Bisalu Bilevi 6 - La Sainte Bible en Langue Yipunu

Maruma mabavagulitsi bapagu: a. Pagu jiunyensa

¹ Fumu amatsingula Moise rie:

² Vega maruma memama ombu Aaron nombu baana bandi bababaala: Mugaga upagu jiunyensa agugu: Pagu jiuba va kulamuji jiyinyensulu yipagu mukolu uotsu te na kedi na muji uyionyi uyatsima.

³ Muvagulitsi upagu oduara yijungi yiandi yimatsanda maboti na mibati wandi mbana ogusula mabufu mapagu ajiusielusunu o muji va yinyensulu yipagu na omasunsa va mugula uyinyensulu yipagu.

⁴ Mbana ovula biduaru bieni nosansa bisusu abi oduara ava opalisila dibufu o tsomu dimbu va mbura jilioma aji bebuayili dibufu.

⁵ Muji ululanga va yinyensulu yipagu, uyatsima via; kadi kedi muvagulitsi upagu otumanga mikansu guna muji notsonsiganga pagu jiunyensa ne akanyensa matsi mapagu tsikabusulu tsimaboti.

⁶ Muji uyinyensulu yipagu ululanga, uyatsima via.

b. Pagu jitsangu

⁷ Mugaga upagu jitsangu agugu: Baana bababaala baAaron bojiwakisa ombu Fumu va gusu yinyensulu yipagu.

⁸ Muvagulitsi upagu ogusula dikaka dimosi difufu nojisobana na mua matsi na biotsu bimbunga jiboti, onyensa biotsu va yinyensulu yipagu, biuba yirangumunu na pagu ajiugulunu mbunga jiboti ombu Fumu.

⁹ Aaron na baana bandi bababaala boji abiusialulu mu pagu tsieni; bobiji tsiri ubuesa dufunusu va mbura jiyingitsi o dulombili duNdagu Yibenguna.

¹⁰ Biyalambu na dufunusu. Adina la dikabu dipagu ami, ajiusielusunu o muji adi nyubavega. Jionyi jivu yingitsi munongu mosi nana pagu jiutsindula dibumi na nana pagu jimbela.

¹¹ Baana botsu baAaron bababaala borungula ubiji. Mugaga egugu uvu umutubu Ubategula benu mu diambu dipagu ajiusielusunu o muji va gusu Fumu: jiuba yingitsi na abejibembi wandi.

¹² Fumu amatsingula Moise rie:

¹³ Pagu aji Aaron na baana bandi bababaala bovega Fumu yilumbu ayi bobiatsulu ajiji: yietsu yimosi yifufu mu digumi, jiubanganga nana pagu jitsangu, dikabu dimosi bovega kedi na dikabu disusu ava tsisiga.

¹⁴ Jiugangu na matsi na gujibega jigangu; gujiwakisa jibukulu nana pagu ajiugulunu mbunga jiboti ombu Fumu.

¹⁵ Yivunda yibavagulitsi bapagu agubiatsa yivinga yiAaron, jaʼ wandi ovagula pagu ejiji. Jionyi jiuba mugaga umutubu va gusu Fumu: jiunyensu jimfuimbila.

¹⁶ Pagu tsitsangu tsimuvagulitsi upagu, tsiunyensu tsimfuimbila; tsiyaligu via.

c. Pagu jiutsindula dibumi

¹⁷ Fumu amatsingula Moise rie:

¹⁸ Vaga maruma memama ombu Aaron na baana bandi bababaala: Mugaga upangini jiutsindula dibumi agugu: Va mbura aji bebokili bibulu bipagu tsiunyensa avana yibulu yipagu jiutsindula dibumi yiutabululu muru va gusu Fumu: jionyi jivu tindi yingitsi.

¹⁹ Muvagulitsi upagu aguvagula yibulu yieni yipagu jiutsindula dibumi oyiji wandi; yiuligu va mbura jiyingitsi o dulombili duNdagu Yibenguna. Nyama jivu yingitsi na jandi aguijibembi wandi.

²⁰ Pa malungu mamanyansuga mu yikutu, ditodi dieni dususulu va mbura jiyingitsi.

²¹ Pa nyama jimalambu na mbiji jidiga jionyi jiubulu; pa jimalambulu mu mbiji jikunga, jionyi jiuliomusu nosusu na mamba.

²² Yika babaala bamikuta mibavagulitsi bapagu bobiji; jionyi jivu tindi yingitsi.

²³ Pa malungu mayibulu yipagu jiutsindula dibumi mobegu o Ndagu Yibenguna utsindula dibumi o Mbura Nsambi, bavagulitsi bapagu bayamueji: nyama jiunyensu jimfuimbila.