abejabi Nsambi ogu boba na bukidi na bosalanga.

³³ Jogu abavu na tindi diela va gari ogu bolonsa diela diogu ombu bapuela, mua pesu temu bamosi bovunu na basusu bonyensu na basusu bokotusu o tsugu, banomana ubakinda.

³⁴ Va temu jidikuana dieni bowamusa mua pesu na bapuela bofubana nogu na mabeʼ mabeji.

³⁵ Babaala bamosi abavu na diela bobetsu, adina diuliomisa bapuela. Disukusulu diulabana va temu aji dimakunsulu.

³⁶ Kaga ovaga adi oronda; oretsama anokematisa va gusu bansambi botsu na ovosila Nsambi bansambi mambu makulini; olunganga te na kabu Nsambi jiulabana mu mbari adimatabulu diudugusu.

³⁷ Agokipa bansambi babaiaji bandi nesi bansambi aba bagetu berondi; agokipa nsambi jiotsu mu mbari okematisa va gusu botsu.

³⁸ Tumba oyitsanga nsambi jibivaga na nsambi aji bataji bandi basamalejabanga, ojivagulila lora na lora jivema na mamanyi madufunu duneni na bima bidufunu duneni.

³⁹ Na mangolu mansambi eni opansa bikadi bibivaga na omatisa jogu abomuyitsanga nobavaga barumitsi babatu bapuela nobagabilanga bulongu, anana obafutila.

⁴⁰ Va disukusulu ditemu eni kaga jitandu obenguna nandi. Kaga jibanda omuvika nderi mungudi na makalu na babeyitsi babakabala na makumbi mamamba mapuela; bokueka na bobasa dilongu nderi nyidu ajiubasa.

⁴¹ Okota o dilongu adiviolili motsu ubueji na bapuela bobetsu; tumba bisi Edom na bisi Moab na bivunda biAmmon bowaku kalala ombu gandi.

⁴² Os am ba dikaka diandi o malongu mapuela na bulongu buEgypte bugorina, via.

⁴³ Oba fumu jibilundulu bilora na bilora jivema na jibima biotsu bidufunu duneni biEgypte; bisi Libye na bisi Ethiopie bokesunsa o tsi durumu duandi.

⁴⁴ Misamu miyiari ayi wisi epalili na mibanda miumulasa goma na oyenawenda na kabu jineni uyenabunganga noyenabokisanga bapuela.

⁴⁵ Orangiga mandagu mandi mamatsanda mabukaga va gari miubu nesi o mukongu ubundumba buNsambi; va disukusulu diandi mutu agomuwamusa.