Daniel 10 - La Sainte Bible en Langue Yipunu

Yiriariamu yimurieru: dibaala adimaduara tsanda jilina

¹ Mu yilima yimurieru yiCyrus agumaba kaga jiPerse, bulumbi buNsambi bumatsingulu Daniel agumanengulungu Baltazar. Bulumbi bueni bumaba dingensa na dineni. Amaba limba ugulu diambu dieni na amadila dujabu duyiriariamu.

² Va temu eni menu Daniel nyimanyoganga te na tsona yirieru.

³ Nyisamaji ne yima yiotsu nesi nyama nesi malamu na nyisamagolila te na tsona yirieru tsimadugu.

⁴ Mu yilumbu yimagumabeji na bina yitsungi jitega nyimaba va mugula umujamba uTigre.

⁵ Nyimabuaga misu na nyimalaba dibaala adimaduara tsanda jilina ria amaduara beleeti jilora.

⁶ Dunyuru duandi dumalula nderi dusiengi, yinsi yiandi yimavedama nderi dusiemu na misu mandi mamaba nderi milutsu mimuji, miogu miandi na makulu mandi bimaba nderi kunga ajimaliomusu na diufi diandi dimaba nderi nduku jibatu bapuela bapuela.

⁷ Menu Daniel nyimalaba yiriariamu waʼ pinsa; babaala abamaba nami basamayilaba tumba bamagaangu na goma jineni na bamarina uyesuema.

⁸ Nyimasiala pinsa ava nyimalabila yiriariamu yieyina yineni. Nyimaba nderi mfumbi, va julu vana nyimatsiemusa mangolu motsu.

⁹ Nyimagulu nduku jidiufi diandi ava amavosila mambu mandi; nyimaba timbila te na nyimagudama va tsi.

¹⁰ Sundila dikaka dimambemba adimareyimisa makotulu mami na makaka mami.

¹¹ Mbana amansingula rie: Daniel, ndeʼ guvu aguandi udurondu, ba limba ugulu ama nyirondi ugutsingula. Retsama va mbura aji guvu mu mbari nyimasindugu ombu gagu. Anonsingula nana, nyimaretsama noregama.

¹² Amansingula rie: Daniel, guyalaba keri, ubanda na yilumbu ayi giimarondila utsiyisa diambu nokesunsa va gusu Nsambi agu, tsambu tsiagu tsimagulunu, la dibandu nyimaru-yila.

¹³ Yiansa yibufumu buPerse yimagagana nami magumabeji na yilumbu yimosi tumba Michel, yivunda yibiansa yimaruga ujikwamusa. Nyimatsana vana na bakaga baPerse.

¹⁴ Nyimaruga uyigujabisa adiulabana na batu bagu namapapa; yiriariamu yilasi temu eni wandi.

¹⁵ Ava yiansa yimansingulilanga mambu meni nyimabuaga misu o tsi na nyisamarungula uvosa diambu.

¹⁶ Vamalabana yiansa ayimabagunu na mutu, yimabemba bilila biami. Nyimadibula munu na nyimabanda umuevosa; nyimatsingula jandi agumba va gusu ami rie: Fumu ami, yiriariamu yimambasa na goma te na mangolu motsu mamansuka.

¹⁷ Yika tsie, nyurungula uvosa na ndeʼ fumu ami? Mangolu mamansuka na punga wandi.

¹⁸ Vana vana ayimabagunu na mutu amambemba na mangolu mami mamamuegabuga.

¹⁹ Mbana amavosa rie: Aguandi udurondu, guyalaba keri, duvotsu dubinagu! Sunsa murima! Nyimamuedila mangolu ava amavosila nami, mbana nyimavosa rie: Fumu ami avosingi mu mbari gumakwarisa.

²⁰ Amakwivula rie: Guijabi dibandu yi nyimaruyila ombu gagu? Yika ugabuga nyigabuyi uyetoga na yiansa yiPerse; pa nyimawenda yiansa yiGrece yiuruga. Ne mutu mosi agekwamusi utoga nogu, yika yiansa Michel.

²¹ Tumba nyirondi ugujabisa adimasonugu mu dibuku dingensa.