Bisalu Bilevi 8 - La Sainte Bible en Langue Yipunu

DUBIATSU DUB AVAGULITSI BAPAGU BATEGA Yibenguna yidubiatsu

¹ Fumu amatsingula Moise rie:

² Nengila Aaron na baana bandi bababaala o dikotulu diNdagu Yibenguna; barumi ubega biduaru na matsi madubiatsu na mulumi ngombi upagu jiutsindula dibumi na balumi babindombu babeji na yievi yimapa amagaa na dufunusu.

³ Gukiga dibuli diotsu o dikotulu diNdagu Yibenguna wandi.

⁴ Moise amadedila Fumu: amagukiga baIsrael va dikotulu diNdagu Yibenguna.

⁵ Moise amatsingula dibuli adi Fumu amabaruma uvaga.

⁶ Moise amabambasana Aaron na baana bandi bababaala, amababuitsa mamba.

⁷ Amaduisa Aaron yijungi na amatunga beleeti wandi na yilinga na yilinga yiyijungi yibuvagulitsi bupagu ayi amawarisa na beleeti jibuvagulitsi bupagu.

⁸ Amamuduisa mfunga jitulu, amakotisa Urim na Thummim muna mfunga jitulu.

⁹ Amamuduisa yiviovi na amanamiga didayi dilora o gusu yionyi nana Fumu amarumina Moise.

¹⁰ Moise amabonga matsi madubiatsu, amamasinga mu Mbura Nsambi na biotsu abimaba muna, ubivaga yingitsi.

¹¹ Amabonga matsi madubiatsu uyenatsatsanga yisambuali yikumbu biotsu bina: yinyensulu yipagu na bisalulu biyionyi biotsu na nsienga na makutu mayionyi ubivaga yingitsi.

¹² Amawitila matsi madubiatsu va julu muru uAaron, amamubiatsa.

¹³ Moise amabambasana baana bababaala baAaron; amabaduisa bijungi na amabatunga babeleeti na amabaduisa biviovi nana Fumu amarumina Moise.

¹⁴ Amabambasana mulumi ngombi upagu jiutsindula dibumi na Aaron na baana bandi bababaala bamasakiga miogu va julu muru uonyi.

¹⁵ Moise amagutabula muru na amabonga malungu ama amasinga na mulembu andi mu masiyi mayinyensulu yipagu uyiliomisa noyitsindula dibumi.

¹⁶ Amabonga matsi motsu mamisopu na muvogumbombu aguneni na mipigu miotsu mibeji na matsi mamipigu mieni mbana Moise amabinyensa va yinyensulu yipagu.

¹⁷ Tumba misonyi mimosi mimulumi ngombi na mukata u-uonyi na mambi amabinyensa o tsomu dimbu nana Fumu amamurumina.

¹⁸ Amabambasana mulumi yindombu upagu jiunyensa mbana Aaron na baana bandi bababaala bamasakiga miogu va julu muru u-uonyi.

¹⁹ Moise amagutabula muru na amatsatsa malungu o yiari na yiari biyinyensulu yipagu.

²⁰ Amagusasa mbana amanyensa muru na mapula na matsi.

²¹ Amasusa misopu na bakondu na misonyi amimasialulu mimulumi yindombu na amabinyensa va yinyensulu yipagu, ajina la pagu ajiusielusunu o muji ajiugulunu mbunga jiboti ombu Fumu nana Fumu amarumina Moise.

²² Amabambasana mulumi yindombu agumubeji ubiatsu mbana Aaron na baana bandi bababaala bamasakiga miogu va julu muru u-uonyi.

²³ Moise amagutabula muru na amabonga malungu ma-uonyi na amamasinga va mumbimbili udituji dimabaala diAaron na mulembu andi umulumi udikaka dimabaala na mu mulembu andi umulumi udikulu dimabaala.

²⁴ Amabambasana baana bababaala baAaron na amasinga malungu mu mimbimbili mimatuji mamabaala na mu milembu miogu mibalumi mimakaka mamabaala na mu milembu miogu mibalumi mimakulu mogu mamabaala na amatsatsa malungu amamasialulu yiari na yiari biyinyensulu yipagu.

²⁵ Amabonga matsi na muyila na matsi motsu mamisopu na muvogumbombu aguneni na mipigu miotsu mibeji na matsi mamipigu mieni na yiasi yikori ayimabaala.

²⁶ Mu yievi ayimaba va gusu Fumu mumaba mapa amagaa na dufunusu amuna amabongila dipa adigaa na dufunusu na dipa adimavagu na matsi na dipa adigeyi na amamasakiga va julu matsi na yiasi yikori ayimabaala.

²⁷ Amawakisa Aaron na baana bandi bababaala bima bieni biotsu na Aaron amabiviunsa yiari na yiari va gusu Fumu.

²⁸ Mbana Moise amamuebibonga na amabinyensa va yinyensulu yipagu va julu pagu jiunyensa: ajina lapagu jidubiatsu ajimasielusunu o muji ajimagulunu mbunga jiboti ombu Fumu.

²⁹ Moise amabonga tulu jimulumi yindombu udubiatsu na amajiviunsa yiari na yiari va gusu Fumu: adina dimaba dikabu diMoise nana Fumu amamurumina.

³⁰ Moise amabonga matsi madubiatsu na malungu amamaba va yinyensulu yipagu; na monyi amatsatsila Aaron na biduaru biandi na baana bababaala baAaron na biduaru biogu; anana amawakisila Aaron na biduaru biandi na baana bandi bababaala na biduaru biogu wandi ombu Fumu.

³¹ Moise amatsingula Aaron na baana bandi bababaala rie: Lambisanu nyama tsimulumi yindombu agumubeji va dikotulu diNdagu Yibenguna; avana dujijanganga na mapa amavu mu yievi yidubiatsu nana nyimarumina ava nyimavosila rie: Aaron na baana bandi bababaala bobiji.

³² Dunomana uji, pa vosialulu nyama na mapa dukabinyensa.

³³ Te na yisambuali yibilumbu duyapala va dikotulu diNdagu Yibenguna; duyapala te na yilumbu ayimusambuali, diwendi rie: yilumbu yienu yiusita, yilumbu yiudugusu yisalu yienu.

³⁴ Fumu jaʼ beni amaruma yiri duvaga anana dumavayila namunyi yiri masumu menu motandu.

³⁵ Tsananu va dikotulu diNdagu Yibenguna, nyangu na mukolu uyedugusu ama Fumu amaduruma yiri dugofu. Amama ama nyimarumunu na Nsambi.

³⁶ Aaron na baana bandi bababaala bamakelisa motsu ama Fumu amaruma Moise.